პატარა მოცურავე
-
არასოდეს თქვათ ხმამაღლა, რომ გეშინიათ
თუ ბავშვთან ერთად აუზში გინდათ ჩასვლა, ირგვლივ მყოფებთან ნუ დაიწყებთ პატარის მოსალოდნელი რეაქციის განხილვას, თუნდაც დარწმუნებული არ იყოთ, რომ ყველაფერი რიგზე იქნება. არ გასცეთ საკუთარი თავი!
-
არ ჩააგდოთ ბავშვი წყალში ძალდატანებით
მოსაზრება, რომ ამგვარად ის წყალს მიეჩვევა და ხასიათი გამოეწრთობა, მცდარია. სინამდვილეში პატარა ძალიან შეშინდება და თქვენი ნდობაც დაეკარგება.
-
ბავშვი აუზში შიშველი არ ჩაიყვანოთ
ეს თანაბრად ეხება ორივე სქესის ბავშვებს. გოგონას უყიდეთ ლამაზი საცურაო კოსტიუმი, რომელსაც გულმკერდი აქვს დაფარული. მორცხვი პატარებისთვის ეს მეტად მნიშვნელოვანია. წინააღმდეგ შემთხვევაში ბავშვის გონებაში აუზი სირცხვილთან ასოცირდება და ის ცურვაზე უარს იტყვის.
-
ნუ მოახდენთ ზეწოლას ბავშვზე
ნურც იმას სთხოვთ, აუზში თქვენი ხათრით ჩავიდეს. ბავშვი შესაძლოა შიშს ვერ მოერიოს და თავი დამნაშავედ იგრძნოს, რომ თხოვნა ვერ შეგისრულათ.
-
წყალში ყოველთვის ბავშვის გვერდით იყავით
ეცადეთ, არ შეშინდეს. ეს განსაკუთრებით მნიშვნელოვანია ზღვაში ცურვისას. თუ დიდი ტალღებია, ბავშვს წყალში ნუ შეიყვანთ.
-
არასოდეს დასცინოთ
ნუ ეტყვით, რომ ის მშიშარაა, მისი ამხანაგი კი ყოჩაღი, რადგან კარგად ცურავს. პირიქით, უთხარით, რომ თავდაპირველად წყლის ყველას ეშინია, მაგრამ ეს შიში მალე გაუვლის.