News
კანადელმა მეცნიერებმა რძის იდეალური ნორმა გამოთვალეს. თურმე 2-დან 5 წლამდე ასაკის ბავშვები ყოველდღე უნდა იღებდნენ 500 მლ ძროხის რძეს. პედიატრი ჯონათან მაგირი, რომელმაც კოლეგებთან ერთად 1311 ბავშვი გამოიკვლია, აღნიშნავს, რომ რძის არასათანადო რაოდენობით მიღებამ შესაძლოა ორგანიზმში D ვიტამინის დეფიციტი გამოიწვიოს, ხოლო ჭარბმა - რკინისა, რაც, თავის მხრივ, ანემიას, კოგნიტური უნარის დაქვეითებას, დაღლილობისა და სისუსტის შეგრძნებას, იმუნიტეტის დაქვეითებას, ფარისებრი ჯირკვლის ჰორმონის გამომუშავების შემცირებას იწვევს. მკვლევრები აღნიშნავენ, რომ დროთა განმავლობაში ეს ეფექტები უფრო მკვეთრად წარმოჩნდება.
აუხსნელი უნაყოფობის მიზეზი
ბელფასტის სამეფო უნივერსიტეტის მეცნიერთა ჯგუფმა გამოიკვლია აუხსნელი მიზეზით გამოწვეული უნაყოფობის დიაგნოზის მქონე 239 წყვილი (ასეთ დიაგნოზს უსვამენ თითქმის ყოველ მესამე უნაყოფო წყვილს) და დაადგინეს, რომ ათიდან 8 შემთხვევაში პრობლემის მიზეზი სპერმაში დნმ-ს დაზიანება იყო. საბედნიეროდ, ეს გადახრები ადვილი აღმოსაჩენია, რაც მედიკოსებს ამოცანას უადვილებს. ამჟამად მეცნიერები ისეთი ტესტის შექმნას ცდილობენ, რომელიც ნებისმიერ ადამიანს განუსაზღვრავს უნაყოფობის მიზეზს. ტესტს ჩინეთში გამოცდიან.
დანდის უნივერსიტეტის რეპროდუქციული მედიცინის სპეციალისტს, პროფესორ კრისტოფერ ბარატს მიაჩნია, რომ კლინიკების უმრავლესობა უარს იტყვის ასეთი ტესტის ჩატარებაზე, ვინაიდან არ ეცოდინებათ, რა მოუხერხონ შედეგებს.