მარილების დაგროვებას უჩივით?
ახლობლის რჩევით, შემოდგომობით, მთელი ოქტომბრის მანძილზე, მზესუმზირას ფესვებისგან დამზადებული ნახარშის დალევა დავიწყე, რომ ორგანიზმიდან, განსაკუთრებით კი ძვლებიდან, არასასურველი მარილები გამომედევნა:
- შეაგროვეთ ფესვების სქელი ნაწილები, მოაშორეთ ფუნჯა ბოლქვები, გარეცხეთ და გააშრეთ. 3 ლიტრ წყალში ჩაყარეთ 1 ჭიქა კარგად დაჭრილი ფესვი, ადუღეთ 2 წუთი და დადგით რამდენიმე ხნით. მზესუმზირის ჩაი უნდა სვათ 2-3-დღის განმავლობაში, შემდეგ იმავე ფესვებისგან ახალი დააყენეთ, ოღონდ 10-15 წუთი ხარშეთ, ხოლო მე-6 დღიდან ახალ ჩაის აყენებთ ახალი ნედლეულისგან.
რეზო მანჯავიძე, სოფ. ხიდისთავი
ძვლებსა და სახსრებში მარილოვანი ცვლის დარღვევის თავისებურებანი
- ქალბატონო ნანა, რა არის „მარილების დაგროვება“?-
ის, რასაც ხალხში მარილების დაგროვებას უწოდებენ, სინამდვილეში ოსტეოართროზია - სახსრების ქრონიკული არაანთებითი დეგენერაციული დაავადება. მისი საფუძველია სახსრის ხრტილის პირველადი დეგენერაცია, რასაც მოჰყვება ძვლების სასახსრე ზედაპირის ცვლილებები, გვერდითი ოსტეოფიტების წარმოქმნა, დაბოლოს, სახსრის დეფორმაცია.
ოსტეოართროზი ყველაზე გავრცელებული რევმატული დაავადებაა - შემთხვევათა 60-70% სწორედ მის წილად მოდის - და ხშირად იწვევს შრომისუუნარობასა და ადრეულ ინვალიდობას.
- რა იწვევს თავად ხრტილის დეგენერაციას?
- დეგენერაციულ ცვლილებათა ხელშემწყობი მთავარი ფაქტორებია:
- სახსრის ფუნქციური გადატვირთვა (პროფესიული, სპორტული, ყოფითი და სხვა) სასახსრე ხრტილის სისტემატური მიკროტრავმით;
- ჩონჩხის თანდაყოლილი დისპლაზია და სტატიკის დარღვევა (სკოლიოზი, ბრტყელტერფიანობა და სხვა);
- მეტაბოლური დაავადებები.
ხრტილის დეგენერაციას საფუძვლად უდევს მეტაბოლიზმის დარღვევა, რის შედეგადაც ხრტილი კარგავს დრეკადობას, ხორკლიანდება, შემდგომ სკდება და წყლულდება, ალაგ-ალაგ ილევა და ქრება. ზოგჯერ ხრტილის ნატეხები სასახსრე ღრუში გამოიყოფა და ანთებით მოვლენებს იწვევს.
ხრტილის ქვეშ მდებარე ამორტიზაციას მოკლებული ძვლის ქსოვილი (როგორც ვიცით, ხრტილი მოძრაობის დროს ასრულებს ამორტიზატორის როლს, ამცირებს ზეწოლას ძვალზე) ცვდება და მკვრივდება, სასახსრე ზედაპირის კიდეებთან კი ხდება ხრტილის კომპენსაციური ზრდა, შემდგომ - მისი გაძვალება და ოსტეოფიტების - ძვლოვანი წანაზარდების - წარმოქმნა, როგორც ხრტილის დანაკარგის ერთგვარი კომპენსაცია, ამ უკანასკნელს კი სახსრის ზედაპირის დეფორმაციამდე მივყავართ.
- უმთავრესად რომელ სახსრებს აზიანებს ოსტეოართროზი?
თემის გაგრძელებას გაეცანით ბმულზე