ლალი ჩხიკვაძე

35 წლის ასაკში თავს იჩენს კანის დაბერების პირველი ნიშნები, მაგრამ ბუნებრივი კოლაგენის სინთეზი ჯერ კიდევ საკმაოდ მაღალ დონეზეა. კანს სჭირდება დამატებითი დატენიანება, კვება და ასაკობრივი ცვლილებების შემაჩერებელი პროფილაქტიკური საშუალებები. კოლაგენი უკვე შედის ანტი-აგე კოსმეტიკის შემადგენლობაში. 45 წლისთვის კანი კარგავს სიმკვრივეს, რადგან კოლაგენის სინთეზი ინტენსიურად ქვეითდება ორგანიზმის ჰორმონული გარდაქმნის, კლიმაქსისწინა პერიოდისა და მენოპაუზის გამო. აუცილებელია ბუნებრივი ესტროგენების, ნანოკომპლექსების, ანტიოქსიდანტების, კოლაგენის, ელასტინის, კოენზიმის შემცველი კოსმეტიკური საშუალებების კომპლექსური გამოყენება, რომლებიც კანის უჯრედებს დამატებითი ჟანგბადით და საკვები ნივთიერებებით ამარაგებს. მკვებავი და დამატენიანებელი კრემები და შრატები, ასაკის საწინააღმდეგო ორმაგი ეფექტის მქონე კრემები კვებავს კანს და ათანაბრებს სახის ფერს. ამ დროს შეიძლება გამოვიყენოთ ლიფტინგეფექტის მქონე კრემები, რომლებიც უმთავრესად დამხმარე საშუალებებია 40-50 წლის ქალისთვის, რომელსაც სილამაზისა და ახალგაზრდობის შენარჩუნება სურს. 55-60 წლიდან, როდესაც კანის სიმკვრივის უზრუნველმყოფელი კოლაგენის სინთეზი პრაქტიკულად შეჩერებულია, აუცილებელია არა მარტო დამატენიანებელი, მკვებავი, დამჭიმავი საშუალებები, არამედ პიგმენტურ ლაქებთან ბრძოლაც შესაბამისი კრემებითა და შრატებით. კოსმეტიკის შერჩევისას აუცილებელია სახის კანის ტიპის ცოდნა: მშრალი კანი ცხიმიანისა და კომბინირებულისგან განსხვავებულ მოვლას მოითხოვს. ინდივიდუალური თავისებურებების გათვალისწინების გარეშე კოსმეტიკური საშუალებების გამოყენებამ შესაძლოა კანის მდგომარეობა გააუარესოს და ნაოჭები გააღრმაოს. კოსმეტიკური საშუალების შერჩევისას გასათვალისწინებელია სეზონიც. გაზაფხულზე, ზაფხულში და ადრეულ შემოდგომაზე გამოსაყენებელ კოსმეტიკას უნდა ჰქონდეს ულტრაიისფერი სხივებისგან დამცავი ფილტრი. ოპტიმალურია შPF 15-ისა და შPF 20-ის მქონე კრემები. უკეთესი ეფექტისთვის გასათვალისწინებელია რამდენიმე სხვა ნიუანსიც:

• კომპლექსურად გამოიყენეთ ერთი სერიის კოსმეტიკური საშუალებები, რომლებიც ერთმანეთს შეავსებს. ჩვენს „სილამაზის ნაკრებში“ უნდა შედიოდეს, სულ მცირე, დღისა და ღამის კრემი, კრემი ან გელი თვალის ირგვლივ კანის მოსავლელად, მკვებავი შრატი და დილისა და საღამოს გამწმენდი საშუალებები. ისინი კანის ტიპის შესაბამისად უნდა შეირჩეს.
• იმისთვის, რომ კანი ერთსა და იმავე საშუალებას არ შეეჩვიოს, თანაც უზრუნველყოფილ იქნეს კანის სხვადასხვა ბიოკომპონენტით კვება, კრემები, ეფექტურიც კი, 3-4 თვეში ერთხელ ცვალეთ. თუ ახალი საშუალებები ნაკლებეფექტური აღმოჩნდა, 3-4 თვის შემდეგ შეგიძლიათ ისევ ძველს დაუბრუნდეთ.

როგორ წავისვათ კრემი

სპეციალისტების თქმით, თვალების ირგვლივ არსებული ზონის მოსავლელად საუკეთესოა ბურთულიანი აპლიკატორის მქონე საშუალებები. ბურთულიანი აპლიკატორის გამოყენებისას კანი მასაჟდება და მიკროცირკულაცია უმჯობესდება. კრემი უნდა წავიცხოთ 4 წერტილზე - ნიკაპზე, ლოყებსა და შუბლზე, მერე კი მსუბუქი მოძრაობით წავისვათ სამასაჟე ხაზების გასწვრივ და თანაბრად გავინაწილოთ სახესა და კისერზე. კრემის წასმის შემდეგ სახეზე, შუბლსა და ნიკაპზე მიიდეთ ხელისგულები, რათა იგრძნოთ სითბო და მოეშვათ - ნაოჭებს აჩენს არა მარტო ასაკობრივი ცვლილებები, არამედ სახის კუნთების მუდმივი დაჭიმულობაც. მოსადუნებლად შეიძლება ვსინჯოთ ვარჯიში, რომელიც სახის კუნთებს ტონუსს უნარჩუნებს. კრემის წასმის პროცედურა დაასრულეთ „თითების შხაპით“. მიკროვიბრაცია ხელს უწყობს სიმკვრივისა და ტონუსის შენარჩუნებას და სახის ოვალის კორექციას.