ვირუსმა ინდონეზიელი ადამიან-ხედ აქცია
გიგანტურმა მეჭეჭებმა ინდონეზიელის კიდურების საშინელი დეფორმაცია გამოიწვია. მისი მტევნები და ტერფები ტროპიკული მცენარეების ერთმანეთში გადახლართულ ფესვებს დაემსგავსა. მეთევზეს, სახელად დედეს, ეს უცნაური დაავადება ბავშვობაში შეეყარა. ადგილობრივმა ექიმებმა უცნაური წარმონაქმნების მიზეზის დადგენა ვერ შეძლეს. პათოლოგიური პროცესის შეჩერებაზე ხომ ფიქრიც ზედმეტი იყო.დედეს ავადმყოფობამ მუშაობის უნარი წაართვა. ცოლიც გაექცა და ახლა ორ შვილს მარტო ზრდის. მათ სარჩენად ყოფილი მეთევზე იძულებული გახდა, მოხეტიალე ცირკში მოწყობილიყო და ხალხი თავისი გონჯი სხეულის ცქერით გაერთო. ინდონეზიელის ბედი რადიკალურად შეცვალა ჟურნალისტთან შეხვედრამ. მის დაავადებაზე ტელეარხ Dicovery-მ საინტერესო სიუჟეტი მოამზადა და დედე საქვეყნოდ ცნობილი გახადა. ამ სიუჟეტის შემდეგ უცნაური პაციენტის მკურნალობა მერილენდის უნივერსიტეტის დერმატოლოგმა ენტონი გასპარიმ მოინდომა. დედეს სხეულზე გაჩენილი უცნაური წარმონაქმნების ანალიზმა აჩვენა, რომ დაავადების მიზეზი ადამიანის პაპილომავირუსია, რომელიც, ჩვეულებრივ, პატარა მეჭეჭებს აჩენს. გასპარის აზრით, ინფექციის შეუფერხებელი გავრცელების მიზეზად იქცა გენეტიკური მუტაცია, რამაც ავადმყოფის ორგანიზმის ანტივირუსული დაცვის მექანიზმი დაარღვია. ამ მუტაციის ხასიათის გამოაშკარავებისთვის საჭიროა გენეტიკური ანალიზი, რომელიც ამერიკულ ლაბორატორიებში ტარდება. გასპარს გადაწყვეტილი აქვს, დედე რამდენიმე თვეში დაუბრუნოს ნორმალურ ცხოვრებას. წანაზარდების უმრავლესობა მოყინვის მეთოდით უნდა განადგურდეს, დიდი მეჭეჭები ქირურგიული წესით მოიკვეთება. გარდა ამისა, მკურნალობის პროცესში პაციენტი მიიღებს A ვიტამინის დარტყმით დოზებს - A ვიტამინი პაპილომავირუსული ინფექციისადმი ორგანიზმის წინააღმდეგობის უნარს ზრდის. "მის სხეულს ძველებური იერი ვერ დაუბრუნდება, მაგრამ მეჭეჭები იმდენად შემცირდება, რომ დედე თავისუფლად შეძლებს კიდურების ხმარებას", - განაცხადა გასპარიმ.