თინათინ ქორიძე

ხალხში ყველაზე პოპულარული ჯიშებია გოლდენი, ცარსკი, ანტონოვკა, ივერია, სტარტი, თუმცა ბოლო ხანს შემოვიდა ახალი ჯიშებიც, რომლებიც ასევე ძალიან მოსწონთ. მაგალითად აიდარიდი, რომელსაც მოტკბო-მომჟავო გემო აქვს. ბავშვებისთვის საუკეთესოდ მიიჩნევა ანტონოვკის ჯიშის ვაშლი. მას აქვს სასიამოვნო არომატი და ნაზი მომჟავო-მოტკბო გემო. ორგანული მჟავა მასში უფრო მეტია, ვიდრე წითელ ვაშლში. ეს მჟავები ასუფთავებს სისხლძარღვის კედლებს და აუმჯობესებს გულის მდგომარეობას, ამასთან, აქვს შარდმდენი ეფექტიც და, რაც მთავარია, ერთნაირად მისაღებია ბავშვებისთვისაც და უფროსებისთვისაც. კარგია ბანანიც.

- როგორ ჯობს ვაშლის მიცემა - უმად თუ ჩაშუშული სახით?

- ბავშვი რაც შეიძლება ადრეული ასაკიდან შეაჩვიეთ ვაშლის გემოს. თავდაპირველად შეურჩიეთ ნაზი, რბილი, მოტკბო, წვნიანი, არომატული ჯიშის ვაშლი. მასში ბევრია სასარგებლო შაქრები, კალიუმისა და რკინის მარილები, რომელიც ხელს უწყობს სისხლის წარმოქმნას და გულის მუშაობას. ჩ ვიტამინი ვაშლში ცოტაა. სამაგიეროდ, ეს ხილი განთქმულია პექტინით. მცენარეული საკვებიდან ყველაზე მეტს სწორედ ვაშლი შეიცავს. პექტინი უჯრედის კედლის მშენებლობაში მონაწილეობს. გარდა ამისა, უხდება საჭმლის მონელებას. ამიტომაცაა ერთადერთი ხილი, რომლის მიღებაც ნებადართულია ნაწლავური ინფექციების დროს. მოთუთქული ვაშლი შესანიშნავი სამკურნალო საშუალებაა. მისი მიღება შეიძლება ნაწლავთა ყოველგვარი დაავადების, ასევე - ქრონიკული პანკრეატიტის, ქოლეცისტიტის, ჰეპატიტის დროს. მოთუთქული ვაშლისგან სხვადასხვა დესერტის მომზადებაა შესაძლებელი. მას შეიძლება დავუმატოთ ქიშმიში, ბანანი (რომელიც ასევე ძალიან უხდება კუჭ-ნაწლავის ტრაქტის დაავადებებს), ხაჭო და სხვა ნატურალური პროდუქტები.

გთავაზობთ რამდენიმე მარტივ რეცეპტს:

ვაშლის სიურპრიზი

საჭიროა:

• 6 ცალი საშუალო ზომის ვაშლი;
• 6 ჩაის კოვზი თაფლი;
• 5-6 სუფრის კოვზი შავი მოცხარის ან ალუბლის მურაბა;
• 2 სუფრის კოვზი გატარებული თხილი.

გარეცხილი ვაშლი კანიანად გაჭერით ორად, ამოაცალეთ გული, ჩააწყვეთ ჭურჭელში, ღრმული ამოავსეთ თაფლითა და თხილით. ზემოდან მოასხით მურაბა და 15 წუთით შედგით ღუმელში.

ვაშლის სალათა

საჭიროა:

• 2 საშუალო ზომის მჟავე ვაშლი;
• 1 საშუალო ზომის სტაფილო;
• 1 კონა მწვანე სალათა;
• 1 ცალი კიტრი;
• 1 ცალი ლიმონი;
• 2 სადილის კოვზი ზეთი;
• მწვანე ხახვი, ოხრახუში, კამა.

მსხვილად გახეხეთ ვაშლი და სტაფილო, კუბიკებად დაჭერით კიტრი, ხელით დააქუცმაცეთ სალათის ფურცლები, წვრილად დაკეპეთ მწვანილი, აურიეთ ერთმანეთში ხის კოვზით, გემოვნებისამებრ დაუმატეთ მარილი, მცენარეული ზეთი და მოასხით ლიმონის წვენი. მიირთვით წელიწადის ნებისმიერ დროს, განსაკუთრებით კი ზამთარში. ვიტამინებით მდიდარი ეს სალათა ზამთრის მენიუს გაგიფერადებთ.