ლალი ჩხიკვაძე

ამ დასკვნამდე მივიდნენ ფსიქოლოგები კორნელის უნივერსიტეტიდან (აშშ), რომელთა სტატია გამოქვეყნდა ჟურნალში Personality and Social Psychology.

მკვლევარებმა ჩაატარეს შვიდი ექსპერიმენტი, რომელშიც მონაწილეობდნენ მოზრდილები და ბავშვები, რომლებიც, ნებისმიერი მიზეზის გამო - ალერგიის, ჯანმრთელობის სხვა პრობლემების, რელიგიური თუ კულტურული ნორმების გამო, იძულებულნი იყვნენ თავი შეეკავებინათ გარკვეული საკვების მოხმარებისგან.

შედეგების ანალიზმა აჩვენა, რომ სხვა მონაწილეების მსგავსი საკვების მიღების უუნარობა იწვევს ადამიანებში სოციალური იზოლაციის განცდას, განურჩევლად მათი ასაკისა. „მიუხედავად სუფრასთან ფიზიკურად ყოფნისა, დიეტური შეზღუდვების არსებობა ადამიანებს გარიყულად აგრძნობინებს თავს, რადგან მათ არ შეუძლიათ სრულად მონაწილეობა მიიღონ საერთო კვებაში, რომელიც ხალხის გაერთიანებას ისახავს მიზნად“, - განმარტა წამყვანმა ავტორმა კეიტლინ ვულიმ.

• ვული აღნიშნავს, რომ ერთობლივი სადილობის გარშემო გაერთიანება არის არსებითად მნიშვნელოვანი სოციალური გამოცდილება.

წინა კვლევებმა აჩვენა, რომ უცნობები ერთმანეთს უფრო ენდობიან, როცა ერთად ჭამენ, ხოლო ერთი თეფშიდან ჭამა იწვევს ადამიანებს შორის კიდევ უფრო დიდ ურთიერთობას.

როდესაც ადამიანი ვერ ახერხებს სრულყოფილად გაიზიაროს საერთო ტრაპეზი, ნებაყოფლობით თუ იძულებით, ის განიცდის შფოთვის, უარყოფისა და მარტოობის ქვეცნობიერ განცდას.

შემზღუდავი დიეტის (უგლუტენო, ვეგეტარიანული, ვეგანური) პოპულარობის გაზრდის გამო, სუფრასთან მარტოობა, საერთო კვებით სოციალური კავშირების დამყარების შეუძლებლობა შეიძლება გახდეს ნამდვილ სოციალურ პრობლემად, აღნიშნავს ვული.

რა საფრთხე შეიძლება შექმნას წონის სწრაფად დაკლებამ

მკაცრი დიეტები მკვეთრად ამცირებს ორგანიზმში საჭირო ვიტამინებისა და მინერალების რაოდენობას, რაც იწვევს იმუნური სისტემის შესუსტებას და სხვადასხვა დაავადების განვითარებას. თუ ადამიანი რაციონიდან მთლიანად გამორიცხავს ყველა მაღალკალორიულ საკვებს, ორგანიზმი ვეღარ მიიღებს ნორმალური ფუნქციონირებისთვის მნიშვნელოვან მიკროელემენტებს, რაც გამოიწვევს ჯანმრთელობის სერიოზული პრობლემების გამოვლენას. ამიტომ, კალორიების დათვლა ხშირად საზიანოა.

განსაკუთრებით მნიშვნელოვანია, რომ ორგანიზმმა მიიღოს საკმარისი რაოდენობით პროტეინი, რომლის დაკარგვაც იწვევს კუნთების მასის შემცირებას და მომავალში წონის დაკლებას გაცილებით ართულებს.

გულ-სისხლძარღვთა დაავადებებით და სასუნთქი სისტემის ან სახსრების პრობლემების მქონე ადამიანებმა არ უნდა დაიკლონ წონაში სწრაფად. თუ ისინი ზედმეტად აქტიურად დაიწყებენ ვარჯიშს, მათი დაავადებები შეიძლება გაუარესდეს.

ინტენსიური ვარჯიშისა და დიეტის საშუალებით წონის დაკლების კიდევ ერთი უკუჩვენება არის ორსულობა.

გადაჭარბებული ვარჯიში ყველასთვის მისაღები როდია, რადგან ამან შეიძლება დაარღვიოს ძილი, დააქვეითოს იმუნიტეტი და გამოიწვიოს დაღლილობა. ამრიგად, ვარჯიშის დროს, მნიშვნელოვანია, ყურადღება მივაქციოთ სხეულის აღდგენას, ხოლო დიეტის დროს, შევინარჩუნოთ წონასწორობა და გავაჯეროთ ორგანიზმი ვიტამინებითა და მნიშვნელოვანი მიკროელემენტებით.