ღეროვანი უჯრედების გადანერგვისა და ჭიპლარის სისხლის კომბინაცია - მეთოდი, რომლის მეშვეობითაც, ისტორიაში პირველად, ქალი შიდსის ვირუსისაგან განიკურნა
ამერიკელ მკვლევართა გუნდის განცხადებით, მათ პირველად შეძლეს შიდსის ვირუსით ინფიცირებული ქალბატონის განკურნება ღეროვანი უჯრედების გადანერგვის გზით.
აღნიშნულ შემთხვევაში ზრდასრული ადამიანის ღეროვანი უჯრედებისა და ჭიპლარის სისხლის კომბინაცია წარმატებული აღმოჩნდა. აქამდე აივ-ინფექციისაგან მხოლოდ 3 პაციენტი იყო განკურნებული.
როგორც ინფექციურ დაავადებათა კონფერენციაზე განაცხადეს, ღეროვანი უჯრედების გადანერგვისა და ჭიპლარის სისხლის დახმარებით, ქალი სრულიად განიკურნა.
აღსანიშნავია ისიც, რომ მას შიდსით ინფიცირების შემდეგ ლეიკემიის დიაგნოზიც დაუსვეს. სწორედ აღნიშნული დაავადებისაგან განკურნების მიზნით, მას ღეროვანი უჯრედები გადაუნერგეს და ჭიპლარის სისხლიც გამოიყენეს. მკურნალობის უახლესი მეთოდის მეშვეობით კი რემისია განიცადა არა მხოლოდ სისხლის კიბომ, არამედ აივ-ინფექციამაც. ძვლის ტვინის გადანერგვისას ხშირად ორგანიზმი უცხო სხეულის მიუღებლობას გამოხატავს, აღნიშნული გვერდითი ეფექტი ამ შემთხვევაში არ გამოვლენილა.
როგორც უკვე აღვნიშნეთ, ქალს ზრდასრული ადამიანის ღეროვანი უჯრედები გადაუნერგეს, კერძოდ ნათესავის. რაც შეეხება ჭიპლარის სისხლს, ის სისხლის ბანკიდან აიღეს. დონორის სისხლში იშვიათი მუტაცია ფიქსირდებოდა, რომელიც შიდსის მიმართ იმუნურ სისტემას აძლიერებს.
თავდაპირველად, აივ-ინფექცია T უჯრედებისთვის შეუმჩნეველი რჩებოდა, გადანერგვიდან 37 კვირაში კი ქალმა ანტირეტროვირუსული მკურნალობა ანუ აივ-ინფექციის სამკურნალო პროცედურები შეწყვიტა. ოპერაციიდან 100 დღის შემდეგ მას პრაქტიკულად ახალი იმუნური სისტემა ჰქონდა. ქალს მკურნალობიდან 14 თვის შემდეგაც კი ორგანიზმში აივ-ინფექციის არანაირი კვალი აღარ აქვს.
