"ეს ნიჭია!"
"ექიმო, რა მელის? ოპერაცია? ამპუტაცია?" "ყველაფერს არ მოგიყვებით, თორემ მერე საინტერესო აღარ იქნება..."
მოხუცი თერაპევტი პალატაში ავადმყოფს სინჯავს, ფონენდოსკოპით უსმენს და ხშირ-ხშირად გაიძახის: "ღრმად ისუნთქე!.. დაახველე!.." ამ დროს განყოფილების გამგე შემოდის და პროფესორს ჩასჩურჩულებს: "ბატონო პროფესორო, ფონენდოსკოპის ყურმილი ყურში არ გიდევთ, ალბათ, ჩამოგიცურდათ!" პროფესორი ასევე ჩურჩულით პასუხობს: "სულერთია, ყურშიც რომ მქონოდა გარჭობილი, შედეგი იგივე იქნებოდა, - მაინც არაფერი მესმის!"
ერთ დღეს კლინიკაში მამაკაცი შემოიყვანეს, რომლისთვისაც მარცხენა ხელზე თითები თითქმის მთლიანად წაეჭრა ელექტროხერხს. გადაწყდა, რომ დარჩენილი დაჩეჩქვილი ნაწილებიც მოეკვეთათ. ოპერაცია ადგილობრივი ანესთეზიით კეთდებოდა, შესაბამისად, პაციენტს არ ეძინა. იგი საკმაოდ ხუმარა და ენაწყლიანი ადამიანი აღმოჩნდა, იქით ამშვიდებდა ექიმებს, ბოლოს კი ანეკდოტების მოყოლაც დაიწყო. ოპერაცია თითქმის მთავრდებოდა, როცა ავადმყოფმა შემდეგი კითხვა დასვა: "პიანინოზე დაკვრას თუ შევძლებ, ექიმო?" ექიმმა, - არ ვიცი, ავადმყოფის განწყობა გადაედო, არ ვიცი, ეს სინანულის მწარე ხუმრობა იყო, - მაგრამ ასეთი პასუხი კი გასცა: "პიანინოსი რა მოგახსენო, მაგრამ აი, ტამტამზე ისე კარგად დაუკრავ, ვერავინ გაჯობებს".
ზოოპარკის მოსამსახურე ვოლიერთან დგას და უზარმაზარი ნიანგის დაღებულ ხახაში იყურება. "რა სჭირს ნიანგს?" - ეკითხება ერთ-ერთი დამთვალიერებელი. "ჯერ არ ვიცი, ჩვენი ვეტერინარი აგერ უკვე ნახევარი საათია შიგნით არის და ჯერ არაფერს ამბობს".
ერთ-ერთ სოფელში ექიმმა ავადმყოფი გასინჯა. ოთახიდან გამოსულს პაციენტის ახლობლები შემოეხვივნენ: "არის იმედი, ექიმო?" "ჯერ ზუსტად ვერ გეტყვით, მაგრამ მეზობელი სოფლიდან თუ ვინმეს დაპატიჟებას აპირებთ, ბარემ დამაბარეთ, მაინც იქით მივდივარ", - უპასუხა ექიმმა.
"ჩემი ცოლი უცნაურად გავიცანი: მანქანა დავაჯახე, საავადმყოფოში მივიყვანე, რამდენჯერმე მოვინახულე და როდესაც განიკურნა, შევუღლდით", - უყვება პაციენტი ექიმს. "მეც სწორედ ამას ვამბობ; ადამიანებმა რომ იცოდნენ, საგზაო შემთხვევებს როგორი ტრაგიკული შედეგი მოსდევს, მანქანის ტარებისას უფრო მეტ სიფრთხილეს გამოიჩენდნენ", - უპასუხა ექიმმა.
ექიმის კაბინეტში ახალგაზრდა ქალი შევიდა და მაშინვე წუწუნს მოჰყვა: - მთელი დღეების განმავლობაში ჩემს ქმარს რაღაცას ვეუბნები, პასუხს კი საერთოდ ვერ ვღებულობ. ექიმო, ვშიშობ, მას რაღაც სერიოზული ფსიქიკური დაავადება აქვს! - ეს დაავადება არ არის, ქალბატონო! ეს ნიჭია!
მამაკაცი ფარმაცევტ ქალბატონს ეკითხება: "მაპატიეთ, მაგრამ ქალების ვიაგრა ან რაიმე ამის მსგავსი ხომ არ გაქვთ?" "ჩვენ არა, ბატონო, მაგრამ, აი, ქუჩის კუთხეში საიუველირო მაღაზიაა, იქ ნამდვილად აარჩევთ რამეს".
სამედიცინო ინსტიტუტში მისაღები გამოცდების წინ კომისიის წევრებთან გასაუბრება ტარდება. კომისიის თავმჯდომარე მკაცრად ეკითხება აბიტურიენტ გოგონას: "მითხარით, რატომ გადაწყვიტეთ სამედიცინო ინსტიტუტში ჩაბარება?!" "კარგი რა, მამა, ახლა ხუმრობის დროა?!" - ისმის პასუხად.
წამლების ანტირეკლამიდან: "მრავალმა ადამიანმა გაიუმჯობესა ცხოვრება წამლების წყალობით. მაგალითად, ფარმაცევტებმა..."
რომან აბრამოვიჩს მკურნალი ექიმი ურეკავს: "მაპატიეთ, ბატონო, მაგრამ ეტყობა, კარგად ვერ გამიგეთ, როცა გითხარით: "ხელი მოჰკიდეთ სპორტს, მაგალითად, ფეხბურთს..."
"ვშიშობ, რომ მეუღლეს ვკარგავ, - შესჩივლა მამაკაცმა ფსიქიატრს. "თქვენთან ურთიერთობაზე უარს ამბობს?" - დაინტერესდა ექიმი. "არა, ბატონო, როგორ გეკადრებათ, პირიქით, სამსახურიდან დაბრუნებულს კართან მხვდება, ჩემი პერანგები ყოველთვის გულდასმით არის გარეცხილი და გაუთოებული, საჭმელს არაჩვეულებრივად ამზადებს, სახლში ყოველთვის სისუფთავეა... უფლებას მაძლევს, ყველა საყვარელ გადაცემას თავიდან ბოლომდე ვუყურო, არასდროს წუწუნებს და ჩემი სექსუალური ფანტაზიების ასრულებაზეც არასდროს უთქვამს უარი". "თუ ასეა, მაშ რა გაღელვებთ?" "შესაძლოა, მეტისმეტად მგრძნობიარე ვიყო, - უპასუხა მამაკაცმა, - მაგრამ ღამით, როცა ცოლი დარწმუნებულია, რომ მძინავს, ხშირად ჩურჩულებს: "ღმერთო, ნეტავ როდის გასძვრება ამ საზიზღარს სული!.."