ეკა ჭავჭავაძე

მთავარი როლი ალერგენთან კონტაქტის შეწყვეტასა და შეზღუდვას ენიჭება. ეს კი საცხოვრებელი ადგილიდან უნდა დაიწყოთ:

1. სასურველია, შინ არ იყოს საგნები, რომლებიც განსაკუთრებით აგროვებს მტვერს: სქელი ფარდები, ხალიჩები, რბილი სათამაშოები, ღია თაროზე დაწყობილი წიგნები.
2. ფუმფულა და რბილი საწოლი, სამწუხაროდ, არ გამოდგება, უპირატესობა სპარტანულ წესით მოწყობილ საძინებელს მიანიჭეთ. მაგარი საწოლი, მართალია, მიმზიდველად არ გამოიყურება, მაგრამ ჯანმრთელობისთვის გაცილებით სასარგებლოა.
3. ბალიში და საბანი სინთეზური უნდა იყოს, რათა მათი რეგულარული რეცხვა შეძლოთ, ამასთან, არანაკლებ 60 გრადუს ტემპერატურაზე. ზამთარში სასურველია, რამდენიმე წუთით ყინვაშიც გაფინოთ.

გარდა იმისა, რომ შესაძლოა, ბამბის, მატყლის და შალის საწოლის აქსესუარები თავად შეიცავდეს ალერგენებს, მათში საკმაოდ ადვილად იბუდებენ მიკროსკოპული მტვრის ტკიპები, რადგანაც ეს გამოკვების საუკეთესო გარემოა.

• ფლორა და ფაუნა

შინაური ცხოველები რისკის დამატებითი ფაქტორია, განურჩევლად იმისა, პაციენტს მათ ბეწვზე ალერგია აღენიშნება თუ არა. დაუშვებელია ლოდინი იმ მოსაზრებით, რომ პაციენტი მათ მიეჩვევა - ეს ნაკლებმოსალოდნელია. საკმარისი არ არის შინაური ცხოველის გაჩუქება, აუცილებელია, ამის შემდეგ საიმედოდ, ქიმიური საშუალებებით დასუფთავდეს სახლი, რადგან კატის ალერგენები საკმაოდ გამძლეა და შესაძლოა სახლში ორ წლამდეც კი გაძლოს.

არ არის რეკომენდებული პაციენტის ოთახში აკვარიუმის დადგმაც. შესაძლოა, საშიში აღმოჩნდეს ზოგიერთი ქოთნის მცენარეც.

• დიდი ქალაქის საფრთხეები

დიდი ქალაქის საფრთხეებია მისი “ცხოველქმედების პროდუქტები” - გამონაბოლქვი აირები, რომლებიც ყველაზე მწვავე ალერგიულ რეაქციებს იწვევს, მოქმედებს სასუნთქი გზების ლორწოვან გარსზე და მათ სხვა ალერგენებისთვის გაცილებით ადვილად შეღწევადს ხდის. ზოგჯერ ქრონიკულად მოავადეებს ასთმური შეტევები ეწყებათ ტემპერატურის ცვლილებაზე, მკვეთრ არომატებზე, ფიზიკურ დატვირთვაზე, სტრესზე.

თუ თქვენს სიახლოვეს, მეზობლად ან სულაც სახლში სარემონტო სამუშაოები დაიწყო, უმჯობესია, დასრულებამდე სხვაგან გადახვიდეთ საცხოვრებლად.

ასთმური შეტევების გასაიშვიათებლად ან სულაც მათი კუპირებისთვის შესანიშნავია წელიწადში 2-ჯერ 2 კვირით მაინც წასვლა მაღალმთიან რეგიონში, სუფთა ჰაერზე. ეს შეგიძლიათ გააკეთოთ წელიწადის ნებისმიერ დროს, ოღონდ რეკომენდებული არ არის კლიმატის მკვეთრი ცვლილება, მაგალითად, +30-დან -10 გრადუსზე.

სასურველია, საკურორტო ზონაში კლიმატი არც ნოტიო იყოს და არც ძლიერ მშრალი. უპირატესობა ზომიერს მიანიჭეთ.

• კვება

ასთმიანებისთვის არ არის საჭირო რაიმე კონკრეტული დიეტის დაცვა, არც აკრძალულ პროდუქტთა ნუსხა არსებობს, უმჯობესია უარი თქვათ ჩვეულ კვებით ალერგენებზე და არ მიიღოთ ზომაზე მეტი საკვები.