ქორწინების საკითხი
როგორ ვიქორწინოთ ლამაზ, ჭკვიან და მდიდარ ქალზე
ცნობილი აფორიზმის თანახმად, თუ გსურთ, შეირთოთ ჭკვიანი, ლამაზი და მდიდარი ქალი, სამჯერ მოგიხდებათ ცოლის მოყვანა. როდესაც საცოლის არჩევას იწყებს, მამაკაცი ადგენს იმ კრიტერიუმების ჩამონათვალს, რომლებსაც უნდა აკმაყოფილებდეს მისი რჩეული. ხშირად ის, ვის მიმართაც მამაკაცს ნაზი გრძნობები ამოძრავებს, ცუდი მზარეულია, არ შეუძლია, ყოველდღე ალაგოს სახლი და არც ბავშვის ტირილი აღაფრთოვანებს. გამოსავალი ასეთია: შეირთეთ კარგი მეოჯახე, სიყვარულით კი შეგიძლიათ, ვინც გინდათ, ის გიყვარდეთ.
იდეალის ძიებაში
ბევრი მთელი სიცოცხლე იდეალს ეძებს. მერე რა, თუ გამოცდილებამ დაამტკიცა, რომ იდეალი არ არსებობს... ზოგიერთი იდეალს ვერ პოულობს და სიცოცხლის ბოლომდე კენტად რჩება, ზოგი კი პოულობს, მაგრამ არანაკლებ ძლიერი იმედგაცრუება ელის - "იდეალს" სხვა უყვარს ან უკვე გათხოვი-ლია. ასეთ დროს მამაკაცი ხშირად დგამს დაუფიქრებელ ნაბიჯს და ირთავს ქალს, რომელიც არ უყვარს.
მზითვიანი საპატარძლო
კიდევ ერთ ცნობილ გამოთქმას თუ მოვიხმობთ, ოჯახს პირველად სიყვარულით ქმნიან, მეორედ - ანგარებით, ხოლო მესამედ ტრადიციას არ ღალატობენ. ჩვენს ფინანსურად არასტაბილურ დროში, როდესაც პროდუქტებზე, საწვავზე, უძრავ ქონებაზე ფასები კატასტროფულად იზრდება, მამაკაცებს ძალიან სჭირდებათ ხვალინდელი დღის რწმენა და სტაბილურობის განცდა. ანგარებით ქორწინებისას მხოლოდ ფინანსური მხარე როდია ანგარიშგასაწევი - გათვლა ხდება უფრო მაღალ მატერიებზე, კერძოდ, ძალაუფლებაზე, კარიერაზე, საზოგადოებრივ მდგომარეობაზე და ცოლის მზითევთან ერთად მიღებულ პრივილეგიებზე. ძნელია, ასეთ ცდუნებას გაუძლო, თუნდაც მომავალი მეუღლე სოკრატეს ცოლზე გონჯი და ანჩხლი იყოს.
ცოლიანი მამაკაცები უფრო მეტხანს ცოცხლობენ
ვიდრე მამაკაცი დაქორწინდება, ცოლიანებს ალმაცერად უყურებს და ჰგონია, რომ გამოთქმა მათი სიცოცხლის ხანგრძლივობის შესახებ დაოჯახებულთა მოგონილია. ყოველი ნორმალური მამაკაცი ოცნებობს ოჯახის შექმნაზე, სურს, შვილთან ერთად გაატაროს უქმეები, მიირთვას მეუღლის მომზა-დებული კერძები. სამწუხაროდ, ეს მშვიდი ბედნიერება ბევრისთვის ოცნებად რჩება. ეს იმიტომ, რომ ყმაწვილობაში ლანდებს დასდევენ, ახალგაზრდობაში დროს ატარებენ, მოწიფულ ასაკში შეცდომის თავიდან ასაცილებლად ყველაფერს მიკროსკოპით აკვირდებიან, მერე კი... აღმოაჩენენ ხოლმე, რომ ირგვლივ ყველას უკვე აქვს თავისი ბუდე, და ეს აიძულებთ, გადაწყვეტილება სწრაფად მიიღონ. ბევრიც, უბრალოდ, ნათესავ-მეგობრების გაუთავებელ ჩიჩინს ვეღარ უძლებს და ლამის პირველივე შემხვედრს ირთავს ცოლად.
სხვა მიზეზები
ზოგჯერ მამაკაცს ცხოვრების რიტმის შეცვლის, რაღაც ახლის მოსინჯვის სურვილი უჩნდება. ზოგიერთს მარტოობის, სიბერის შიში ეუფლება. ასეთი ქორწინება ხშირად განქორწინებით სრულდება, თუ ცოლ-ქმარს შორის არ არის გრძნობა, ურთიერთგაგება, ურთიერთპატივისცემა და თანადგომა. მხოლოდ ასეთი ოჯახი იქნება მყარი და ერთიანი და ბავშვებიც ჯანსაღ გარემოში გაიზრდებიან.