როგორ შევარჩიოთ საცურაო კოსტიუმი
თუ კლუბში თავის მოწონება გსურთ, აირჩიეთ მიკროფიბრის ან პოლიამიდისგან დამზადებული ორნაწილიანი კოსტიუმი, რომელიც მორთული იქნება დეკორატიული დეტალებით: თასმებით, აპლიკაციებით, პლისეთი, გოფრეთი... არსებობს საინტერესო დეტალი - "უჩინარი" სამაგრები ბიუსტჰალტერზე. ისინი მიმაგრებულია გარეგანი ნაკერის გარეშე და მკერდს უზადოდ უნარჩუნებს ფორმას.
თუ სიმსუქნის დამალვა გსურთ, შეარჩეით მთლიანი ორმაგი საცურაო კოსტიუმი, რომელსაც შიგნიდან კორსეტის ბადე აქვს ჩაკერებული. საცურაო კოსტიუმის ნაკრებში ხშირად შედის ნაირ-ნაირი პარეო, რომლებიც დაგეხმარებათ, არაჩვეულებრივად მომხიბვლელი გამოჩნდეთ როგორც დღისით, ზღვის სანაპიროზე, ისე საღამოს, საცურაო აუზთან.
თუ გარუჯვა გსურთ, გირჩევთ მოდელს, რომელიც მაქსიმალურად აშიშვლებს სხეულს. თუ იდეალური ფორმებით ვერ დაიკვეხნით, აირჩიეთ კლასიკური ფორმის საცურაო კოსტიუმი, ოღონდ ისეთი ქსოვილისა, რომელიც ატარებს ულტრაიისფერ სხივებს - ნამზეური თანაბარი გამოვა.
თუ მზის სხივებისადმი მგრძნობიარე ბრძანდებით, შეგიძლიათ შეიძინოთ უკანასკნელი გამოგონება - თავისებური სტილის ბიკინი, რომელიც ერთი ტონის ქსოვილისგან არის დამზადებული და განსაზღვრული ოდენობის კალორიის შთანთქმისას მუქი ლაქები უჩნდება. ეს მიგანიშნებთ, რომ უკვე მეტისმეტად ბევრი დრო გაატარეთ სანაპიროზე. საცურაოდ მთლიანი კოსტიუმი სჯობს. ის მოხერხებულად ადგას სხეულს.
ყოველი გაცურვის შემდეგ სამოსი აუცილებლად გაავლეთ ჩვეულებრივ წყალში. წინააღმდეგ შემთხვევაში ქსოვილი დაკარგავს დრეკადობას და ფერს.
ავტორი ნანა კალანდაძე
