ტემპერამენტი, ტემპერამენტი - მკურნალი.გე

ენციკლოპედიაგამომთვლელებიფიტნესიმერკის ცნობარიმთავარიკლინიკებიექიმებიჟურნალი მკურნალისიახლეებიქალიმამაკაციპედიატრიასტომატოლოგიაფიტოთერაპიაალერგოლოგიადიეტოლოგიანარკოლოგიაკანი, კუნთები, ძვლებიქირურგიაფსიქონევროლოგიაონკოლოგიაკოსმეტოლოგიადაავადებები, მკურნალობაპროფილაქტიკაექიმები ხუმრობენსხვადასხვაორსულობარჩევებიგინეკოლოგიაუროლოგიაანდროლოგიარჩევებიბავშვის კვებაფიზიკური განვითარებაბავშვთა ინფექციებიბავშვის აღზრდამკურნალობასამკურნალო წერილებიხალხური საშუალებებისამკურნალო მცენარეებიდერმატოლოგიარევმატოლოგიაორთოპედიატრავმატოლოგიაზოგადი ქირურგიაესთეტიკური ქირურგიაფსიქოლოგიანევროლოგიაფსიქიატრიაყელი, ყური, ცხვირითვალიკარდიოლოგიაკარდიოქირურგიაანგიოლოგიაჰემატოლოგიანეფროლოგიასექსოლოგიაპულმონოლოგიაფტიზიატრიაჰეპატოლოგიაგასტროენტეროლოგიაპროქტოლოგიაინფექციურინივთიერებათა ცვლაფიტნესი და სპორტიმასაჟიკურორტოლოგიასხეულის ჰიგიენაფარმაკოლოგიამედიცინის ისტორიაგენეტიკავეტერინარიამცენარეთა მოვლადიასახლისის კუთხემედიცინა და რელიგიარჩევებიეკოლოგიასოციალურიპარაზიტოლოგიაპლასტიკური ქირურგიარჩევები მშობლებსსინდრომიენდოკრინოლოგიასამედიცინო ტესტიტოქსიკოლოგიამკურნალობის მეთოდებიბავშვის ფსიქოლოგიაანესთეზიოლოგიაპირველი დახმარებადიაგნოსტიკაბალნეოლოგიააღდგენითი თერაპიასამედიცინო ენციკლოპედიასანდო რჩევები

ტემპერამენტი, ტემპერამენტი

ტემპერამენტის ტიპები

თეორია ტემპერამენტთა შესახებ ძველი ბერძენი ექიმის ჰიპოკრატეს სახელს უკავშირდება. მას მიაჩნდა, რომ "ფიზიკური და სულიერი სნეულებების მიმდინარეობას ადამიანის სხეულის შემადგენელი ოთხი ელემენტის პროპორცია განსაზღვრავს". ჰიპოკრატეს აზრით, ტემპერამენტის ტიპი ადამიანის ორგანიზმში არსებული ოთხი სითხიდან ერთ-ერთის სიჭარბეზეა დამოკიდებული. ესენია წითელი და შავი ნაღველი, ცხელი სისხლი, ცივი ლორწო. აღნიშნულის შესაბამისად მან ადამიანთა 4 ტიპი გამოყო.

ქოლერიკი

ბერძ. "ქოლე" - ნაღველი. ნერვული სისტემის ტიპი - ძლიერი, გაუწონასწორებელი, მოძრავი. დადებითი თვისებები - აქტიურობა და ენერგიულობა, სწრაფი აღქმა, გამბედაობა, მიზანსწრაფულობა, კონტაქტში ადვილად შესვლა, დამაჯერებელი საუბარი. უარყოფითი თვისებები - ნერვული სისტემის არასტაბილურობა, თავშეუკავებლობა და ფეთქებადობა, აგრესიულობა, კონფლიქტისკენ მიდრეკილება, წყენის დამახსოვრება, გუნება-განწყობის ხშირი ცვლა, მაღალი თვითშეფასება, მიდრეკილება ავტორიტარიზმისკენ

სანგვინიკი

ბერძ. "სანგვის" - სისხლი. ნერვული სისტემის ტიპი - ძლიერი, გაწონაწორებული, მოძრავი. დადებითი თვისებები - აქტიურობა და მოძრაობა, ახალი პირობებისადმი სწრაფი ადაპტაცია, კეთილგანწყობა, საქმით გატაცება, კომუნიკაბელურობა, სიცოცხლის ხალისი და ოპტიმიზმი, კარგი მეტყველება, მდიდარი მიმიკა და ჟესტები, ავტორიტეტულობა და ლიდერობა. უარყოფითი თვისებები - კონცენტრირების დეფიციტი, არასტაბილურობა და არასანდოობა, გონებაგაფანტულობა, სიტყვის გატეხა, დაუფიქრებელი ქცევა და ქმედებათა შეუთანხმებლობა, მიზანსწრაფულობის დეფიციტი, მონოტონური და ხანგრძლივი სამუშაოს შესრულების უნარის არქონა.

ფლეგმატიკი

ბერძ. "ფლეგმა" - ლორწო. ნერვული სისტემის ტიპი - ძლიერი, გაწონასწორებული, ინერტული. დადებითი თვისებები - სიმშვიდე და კონცენტრირების უნარი, მოთმინება და სტრესისადმი გამძლეობა, სიმშვიდის სიყვარული, განსჯის უნარი, მოვალეობის გრძნობა, შრომის უნარი, მიზანსწრაფულობა და მდგრადობა. უარყოფითი თვისებები - პასიურობა, უმოძრაობა, ინერტულობა, გადაწყვეტილების მიღების უნარის დეფიციტი, სიჯიუტე და კონსერვატორობა.

მელანქოლიკი

ბერძ. "მელას" - შავი, "ქოლე" - ნაღველი. ნერვული სისტემის ტიპი - სტაბილური, გაწონასწორებული, ინერტული. დადებითი თვისებები - ფაქიზი მგრძნობელობა და თანადგომის უნარი, გულისხმიერება და რბილი ხასიათი, ნატიფი აღქმა და კეთილგანწყობა, დავალებების კარგი შესრულება. უარყოფითი თვისებები - უკიდურესი მგრძნობიარობა, მორცხვობა, საკუთარი თავისა და ქმედებებისადმი ეჭვი, დაქვეითებული თვითშეფასება, საკუთარ თავში ჩაკეტილობა, კონტაქტის დამყარების უნარის დეფიციტი, ინერტულობა და ზედმეტი პასიურობა.

მოდი, გავარკვიოთ...

ტემპერამენტი გენეტიკურად განპირობებული თვისებაა, მაგრამ მისი მკვეთრი გამოხატვა მაშინ იწყება, როცა ხდება პიროვნების ჩამოყალიბება სოციალურ გარემოში. სწორედ ამიტომ ტემპერამენტის ტიპის განსაზღვრა მხოლოდ 3-4 წლის ასაკისთვის არის შესაძლებელი. ბუნებით ბოძებული ტემპერამენტის შეცვლა შეუძლებელია, მაგრამ დროთა განმავლობაში, სოციალური გამოცდილების კვალობაზე, ის გარკვეულ ცვლილებას მაინც განიცდის. უმეტესად ეს დაკავშირებულია პროფესიულ საქმიანობასთან, გარემოცვასთან. ცხოვრებისეულ გარემოებათა გავლენით ადამიანი სწავლობს დაფაროს ერთი და გამოავლინოს მეორე თვისება. უნდა გავითვალისწინოთ, რომ სუფთა სახით ესა თუ ის ტიპი იშვიათად გვხვდება. ჩვეულებრივ, ყველა ჩვენგანს აქვს ოთხივე ტიპის თვისებები. მთავარია განვსაზღვროთ, რომელი მათგანი დომინირებს ადამიანში. სწორედ დომინანტური ტემპერამენტის საფუძველზე ხდება ქცევისა და ხასიათის ფორმირება. განსაზღვრა იმისა, რომელი ტემპერამენტია დომინანტური თქვენი შვილისთვის, ძნელი არ არის. საკმარისია გაიხსენოთ მისი ძირითადი თვისებები და ქცევის მანერა. გარკვეულ დახმარებას ფსიქოლოგიური ტესტებიც გაგიწევენ.


ქოლერიკი

მისი მთავარი პრინციპია "მინდა ყველაფერი, თანაც ერთად!" გუნება-განწყობის ხშირი ცვლილება და ემოციური არასტაბილურობა - აი ქოლერიკის მთავარი თვისებები. ადრეულ ბავშვობაში ქოლერიკი ნებისმიერი მიზეზის გამო ყვირის. ზოგჯერ უმიზეზოდაც. ყველაფრის თავიდათავი კი არასტაბილური, გაუწონასწორებელი ნერვული სისტემაა. ქოლერიკი ბავშვები ძიებით არ იღლებიან. მათ ყველაფერი მალე ბეზრდებათ. მათი ფსიქიკა მუდმივად მოითხოვს ახალ შთაბეჭდილებებსა და აღმოჩენებს, რაც იწვევს სწრაფვას მოძრაობისა და აქტიურობისკენ. პატარა ქოლერიკი მუდამ ცელქობს, ონავრობს, თანატოლებთან თამაშიც ხშირად მთავრდება ჩხუბითა და ურთიერთობების გარკვევით. ასეთი ბავშვი ხშირად მიისწრაფვის ლიდერობისკენ და საკუთარ აზრს თავს ახვევს სხვებს, რადგან გულწრფელად მიაჩნია, რომ მხოლოდ მისი აზრია სწორი. ქოლერიკი სწრაფად მეტყველებს, ყლაპავს ცალკეულ სიტყვებს, თუმცა საუბრობს გამართულად, ემოციურად. მოძრაობები მიზანმიმართული აქვს, მკვეთრი, ენერგიული. არ შეუძლია მოთმენა, ლოდინი, ემოციის შეკავება. ახალ ინფორმაციას ადვილად და სწრაფად ითვისებს, მაგრამ მეორე დღესვე ივიწყებს. ადვილად ეგუება ახალ და უჩვეულო გარემოს. ხშირად ღალატობს განსჯის უნარი და უჭირს საკუთარი შესაძლებლობებისა და ძალების სათანადო შეფასება. უყვარს პუბლიკაზე თამაში, გამუდმებით სჭირდება მაყურებლები და მსმენელები, რომელთაგანაც გაგებას და მოწონებას ელის. მარტოობის ჟამს ტირილი და ჭირვეულობა ასეთი ბავშვისთვის უცხოა. მას ნაცნობების ფართო წრე ჰყავს, ზოგიერთ მათგანს ეთამაშება, ზოგიერთთან პრობლემებს განიხილავს, ზოგიერთთან კი სიმპათიის გამო აქვს კონტაქტი. ქოლერიკ ბავშვებს უჭირთ ჩაძინება. ამის მიზეზია ნერვული სისტემის აღგზნება დღის განმავლობაში მიღებული შთაბეჭდილებების გამო. ყოველგვარ სასჯელზე ჩაკეტილობით ან აგრესიით რეაგირებენ.

მშობლების სტრატეგია

მიეცით ბავშვის ენერგიას სწორი მიმართულება, დაეხმარეთ მას საინტერესო ჰობის ან გასართობის პოვნაში. ერიდეთ ბავშვის ნერვული სისტემის ზეაგზნებას. აქტიურ და მოძრავ თამაშებს მშვიდი, ნაკლებემოციური საქმიანობა შეუნაცვლეთ. გამოუმუშავეთ ბავშვს მოთმინება. აუხსენით, რომ აუცილებელია დაწყებული საქმის ბოლომდე მიყვანა. არ შეიძლება ვუყვიროთ და ვუბრძანოთ ბავშვს, ვესაუბროთ უხეშად, გამოვიყენოთ ფიზიკური ძალა. არავითარ შემთხვევაში არ შეიძლება ბავშვის აგრესიისა და მრისხანების პროვოცირება ან სტიმულირება. პირიქით - ასეთ დროს უნდა იყოთ გაწონასწორებული, მშვიდი, უნდა აუხსნათ პატარას, რომ მისი ქცევა სიტუაციას ართულებს. აუცილებლად აგრძნობინეთ ბავშვს, რომ მისი აზრი თქვეთვის ძალიან მნიშვნელოვანია. ბავშვი აუცილებლად უნდა მისდევდეს სპორტს - ცურვას, ჩოგბურთს. ასე მივმართავთ ქოლერიკის დაუოკებელ ენერგიას ფიზიკური განვითარებისკენ, ხოლო ჭარბ აგრესიას - სპორტული შედეგების მიღწევისკენ. ასეთ ბავშვებს მეტი სივრცე სჭირდებათ, ამიტომ ეცადეთ, ხშირად გახვიდეთ ქალაქგარეთ.

სანგვინიკი

მისი მთავარი პრინციპია "მე შენი მჯერა. შენ?" სანგვინიკი ბავშვი კეთილგანწყობილია, ხალსიანი, თუმცა მორჩილიც. სანგვინიკს სწყურია ცვლილებები, შთაბეჭდილებები. ის ადვილად პოულობს ახალ ნაცნობებს, მიისწრაფვის ახალი ადგილების დასალაშქრავად, მოითხოვს ახალ გასართობებს. სანგვინიკის თვალსაჩინო უზრუნველობა ემყარება ბუნებრივ იღბლიანობასა და ნიჭიერებას.  სტატისტიკის თანახმად, ამ ტიპის ადამიანებს შორის ყველაზე მეტია მოგზაური და თავგადასავალთა მაძიებელი. სანგვინიკი ბავშვის ცნობისმოყვარეობა უსაზღვროა. მას იტაცებს ყველაფერი ახალი და უცნობი. ბავშვი მზად არის, ყველაფერი ერთად აკეთოს და ამ დროს ყურადღება არ მიაქციოს ხარისხს. ის ხშირად ტოვებს საქმეს დაუმთავრებელს, თუმცა ადვილად და სწრაფად ითვისებს მიღებულ ინფორმაციას. აქტიურობასა და კეთილგანწყობას მხოლოდ მაშინ ამჟღავნებს, როცა ეს ირგვლივ მყოფებს მოსწონთ. ახასიათებს საკუთარი თავის სიყვარული, ნარცისიზმი. ხშირად სთხოვს მშობლებს, ყველაზე ძვირი და მოდური ტანსაცმელი უყიდონ. არცთუ იშვიათად სანგვინიკები იმას არ ამბობენ, რასაც ფიქრობენ. ეშმაკობა, მატყუარობაც ახასიათებთ. ბავშვი-სანგვინიკი ადვილად მიდის კომპრომისზე, მას არ ეშინია გაურკვევლობისა და სირთულის, ადვილად ივიწყებს წარუმატებლობას. ადვილად ამყარებს ურთიერთობას ნებისმიერ კოლექტივში და ეგუება უჩვეულო სიტუაციას. ეს თვისებები ბავშვს თანატოლთა შორის ლიდერად აქცევს. უფროსები ასეთ პატარებს თავის შვილებს ხშირად უსახავენ მაგალითად. სანგვინიკი მეტყველებს გამოთქმით, სწორად. დასჯაზე ბავშვი მშვიდად რეაგირებს, ის არ არის მიდრეკილი კონფლიქტისკენ. ძალიან ძნელია სანგვინიკის წონასწორობიდან გამოყვანა, მასთან ჩხუბი. სანგვინიკი ბავშვები ადვილად იძინებენ და ღრმად სძინავთ.


მშობლების სტრატეგია

მთავარია, ასწავლოთ ბავშვს დანაპირების შესრულება და სიტყვის ფასი. თვალყური ადევნეთ მის ქცევას, არ დაგეზაროთ მისთვის დაუმთავრებელი საქმეების შეხსენება. აკონტროლეთ დავალებათა შესრულების მსვლელობა, ბავშვის ყურადღება მიმართეთ ქმედებათა ხარისხისა და სიზუსტისკენ. უპოვეთ ბავშვს სასიამოვნო საქმიანობა. სანგვინიკი ბავშვი ძალზე ზომიერად და ფრთხილად უნდა აქოთ. ჭარბი ქება მათ თვითშეფასებას უკიდურესად ზრდის. ნუ ეცდებით, პატარა ბავშვთან მეტისმეტად სერიოზული იყოთ. უპირატესობა მიანიჭეთ მსუბუქი და თანასწორი ურთიერთობის პრინციპს. ეცადეთ, ბავშვს დაუსახოთ კონკრეტული და გასაგები მიზანი. გაითვალისწინეთ: ამოცანის გადაჭრის რამდენიმე ხერხი უნდა არსებობდეს. ბავშვს უნდა ჰქონდეს საშუალება, თავად აირჩიოს მიზნის მიღწევის გზა. ყურადღებით შეურჩიეთ სპორტის სახეობა ან გასართობი. პირველ რიგში, ის თავად ბავშვს უნდა აინტერესებდეს. ოპტიმალურია სპორტის გუნდური სახეობები და თეატრალური წრე.

ფლეგმატიკი

მისი ძირითადი პრინციპია "ყველაფერს გავაკეთებ, ოღონდ მერე!" ფლეგმატურ ბავშვებს სტაბილურობა და სიჯიუტე ახასიათებთ. აზრს პრაქტიკულად ვერ შეაცვლევინებთ. ფელგმატიკი ყოველთვის აუღელვებელი და მშვიდია. სხვა ბავშვების საზოგადოება მისთვის სულაც არ არის აუცილებელი. შეუძლია, თავი მშვენივრად გაირთოს, კარგა ხანს ათვალიეროს წიგნი ან თავისივე თითებით ითამაშოს. საკვებისა და ადგილის ცვლილებისადმი ასეთი ბავშვები კონსერვატიულად არიან განწყობილნი. ისინი ძალიან დიდი ხნის განმავლობაში ეჩვევიან ახალ კერძს, ძნელად იძინებენ ახალ გარემოში. არც საბავშვო ბაღსა და ახალ კოლექტივთან მიჩვევაა მათთვის ადვილი. ფლეგმატური ბავშვები სიტყვაძუნწნი, პასიურნი არიან. უჭირთ სოციალური კონტაქტის დამყარება, დიდი სიფთხილით ირჩევენ მეგობრებს. ფლეგმატური ბავშვების გრძნობები სტაბილურია, მუდმივი, მაგრამ ამავე დროს ზომიერი. ფეთქებადობა, დიდი გატაცება, გაბოროტება, ეჭვიანობა მათ მხოლოდ აბნევთ. ასეთი ბავშვები იმახსოვრებენ ძნელად, მაგრამ საფუძვლიანად. მათთვის დამახასიათებელია შრომისმოყვარეობა, ამტანობა, მიჩვეულნი არიან მონოტონურ და ერთგვაროვან ქმედებებს. არცთუ იშვიათად ასეთ ბავშვებს სკოლაში "მოზეპირეებს" უწოდებენ. ისინი ყველაფერს ნელა და საფუძვლიანად აკეთებენ, ყველა დაბრკოლებას ნელა გადალახავენ ხოლმე. ფლეგმატური ბავშვები არ არიან ლიდერები და პრაქტიკულად არასოდეს იჩენენ ინიციატივას. მათ არ უყვართ მხედველობის არეში ყოფნა და დამოუკიდებელი გადაწყვეტილებების მიღება. ამავე დროს ეს ბავშვები თავიანთ აზრს იცავენ, იშვიათ იცვლიან მას და ხშირად სიჯიუტესაც კი ამჟღავნებენ. ფლეგმატურ ბავშვებს არ უყვართ ტყუილი, თუმცა არც ტაქტით გამოირჩევიან, რის გამოც ხშირად ვარდებიან უხერხულ მდგომარეობაში. საკმაოდ კეთილგანწყობილნი და მშვიდობისმოყვარენი არიან, ცდილობენ არ ჩაერთონ კონფლიქტში და შეძლებისდაგვარად ახერხებენ კიდეც, თავი აარიდონ მას. არ უყვართ კამათი და დისკუსია. ურჩევნიათ, ყველაფრის დასაწყისი და დასასრული გათვალონ. მოსალოდნელი მოვლენისთვის წინასწარ ემზადებიან, თუმცა, ამავე დროს, ცდილობენ, ყველაფერი სამომავლოდ გადადონ. შედეგად ყველაფერს უკანასკნელ წუთებში და სახელდახელოდ აკეთებენ. მათი მეტყველება ნელია, ჩუმი, ჟესტები და მიმიკა - ძუნწი. წინადადებები მარტივია, სიტყვები ხშირად მეორდება. ეპითეტები იშვიათია. ფლეგმატური ბავშვი სწრაფად და მშვიდად იძინებს, მაგრამ უჭირს გაღვიძება. გამოსაფხიზლებლად მას დრო სჭირდება. გამოფხიზლებამდე ჭირვეული და უკმაყოფილოა.

მსობლების სტრატეგია

ფლეგმატური ბავშვის აღზრდისას ორიენტირებული უნდა იყოთ თქვენი შვილისთვის შესაფერის ტემპზე. ჩვეულებრივ, ასეთ ბავშვებს დავალებების შესასრულებლად ცოტა მეტი დრო სჭირდებათ. იყავით მომთმენი, ნუ ააჩქარებთ პატარას, ნუ უყვირებთ. ამავე დროს ნუ შეუწყობთ ხელს იმაში, რომ ყველა საქმე სახვალიოდ გადადოს. თავიდანვე ასწავლეთ დროის რაციონალური გამოყენება. ნუ დაუსახავთ ბავშვს მიზნებსა და ამოცანებს, რომელთა გადაჭრასაც სისწრაფე სჭირდება. ნუ შეაჯიბრებთ მას უფრო აქტიურ ან ასაკით უფროს ბავშვებს. წინააღმდეგ შემთხვევაში შესაძლოა ფსიქოლოგიური ტრავმა მიაყენოთ. არასოდეს გაუბრაზდეთ ბავშვს, განსაკუთრებით - სხვების თანდასწრებით, ზედმეტი სიფრთხილისა და სიდინჯისთვის. წაახალისეთ ბავშვის სწრაფვა ნებისმიერი მოძრავი თამაშისკენ, ფიზიკური გართობისკენ, მცირე წარმატების შემთხვევაშიც კი შეაქეთ. ნუ დაანებებთ პატარას, საათობით აკეთოს ერთი საქმე, შესთავაზეთ, შეისვენოს ან დროებით სხვა საქმეს მოჰკიდოს ხელი. ასწავლეთ ბავშვს დამოუკიდებელი გადაწყვეტილებების მიღება, სიტყვის ფასი და ინიციატივის გამოჩენა. ეცადეთ გამოუმუშაოთ კოლექტივთან ურთიერთობის უნარი - ხშირად ასეირნეთ ეზოში, რათა ბავშვებს ეთამაშოს. სპორტული სექციებიდან უპირატესობა მიანიჭეთ ცურვას, ტანვარჯიშს.


მელანქოლიკი

მისი მთავარი პრინციპია "მე არ ვმხიარულობ, იმიტომ, რომ მოწყენილი ვარ!" მორცხვობა, შიში და ორჭოფობა მისი ხასიათის ძირითადი თვისებებია. ადრეულ ბავშვობაში ეს გამოიხატება ტირილით, შიშით, ერთ ადამიანზე მიჯაჭვულობით. შემდგომ ამას ემატება მორცხვობა, წყენა, მეოცნებეობა... ნერვული სისტემის ძლიერი არასტაბილურობის გამო პატარას ნებისმიერი წვრილმანი აკარგვინებს წონასწორობას. ამ თვისებასთან ბრძოლა, მით უფრო - ამის გამო გაბრაზება კატეგორიულად აკრძალულია! მელანქოლიურ ბავშვთან უნდა იყოთ მშვიდი, ალერსიანი, ყურადღებიანი, აკონტროლებდეთ საკუთარ სიტყვებსა და ქმედებებს. წინააღმდეგ შემთხვევაში შეიძლება ბავშვი აატიროთ. ტირილი ასეთი პატარების მთავარი იარაღია. ნებისმიერ ემოციას, ისტერიკით დაწყებული და უმიზეზო სევდით დამთავრებული, ცრემლები მოსდევს. მელანქოლიურ ბავშვებს განვითარებული აქვთ ხასიათის ემოციური თვისებები, რაც გამოიხატება გულისხმიერებით, თანაგრძნობით, სენტიმენტალობით. ადვილად ღიზიანდებიან და ხანგრძლივად იმახსოვრებენ წყენას. ძლიერი ნერვული სტრესი შეიძლება ავადმყოფობის, მაგალითად, ტემპერატურის, ფაღარათის ან უმადობის მიზეზადაც კი იქცეს. ეს ყოველივეც ნერვული სისტემის არასტაბილურობას უკავშირდება. მელანქოლიურ ბავშვებს ყველაფრის ეშინიათ. ისინი ძნელად შედიან კონტაქტში და ძნელად ადაპტირდებიან ახალ კოლექტივში. არ არიან ლიდერები, ხშირად იკეტებიან საკუთარ თავში და ცდილობენ, შეუმჩნეველნი დარჩნენ. დასჯას ტრაგედიად აღიქვამენ. მცირე ასაკშიც კი ამან შეიძლება ფსიქიკა დაუზიანოთ. მელანქოლიური პატარა ყოველგვარ ცვლილებას მეტისმეტად ფრთხილად ეკიდება. ახალ, არასტანდარტულ სიტუაციაში იბნევა, ცდილობს ჩრდილში დარჩეს. იგივე ემართება კონფლიქტის დროს. მელანქოლიურ ბავშვს უჭირს ახალი ინფორმაციის ათვისება. გონებაგაფანტულია, უჭირს დაწყებულ საქმეზე კონცენტრირება. მელანქოლიურ ბავშვებს ღლით ნებისმიერი საქმიანობა - თამაში, კითხვა, ვარჯიში... სწორედ დაღლილობის გამო ეცვლებათ ხშირად განწყობილება. შესაძლოა მთელი კვირა ელოდეს ზოოპარკში წასვლას, მაგრამ გზაში ისე დაიღალოს, რომ ჭირვეულობა დაიწყოს და სეირნობაზე საერთოდ უარი თქვას. მელანქოლიკების მეტყველება ჩუმია, საკუთარ თავში დაურწმუნებელი, მაგრამ მდიდარი და გამართული. ყოველი მოძრაობა ფრთხილია, თითქოს საცდელი. ასეთი ბავშვები ძალიან ძნელად იძინებენ და გაღვიძებაც უჭირთ. მიუხედავად ასეთი ხასიათისა, მელანქოლიკები ყველაზე შემოქმედებითი და ღრმა პიროვნებები არიან. ისინი მზად არიან, მოისმინონ თქვენი პრობლემები და გულით თანაგიგრძნონ. მელანქოლიურ ბავშვებს ნატიფი გემოვნება და კარგი სმენა აქვთ. მათგან ყალიბდებიან ესთეტები, გურმანები და მუსიკოსები.

მშობლების სტრატეგია

მთავარია, არ აატიროთ. მასთან საუბრისას არ გამოიყენოთ უხეში და დამამცირებელი გამოთქმები, არ გაუბრაზდეთ და უყვიროთ. თქვენი განწყობილება და ხმამაღალი ინტონაცია შესაძლოა პატარას სტრესის მიზეზად იქცეს. ურთიერთობის საუკეთესო ფორმაა სიყვარულის ხშირი გამოხატვა, ყურადღება და მოთმინება, ოჯახური სითბო. ნუ დაიშურებთ ალერსსა და ნაზ სიტყვებს, უმნიშვნელო წარმატებების გამოც კი შეაქეთ. ეცადეთ ხშირად აუხსნათ, რომ სამყარო სულაც არ არის ისეთი მოსაწყენი, როგორიც გვეჩვენება. მიეცით ბავშვს სიცილის საბაბი, ნუ მიაპყრობთ მის ყურადღებას სამწუხარო და ტრაგიკულ ისტორიებს. ნურასოდეს დაუძახებთ მტირალას; არასოდეს უსაყვედუროთ სხვების თანდასწრებით. წაახალისეთ დამოუკიდებლობის ყოველგვარი გამოვლინება, აქტიური ქმედებისა და დამოუკიდებელი გადაწყვეტილების მიღების მცდელობა. ხშირად მიეცით ბავშვს მარტივი, ადვილად შესასრულებელი დავალებები. სასწავლო პროგრამის შერჩევისას პირველ რიგში ყურადღება მიაქციეთ პატარას მაღალ ინტელექტუალურ შესაძლებლობებს, მის შრომისმოყვარეობას. ნაკლებსავარაუდოა, რომ ბავშვი წარმატებული სპორტსმენი გახდეს, ამიტომ ნებისმიერი ვარჯიში ისე უნდა შეირჩეს, რომ ბავშვი არ გადაიღალოს. მელანქოლიური ბავშვებისთვის ყველაზე შესაფერისია მუსიკა და მხატვრული წრე.