ლალი ჩხიკვაძე

რატომ ჩაიზრდება თმა?

არასასურველი თმის ყოველი მოშორების შემდეგ თმის ღერი უფრო და უფრო თხელდება და უფრო და უფრო ძნელად ამოდის კანიდან. გარდა ამისა, თმას, წესისამებრ, ვიშორებთ ზრდის საპირისპირო მიმართულებით და ამით ვცვლით მისი ზრდის კუთხეს, რაც ასევე უწყობს ხელს ჩაზრდას. თმის ჩაზრდის თავიდან ასაცილებლად საკმარისია რამდენიმე რჩევის გათვალისწინება:

• პროცედურის დაწყებამდე საჭიროა კანის ცხელ წყალში დალბობა. შეიძლება გვირილისნაყენიანი აბაზანის მიღება - ის დაამშვიდებს კანს და მომდევნო ეტაპისთვის მოამზადებს.
• შემდეგ კანს მკვდარი შრე უნდა მოვაშოროთ. ამისთვის გამოგვადგება სქრაბი, რომელიც შეიძლება შევიძინოთ ან თავად მოვამზადოთ შინ: ახალმოდუღებული ყავის ნალექს შევურიოთ ნებისმიერი შხაპის გელი და 1 სუფრი კოვზი ზეითუნის ზეთი. სქრაბად ასევე შეიძლება გამოვიყენოთ ზღვის მარილი, რომელსაც დავუმატებთ რამდენიმე წვეთ ჩაის ხის ზეთს.

ამ პროცედურების შემდეგ კანი მზადაა თმის მოსაშორებლად. თუ პარსვას ხართ შეჩვეული, საპარსისთვის ფულს ნუ დაზოგავთ. ის ბასრი და მჭრელი უნდა იყოს. კანის გაღიზიანება მინიმუმამდე რომ შეამციროთ, საპარსს რამდენჯერმე ნუ გადაიტარებთ ერთსა და იმავე ადგილზე. პროცედურის შემდეგ წაისვით საბავშვო ზეთი ან დამატენიანებელი კრემი. თუ ელექტროდეპილატორით სარგებლობთ, პროცედურის წინ სპირტით გაიწმინდეთ ხელები და კანი, რათა ინფიცირებისგან თავი დაიზღვიოთ. თმის მოშორება მისი ზრდის მიმართულებით ჯობს. მართალია, მოუხერხებელია, მაგრამ ამგვარად არ შეიცვლება მისი ზრდის კუთხე, რაც რამდენადმე შეამცირებს თმის ჩაბრუნების რისკს. კარგი იქნება, თუ თმის მოშორების შემდეგ კანს მთელი დღე არ დაისველებთ, თორემ გაღიზიანება მოიმატებს. უმჯობესია, წაისვათ სპეციალური კრემი ან მიიყაროთ საბავშვო ტალკი. დეპილაციიდან ორი დღის შემდეგ საჭიროა კანის სქრაბით ან მაგარი ნეჭით დამუშავება. ამ პროცედურის ჩატარება საჭიროა ყოველდღე, მინიმუმ ერთი კვირის განმავლობაში. არ დაგავიწყდეთ დილა-საღამოს დამატენიანებელი კრემის წასმა. თუ თმის ჩაბრუნებას მაინც ვერ დააღწიეთ თავი:

• აიღეთ 1/2 ჩაის ჭიქა ნებისმიერი მარილი (სუფრისა ან ზღვისა) და 2 ჩაის კოვზი ფორთოხლის ზეთი. ერთმანეთში აურიეთ, დაუმატეთ იმდენი დამატენიანებელი კრემი, რომ მეტისმეტად თხევადი არ გამოვიდეს, წაისვით სხეულზე და შეიზილეთ. ეს სქრაბი თითქოს იღებს თმას კანიდან და აშუშებს ჭრილობებს. ერთადერთი ნაკლი ის არის, რომ ხეხავს კანს და ცოტათი მტკივნეულია. ამ პროცედურის შემდეგ საჭიროა გრილი წყლის გადავლება, შემშრალება, 1 წილი სალიცილის სპირტისა და 1 წილი გულყვითელას ნაყენის ნარევის წასმა, ბოლოს კი საბავშვო ზეთის გადასმა.
• 2 აბი ასპირინი გახსენით 1/2 ჩაის ჭიქა წყალში და ამ ხსნარით გაიწმინდეთ კანი ეპილაციის შემდეგ.
• ასპირინისა და გლიცერინის ნარევი დაიდეთ ჩაბრუნებულ თმაზე და 1-2 საათი გაიჩერეთ. ამ ნარევს თმა ზედაპირზე ამოაქვს და პინცეტით მის ამოღებას აადვილებს.