ჟურნალის რედაქცია

მუმიო და აბზინდა ტროფიკულ წყლულებს შველის

უკვე მრავალი წელია, მაწუხებს ვენები. ზაფხულობით ტროფიკული წყლულებიც კი მიჩნდებოდა. უამრავ ექიმს მივმართე და უამრავი სამკურნალო საშუალებაც გამოვცადე. ზოგმა ნამდვილად მომგვარა შვება, ზოგმა კი ვერაფერი მიშველა. წამალი, რომლის რეცეპტსაც გიგზავნით, სწორედ ზედგამოჭრილია ჩემისთანა ადამიანებისთვის. მერწმუნეთ, მას მართლაც შეუძლია შველა.

• ერთმანეთში კარგად უნდა აურიოთ 6-10 გრამი მუმიო და 100 გრამი თხევადი ნატურალური თაფლი, ამ ნარევში დაასველეთ დოლბანდის ტამპონი და დაიდეთ ჭრილობაზე. ზემოდან შეგიძლიათ შეიხვიოთ. ამგვარი კომპრესი უნდა გამოიცვალოთ დღეში ერთხელ რამდენიმე დღის განმავლობაში და გაიჩეროთ 24 საათი.
• კარგია მწარე აბზინდაც: აიღეთ მაისში მოგროვილი ბალახი, გამოაშრეთ და დააქუცმაცეთ ან დაფქვით, დაიყარეთ ტროფიკულ წყლულებსა და ძნელად შეხორცებად ჭრილობებზე, შეიხვიეთ და 24 საათი გააჩერეთ.

ნინელი ქირია, ზუგდიდი

გულყვითელას სიკეთე არასდროს დამავიწყდება

გულყვითელა მართლაც რომ ბუნების საოცრებაა. რაც უფრო მეტად ვინტერესდები სამკურნალო მცენარეებით, მით უფრო მეტს ვიგებ ამ საოცარი მცენარის სამკურნალო თვისებების შესახებ. დავასკვენი, რომ სახლში, როგორც იოდი ან რომელიმე სხვა ანტისეპტიკური საშუალება, ყოველთვის უნდა გვქონდეს გულყვითელას ნაყენიც.

• აიღეთ მცენარის ღეროები და ფოთლები, დააქუცმაცეთ, ჩაყარეთ მინის ქილაში, დაასხით სპირტი ან არაყი და დადგით ბნელ, გრილ ადგილას, 2 კვირა გააჩერეთ და ნაყენი მზად არის. ის უხდება ნაღრძობს, მტკივან სახსრებს, კისრის ტკივილს. საკმარისია, მტკივანი ადგილი ნაყენით დაიზილოთ და თბილად შეიხვიოთ.

მისი გამოყენება შეიძლება კანის ზედაპირული დამწვრობის დროსაც.

ლაურა კირკიტაძე, ქუთაისი

ჩაზრდილი ფრჩხილის მკურნალობა შინაც შეიძლება

ფრჩხილის ჩაზრდა ნამდვილ სატანჯველად მექცა. სალონებსა და დერმატოლოგებთან სიარულმაც დამღალა. ერთხანს ამის საშუალება აღარ მქონდა და გადავწყვიტე, სხვა გზა მეპოვა. ბევრი ძებნა არ დამჭირვებია. ეს წამალი 83 წლის ქალბატონმა მასწავლა და შვებით ამოვისუნთქე. პროცედურის დაწყებისას უნდა დაიბანოთ ფეხი სარეცხის საპნით და სოდიანი წყლით, კარგად გაიწმინდოთ და შეიმშრალოთ.

• მშრალ თითზე უნდა დაიდოთ 1 სადილის კოვზი კარაქი ან მარგარინი, შემოიხვიოთ პოლიეთილენის ნაჭერი, ისე, რომ ფრჩხილი მთლიანად იფარებოდეს ცხიმით და გაიჩეროთ მთელი ღამე.

დილით მოიწმინდეთ ცხიმი, აიღეთ წინასწარ სპირტით გაწმენდილი ბასრპირიანი ქლიბი და ფაქიზად სცადეთ ფრჩხილის კანქვეშიდან გამოღება. თუ პროცედურისას კვლავ ტკივილს იგძნობთ, იგივე პროცედურა გაიმეორეთ და შემდეგ კიდევ სცადეთ ფრჩხილის მოჭრა. 2-3 პროცედურის შემდეგ ჩაბრუნებული ფრჩხილის ამოწევასაც და მოჭრასაც ადვილად მოახერხებთ.

ესმა ინაური, თბილისი

მრავალძარღვას თესლი თვალების სიწითლეს აცხრობს

დიდი ხანი არ არის, რაც ხალხური რეცეპტების შეგროვება დავიწყე. ერთგვარი კოლექციაც კი მაქვს, სადაც მხოლოდ საკუთარ თავზე გამოცდილ საშუალებებს ვინახავ. სწორედ ამ კოლექციიდან არის ეს რეცეპტიც.

• თუ თვალები ხშირად გიწითლდებათ, უნდა მოამზადოთ ჩვეულებრივი ხახვის ნახარში, დაუმატოთ ცოტა თაფლი, კარგად აურიოთ და თვალები დღეში 4-5-ჯერ ამ ხსნარით გაიწმინდოთ.
• თუ ამან შედეგი არ გამოიღო, აიღეთ 2 ჩაის კოვზი მრავალძარღვას დაფქული თესლი, დაასხით 2 ჩაის კოვზი ცივი წყალი და 6 სადილის კოვზი მდუღარე წყალი, გააჩერეთ ასე 1 საათი, გადაწურეთ და მიღებული ნარევი გამოიყენეთ საფენებისთვის.

გურამ შავდია, თბილისი

---

ნაღრძობ ფეხს მარილი და ძმარი მოგიშუშებთ

ზაფხულში მეგობართან ერთად აჭარის მაღალმთიან სოფელში ვისვენებდი. ერთ საღამოს ფეხი დამიცდა, მთიდან დავგორდი და ფეხი ვიღრძე. ტკივილზე მეტად ის მაწუხებდა, რომ უკვე ღამდებოდა და ვერაფრით მოვახერხებდი საავადმყოფოში წასვლას, ჩემი მასპინძლების შეწუხებულ სახეებს რომ ვუყურებდი, ტკივილი მიათმაგდებოდა. ჩემი ამბავი მეზობლებმაც შეიტყვეს. მოხუცი ბებიაც კი მოვიდა ჩემს სანახავად, ყველა დაგვამშვიდა და გვითხრა, ნატკენ ფეხს რამდენიმე წუთში დაგიამებო.

• აიღო 2 სადილის კოვზი მარილი, დაასხა 2 ჭიქა მდუღარე წყალი, დაამატა 1 სადილის კოვზი ძმარი და კარგად აურია, ამ ნარევში დაასველა ბამბის ქსოვილის ნაჭერი და ზუსტად ერთი საათით დამადო ნატკენ ფეხზე, შემდეგ მომხსნა და იგივე კიდევ ერთხელ გაიმეორა.

არ დაიჯერებთ და ტკივილმა პირველივე პროცედურის შემდეგ გამიარა, შუშეპებაც კი დამიცხრა. სილურჯე რომ არ დამრჩენოდა, ამავე ქსოვილზე დამადო ყინული, რომელიც ორი საათის შემდეგ მომხსნა. ბოლოს კი მტკივანი ადგილი ქაფურის სპირტში დასველებული ტამპონით გამიწმინდა. მე და ჩემი მეგობარი თვალებს არ ვუჯერებდით...

ნია ღვალაძე, თბილისი

მწერის ნაკბენი ნუ შეგაშინებთ

მწერის ნაკბენი არ გაგირთულდებათ, თუ ცაცხვის ყვავილის ნაყენს დაიხმარებთ.

• აიღეთ 1 სადილის კოვზი ცაცხვის ყვავილი და დაასხით 1 ჭიქა მდუღარე, 2 საათი გააჩერეთ, მერე გაწურეთ და ნაყენი ბნელ, გრილ ადგილას შეინახეთ.

თუ მწერმა გიკბინათ, არ დაახანოთ, დაასველეთ ბამბის ტამპონი ამ ნაყენში და ნაკბენი ადგილი საგულდაგულოდ გაიწმინდეთ.

ცაცხვის ნაყენს აქვს კუჭის წვენის გამოყოფის გამაძლიერებელი თვისებაც, შეუძლია მეტეორიზმითა და აირების დაგროვებით გამოწვეული მუცლის ტკივილისა და ნაწლავების სპაზმების მოხსნა, ოღონდ ამისთვის შედარებით კონცენტრირებული ნაყენია საჭირო. იგი ასე მზადდება:

• აიღეთ 4 სადილის კოვზი ცაცხვის ყვავილი და დაასხით 1 ლიტრი მდუღარე წყალი, დადგით. უნდა მიიღოთ თბილ-თბილი, ნახევარი ჭიქა დღეში 3-ჯერ.

ლია ნიორაძე, გორი

ბარდა გულძმარვის დროს სოდას შეგიცვლით

ბოლო ხანს მეტისმეტად შემაწუხა გულძმარვამ. დავიწყე სოდიანი წყლის სმა, შემდეგ წამლებზე გადავედი, მაგრამ მათ შესაძენად ჯიბე მუდამ სავსე უნდა გქონდეს. აღარ მახსოვს, ვინ მირჩია ჩვეულებრივი ბარდის გამოყენება. თავიდან არ დავუჯერე, მაგრამ როდესაც ვსინჯე, დავრწმუნდი, რომ მართლაც ეფექტურია. მინდა, ეს რეცეპტი თქვენც გასწავლოთ:

• ერთ მუჭა ბარდას დაასხით 1 ჩაის ჭიქა მდუღარე წყალი. 2 საათის შემდეგ წყალი გადაღვარეთ. როგორც კი გულძმარვა შეგაწუხებთ, მაშინვე ჩაიდეთ პირში 2-3 ბარდის მარცვალი და ღეჭეთ. რამდენიმე წუთში გულძმარვა გაგივლით. დამდუღრული ბარდა შეინახეთ მაცივარში.

გიგლა კუნჭულია, ოზურგეთი