იურიდიული კონსულტაცია
ვმუშაობდი სამშენებლო ტრესტში საგეგმო განყოფილების უფროსად. ამავე ტრესტის ერთ-ერთ სამმართველოში მუშაობდა დედა დამხმარე მუშად. შემდეგ ტრესტი გადაკეთდა შპს-დ, რომელიც წილობრივად შევისყიდეთ თანამშრომლებმა. მეც შევიტანე დედის დანაზოგი, რადგან თავად საამისო თანხა არ გამაჩნდა. ამჟამად შპს-ს შენობა-ნაგებობა თავისი ტერიტორიითურთ გაყიდულია. ჩემი როგორც ერთ-ერთი მეწილის ხელმოწერა ჩემთან შეუთანხმებლად თვითონ გააკეთეს.
არ მაძლევენ კუთვნილ თანხას სრულად, ამიტომ გადავწყვიტე სარჩელის შეტანა სასამართლოში, შესატანი თანხა კი არ გამაჩნია. ვარ 75 წლის, მაქვს დიაბეტი, ქრონიკული გასტრიტი და ნაღველკენჭოვანი დაავადება. ვუვლი დედას, რომელიც 93 წლის პირველი ჯგუფის ინვალიდია, უსინათლო, ლოგინად ჩავარდნილი. ჩემ გარდა არავინ ჰყავს. მოგმართავთ თხოვნით, ამიხსნათ:
1. შემიძლია თუ არა სარჩელის შეტანა უფასოდ;
2. რა შეღავათები აქვს I ჯგუფის ინვალიდს;
3. რა შეღავათები აქვს მის მომვლელს.
ცნობისთვის: დედა და მე ვართ რეგისტრირებული სიღატაკის ზღვარს მიღმა მყოფ ოჯახთა ერთიან ბაზაში (სარეიტინგო ქულა - 41660). ნანული ქებურია, ზუგდიდი
- ქალბატონო ნანული, თქვენი განცხადება გულდასმით განვიხილეთ. დაგვაფიქრა მისმა შინაარსმა და გულთან მივიტანეთ თქვენი გასაჭირი. სულიერ მხნეობას და ჯანმრთელობას გისურვებთ თქვენ და თქვენს ხანდაზმულ დედას. აქვე გაცნობებთ, რომ სავსებით სწორად გადაგიწყვეტიათ, თქვენთვის საინტერესო სადავო საკითხის გასარკვევად სასარჩელო განცხადებით სასამართლოს მიმართოთ, ვინაიდან სწორედ აღნიშნული ორგანოს კომპეტენციაა გაარკვიოს, ვინ გააყალბა თქვენი ხელმოწერა და თუ ამის საფუძველი იარსებებს, მიიღოს გადაწყვეტილება შპს-დან კუთვნილი თანხის სრულად ანაზღაურების საკითხზე. როგორც განცხადებაში აღნიშნავთ, თქვენი ოჯახი რეგისტრირებული ყოფილა სიღატაკის ზღვარს მიღმა მყოფ ოჯახთა ერთიან ბაზაში და მიგიღიათ სარეიტინგო ქულა 41660, რაც გაძლევთ ყოველთვიური სოციალური დახმარების მიღების უფლებას. აღნიშნული დახმარების მიმღები პირები კი, კანონის თანახმად, სარგებლობენ გარკვეული შეღავათებით, მათ შორის თავისუფლდებიან ყოველგვარი ბაჟისგან სასამართლოში სასარჩელო განცხადების შეტანის დროს. სხვა შეღავათი დედათქვენისთვის როგორც I ჯგუფის ინვალიდისთვის და თქვენთვის როგორც I ჯგუფის ინვალიდის მომვლელისთვის მოქმედი კანონით არ არის გათვალისწინებული.
კითხვებით მოგვმართეთ ნომერზე: 893 35-99-09
