შეიმუშავეს საკვერცხეების კიბოს საწყისი სტადიის სადიაგნოსტიკო ტესტი - მკურნალი.გე

ნინო ჩარგეიშვილი

• .ახალ მეთოდს 99%-იანი სიზუსტით შეუძლია კიბოს ადრეულ სტადიაზე დიაგნოსტირება.

ტესტი ეფუძნება მცირედი ოდენობის სისხლის შრატში ექვსი ცილა-ბიომარკერის კონცენტრაციის განსაზღვრას. გამოკვლევის ხელმძღვანელმა გილ მორმა აღნიშნა, რომ ეს ცილები ადამიანის ორგანიზმში აღმოცენებულ სიმსივნეზე საპასუხოდ გამომუშავდება ან თავად სიმსივნური წარმონაქმნის მიერ პროდუცირდება. მისივე თქმით, აქამდე არსებული ტესტები მხოლოდ სიმსივნური ცილის განსაზღვრას ეფუძნებოდა, ხოლო მათი სიზუსტე 15-20%-ს არ აღემატებოდა.

გამოცდაში 500-მა ქალმა მიიღო მონაწილეობა. აქედან 150-ს საკვერცხეების კიბო ჰქონდა. ტესტის შედეგები არა მარტო მკვლევარებმა, არამედ ამერიკის კიბოს ნაციონალური ინსტიტუტის ექსპერტებმაც შეაფასეს.

მორი და მისი კოლეგები უკვე შეუდგნენ ტესტის გამოცდის მესამე ფაზას - კლინიკურ გამოცდას 2000 პაციენტის მონაწილეობით. "ვიმედოვნებთ, ეს ტესტი იმ სტანდარტული სამედიცინო გამოკვლევების გვერდით დაიმკვიდრებს ადგილს, რომლებსაც ექიმები ქალებს ზოგადი გამოკვლევის მიზნით უტარებენ", - განაცხადა მორმა.