News
მეცნიერებმა აღმოაჩინეს, რომ ხელოვნურად შექმნილ საკვერცხეს შეეძლო კვერცხუჯრედების ბოლომდე (ანუ განაყოფიერებისთვის მზადყოფნამდე) მომწიფების უზრუნველყოფა, რამაც დაადასტურა, რომ მას სრულფასოვნად ფუნქციონირების უნარი შესწევს. ექსპერიმენტის ავტორებმა განაცხადეს, რომ მათ მიერ შექმნილი საკვერცხე არ არის გათვალისწინებული ქალის ორგანიზმში გადასანერგად, - მათ განზრახული აქვთ ხელოვნური საკვერცხის გამოყენება საკვერცხეების მუშაობის შესასწავლად ნორმაში და სხვადასხვა გარეგანი ფაქტორის ზემოქმედების ფონზე. მომავალში კი, მკვლევართა ვარაუდით, ხელოვნური ორგანო შეიძლება გამოყენებულ იქნეს იმ ქალების კვერცხუჯრედების შესანახად, რომლებიც სხივურ თერაპიას ან ქიმიოთერაპიას იტარებენ.
ახალი პრეპარატი პროსტატის კიბოთი დაავადებულ უიმედო პაციენტებს სიცოცხლეს გაუხანგრძლივებს
მეცნიერებმა მიაგნეს წამალს, რომელიც პროსტატის კიბოს უკანასკნელ სტადიაში მყოფ პაციენტებს სიცოცხლეს გაუხანგრძლივებს - პრეპარატ კაბაზიტაქსელს შეუძლია, მათ 2 წლის სიცოცხლე აჩუქოს. კაბაზიტაქსელი დიდი ბრიტანეთის კიბოს კვლევის ინსტიტუტისა და ღოყალ Mარსდენ-ის კლინიკის მეცნიერებმა შეიმუშავეს. მის გამოკვლევაში მონაწილეობა მიიღო 26 ქვეყნის მკვიდრმა 755-მა მამაკაცმა. სამწუხაროდ, გამოკვლევამ აჩვენა, რომ კაბაზიტაქსელს აქვს მძიმე გვერდითი ეფექტები, რადგან მისი გავლენით მცირდება ინფექციასთან მებრძოლი სისხლის თეთრი ბურთულების რაოდენობა. გარდა ამისა, მან შესაძლოა დაღლილობა, გულისრევა და ღებინებაც გამოიწვიოს. მიუხედავად ამისა, კაბაზიტაქსელი უახლოეს მომავალში მიიღებს ლიცენზიას და ევროპაში გაყიდვის უფლებას.
სტრესი ძუძუს კიბოს განვითარებას აჩქარებს
მეცნიერებს მიაჩნიათ, რომ მუდმივი შფოთვა და გაღიზიანება სარძევე ჯირკვლის კიბოს უჯრედებისთვის ერთგვარი "სასუქია". კალიფორნიის უნივერსიტეტის (აშშ) მკვლევართა ჯგუფმა დაამტკიცა, რომ ქრონიკული სტრესი საგრძნობლად აჩქარებს სარძევე ჯირკვლის კიბოს განვითარებას, რომელსაც გავრცელების მიხედვით ისედაც მეორე ადგილი უკავია ონკოდაავადებებს შორის. მეცნიერებმა ცდები ჩაატარეს თაგვებზე, რომლებიც მუდმივი ძლიერი სტრესის ზემოქმედების ქვეშ ჰყავდათ. აღმოჩნდა, რომ რაც უფრო ძლიერი იყო სტრესი, მით უფრო მაღალი იყოს კიბოს სწრაფად პროგრესირების ალბათობა. აღსანიშნავია, რომ კიბოს უჯრედების გავრცელების სიჩქარე 30-ჯერ გაიზარდა. მეცნიერებმა განმარტეს, რომ სტრესი ცვლის იმუნური სისტემის უჯრედების ბიოლოგიას და ისინიც, ნაცვლად იმისა, რომ ორგანიზმში დამცავი ფუნქცია შეასრულონ, დაავადების შორეულ ორგანოებში გავრცელებას უწყობენ ხელს, ანუ ქრონიკული სტრესი იწვევს კიბოს უჯრედების დაშორებას პირველადი კერისგან და კოლონიზაციას სხვა ორგანოებში, რაც უფრო მეტად აძნელებს კიბოს მკურნალობას.
თირკმელების ცუდი მუშაობა შესაძლოა გულის დაავადებაზე მიუთითებდეს
მეცნიერებმა დაასკვნეს, რომ თირკმელების ცუდი მუშაობა გულის დაავადებისა და ინსულტის სიგნალია. ასეთია იმ ორი გამოკვლევის შედეგი, რომელთაგან პირველი ამერიკელმა და თურქმა მეცნიერებმა ჩაატარეს, მეორე კი ბრიტანელ და ისლანდიელ მკვლევართა ჯგუფმა. პირველმა ჯგუფმა ევროპასა და აზიაში მცხოვრები 280 000-ზე მეტი ადამიანი გამოიკვლია და დაადგინა კავშირი თირკმელში არასაკმარისი რაოდენობის სითხის გავლასა და ინსულტის განვითარების მაღალ რისკს შორის. ამასთანავე, აზიელებს რისკი ევროპელებზე მაღალი აღმოაჩნდათ. მეორე გამოკვლევამ, რომელშიც 17 000 მოხალისე მონაწილეობდა, ცხადყო, რომ გულის იშემიური დაავადების განვითარების მაღალი რისკი თირკმლის დაავადების ადრეულ სტადიაშიც კი არსებობს. ამრიგად, - მიაჩნიათ მკვლევრებს, - თირკმლის ქრონიკული დაავადებები შეიძლება გულ-სისხლძარღვთა დაავადების რისკფაქტორად იქნეს განხილული. თირკმელების მუშაობის გასაუმჯობესებლად მეცნიერები ქოლესტერინის დონის დასაქვეითებელი პრეპარატების მიღებას გვირჩევენ.
ისრაელში აივ-ინფექციის მკურნალობის რევოლუციური მეთოდი შეიმუშავეს
ებრაული უნივერსიტეტის მეცნიერთა ჯგუფმა აივ-ინფექციასთან ბრძოლის კუთხით უდიდესი ნაბიჯი გადადგა: ვირუსის დამთრგუნველი საშუალებების ძებნის ნაცვლად მისი გამრავლების სტიმულირება მოახდინა. შედეგად უჯრედი, რომელიც ვირუსის აკვანი უნდა გამხდარიყო, მის სამარედ იქცა და მასთან ერთად დაიღუპა. მკვლევართა ჯგუფის ხელმძღვანელი ამბობს, რომ ახალი მეთოდი 100%-ით ამართლებს. მეთოდი უჯრედის დნმ-ში ვირუსის იმპლანტაციის სტიმულირებას ეფუძნება. ჩვეულებრივ პირობებში ვირუსი დაზიანებული უჯრედის დნმ-ში თავის 2-3 ასლს ნერგავს, ებრაელმა მეცნიერებმა კი ვირუსს 15 მსგავსი ასლის შექმნა აიძულეს, რამაც აპოპტოზის - უჯრედის თვითგანადგურების - მექანიზმი ჩართო. აღსანიშნავია, რომ ვირუსის გამრავლების მასტიმულირებელი პრეპარატი უჯრედებისთვის უვნებელია. უახლოეს მომავალში მეცნიერები ახალ მეთოდს მღრღნელებზე გამოცდიან.
ვეგეტარიანელობა იმპოტენციას იწვევს
კვების რაციონიდან ხორცის გამორიცხვამ შეიძლება ერექციული დისფუნქცია გამოიწვიოს, რადგან მცენარეული საკვები არ შეიცავს ცხიმებს, რომლებიც აუცილებელია მამაკაცის სასქესო ჰორმონის - ტესტოსტერონის გამოსამუშავებლად. ასეთი დასკვნა გამოიტანეს სექსოლოგებმა გამოკვლევის საფუძველზე, რომელშიც რამდენიმე ათასმა შუახნის მამაკაცმა მიიღო მონაწილეობა. ამასთანავე, გამოკვლევის ხელმძღვანელი ამტკიცებს, რომ დაუბალანსებელმა დიეტამ, რომელიც მხოლოდ მცენარეული კომპონენტებისგან შედგება, შესაძლოა რკინის უკმარისობაც გამოიწვიოს. საქმე ის არის, რომ კვების ვეგეტარიანული პრინციპების მიმდევრები ხშირად იყენებენ ყურძნისა და მწვანე ჩაის ექსტრაქტების შემცველ საკვებ დანამატებს, ეს ექსტრაქტები კი პოლიფენოლების ძლიერი წყაროა - პენსილვანიის უნივერსიტეტში ჩატარებულმა გამოკვლევამ ცხადყო, რომ პოლიფენოლები ეწებებიან რკინის მოლეკულებს და ნაწლავებიდან მათ შეწოვას აფერხებენ, ამიტომ რკინა ორგანიზმისათვის უსარგებლო ხდება.
C ვიტამინი განწყობას აუმჯობესებს
მონრეალში არსებული ევროპის მთავარი ჰოსპიტლისა და ლედი დევისის სამედიცინო კვლევითი ინსტიტუტის მეცნიერთა მიერ ჩატარებულმა გამოკვლევებმა აჩვენა, რომ ც ვიტამინი მწოლიარე პაციენტების განწყობაზე დადებით გავლენას ახდენს. ექსპერიმენტის დროს პაციენტებს 7-10 დღის განმავლობაში არჩევითად აძლევდნენ ც და დ ვიტამინების შემცველ დანამატებს. შედეგად აღმოაჩინეს, რომ ავადმყოფები, რომლებიც ც ვიტამინს იღებდნენ, გაცილებით უკეთეს გუნებაზე იყვნენ. სტატისტიკის თანახმად, გადაუდებელი სამედიცინო დახმარების განყოფილებაში მოხვედრილი პაციენტების უმრავლესობას ც ვიტამინის კრიტიკულად დაბალი დონე აქვს. ამგვარი ავიტამინოზი ნეგატიურად მოქმედებს ავადმყოფის საერთო მდგომარეობაზე, აფერხებს მკურნალობის ეფექტს და ახანგრძლივებს ავადმყოფობისა და ოპერაციის შემდგომ აღდგენით პერიოდს. ყურადსაღებია ისიც, რომ საავადმყოფოს პირობებში პაციენტი იშვიათად იღებს ვიტამინიან დანამატებს. ასევე ცნობილია, რომ ც და დ ვიტამინების უკმარისობა ფსიქოლოგიურ დარღვევებს უკავშირდება. ამ გარემოებათა გათვალისწინებით, მეცნიერები გვირჩევენ ავადმყოფობის დროს მივიღოთ ვიტამინებიანი დანამატები, რადგან ეს განწყობის გამოკეთების უმარტივესი გზაა.