ზაფხულში თმა უფრო ხშირად ბინძურდება ოფლის, მტვრისა და ცხიმის გამომუშავების გამო, ამიტომ უფრო ხშირად უნდა დაიბანოთ. შეცვალეთ არსებული შამპუნი უფრო რბილი შამპუნით, რომელიც დასაშვებია ხშირი გამოყენებისთვის. უმჯობესია, თუ ის სულფატის გარეშე იქნება, ნაზი გამწმენდი ინგრედიენტებით.
აუცილებლად დაიბანეთ თმა, თუ მასზე მოხვდება ზღვის ან ქლორირებული წყალი. გამოიყენეთ თმის ღრმა გამწმენდი თვეში ერთხელ მაინც. დასაბანად გამოიყენეთ გრილი ან თბილი წყალი, მაგრამ არა ცხელი.
დაიცავით თმა მზისგან ქუდით და სპეციალური პროდუქტებით. შეეცადეთ, თმა ბუნებრივად გაიშროთ. მზე და ქარი ამ პროცესში უფრო მტერია, ვიდრე დამხმარე. უმჯობესია გადადოთ ფერის რადიკალური ცვლილება. იგივე ეხება დახვევას. თუ გადაწყვეტთ ასეთი პროცედურის ჩატარებას, ორმაგად მნიშვნელოვანია თქვენი თმის საიმედო დაცვა და გაძლიერებული მოვლა.
თავის თმიანი ნაწილის კანზე გამოიყენეთ დამამშვიდებელი ნიღბები, სპრეი ან ყვავილოვანი ჰიდროზოლები. გახსოვდეთ, რომ სკალპიც შეიძლება დაიწვას, განსაკუთრებით გაყოფის ადგილზე, სადაც კანი არც ისე დაცულია თმით. მოერიდეთ ალკოჰოლისა და ფისების შემცველ თმისთვის მავნე პროდუქტებს. უმჯობესია, ისინი ფიქსაციის სპრეებით ან სპეციალური ცვილებით ჩაანაცვლოთ.
თმის მთავარი მტრები ზაფხულში
მტერი #1 - ულტრაიისფერი გამოსხივება. თმის მთავარი „სამშენებლო მასალა“ არის ცილა კერატინი, რომელიც შედგება ამინომჟავების ურთიერთდაკავშირებული ჯაჭვებისაგან. ულტრაიისფერი გამოსხივების გავლენით, ცილოვანი ბმები ნადგურდება. ამის გამო თმა კარგავს ელასტიკურობას, ხდება უფრო მტვრევადი და იწყებს საკვები ნივთიერებების უფრო აქტიურად დაკარგვას. შეგიმჩნევიათ, როგორ ცვივა და ფერს იცვლის თმა მზეზე ყოფნისას? ეს არის ფერის პიგმენტი - მელანინი, რომელიც ნადგურდება ულტრაიისფერი გამოსხივების ზემოქმედებით. განადგურებული პიგმენტის ადგილას სიცარიელეები წარმოიქმნება. ამის გამო თმა იძენს არა მხოლოდ საინტერესო ფერს, არამედ ფოროვან, ჰეტეროგენულ სტრუქტურას და ამავე დროს ხდება მყიფე და სუსტდება.
მტერი N2 - არის მაღალი ტემპერატურა, რომლის გავლენით თმა კარგავს ტენიანობას და ბუნებრივ ცხიმოვან ლუბრიკანტს. ამიტომ აუცილებელია სპეციალური საშუალებების გამოყენებით ხელოვნურად შეიქმნას თმის ზედაპირზე დამცავი ფენა, თმის ცვენის თავიდან ასარიდებლად, რაც გამოწვეულია თმის დასუსტებითა და მტვრევით.
მტერი N3 - მარილიანი ან ქლორირებული წყალი და ქარი. ზღვის მარილი და ქლორის ნაწილაკები თმაზე ილექება და აღწევს მასში. ამის გამო თმა ზარალდება. ზღვის მარილი შთანთქავს ცხიმს და აშრობს თმას. ქარი ნესტიან, დაუცველ თმას წვრილი მტვრის ფენით ფარავს.
როგორ დავიცვათ თმა ზაფხულში?
ბანალური, მაგრამ ეფექტური რჩევაა ქუდის დახურვა. მაგრამ რა მოხდება, თუ არ მოგწონთ ყველა სახის ქუდი, ან უბრალოდ თქვენი ლამაზი თმის დემონსტრირება გსურთ? მაშინ იზრუნეთ მზისგან დამცავი სპეციალური საშუალებების შეძენაზე. ეს შეიძლება იყოს ზეთები, სპრეი, კრემები ან თმის ლოსიონები. მნიშვნელოვანია, იპოვოთ თქვენი ტექსტურა.
თუ სკალპი მიდრეკილია ცხიმის ჭარბი გამომუშავებისკენ, მაშინ ზეთების გამოყენებამ შეიძლება უსიამოვნო შედეგები გამოიწვიოს, მაგალითად, თმას მოუწესრიგებელი იერი მიეცეს. ამიტომ საუკეთესო ვარიანტია მსუბუქი სპრეი ან ულტრაიისფერი ფილტრებისა და მზრუნველი კომპონენტების შემცველი სითხე.
ნორმალური და მშრალი თმისთვის იდეალურია ნაჯერი ლოსიონები, კრემები და ზეთები. მაგრამ მყიფე, მტვრევადი და შეღებილი თმისთვის ზეთები ჯობს. არსებობს პროფესიონალური მშრალი ზეთის სპრეი, რომელიც აერთიანებს მზრუნველ კომპონენტებს და მსუბუქ ზეთებს, რის გამოც მას არაწებოვანი და ჰაეროვანი ტექსტურა აქვს.
როგორ შევინარჩუნოთ თმის სილამაზე ზაფხულში
დაბანის შემდეგ თმაზე გადაივლეთ მცენარეული ნახარში. გვირილა ქერა თმას კეთილშობილ ელფერს მიანიჭებს, ჭინჭრის ნახარში კი ბზინვარებასა და სირბილეს დაუბრუნებს.
თუ შვებულებაში თმის კონდიციონერის წაღება დაგავიწყდათ, თავის დაბანის შემდეგ გადაივლეთ გრილი, მჟავე წყალი. ერთ ლიტრ წყალს დაუმატეთ სუფრის კოვზი ვაშლის ძმარი ან ლიმონის წვენი. ამის შემდეგ თმა გლუვი გახდება და დამატებით ბზინვარებას შეიძენს.
თუ სანაპიროზე გასვლამდე თმის დამცავი არაფერი გაქვთ, წაისვით ნებისმიერი ზეთი: ქოქოსის, აბუსალათინის ან თუნდაც ზეითუნის. ხელისგულებში შეიზილეთ რამდენიმე წვეთი და თმის მთელ სიგრძეზე გაანაწილეთ. არ წაისვათ ზეთი უშუალოდ თავის თმიანი ნაწილის კანზე.
თუ მზეზე ხანგრძლივი სეირნობის შემდეგ იგრძნობთ დისკომფორტს და შეამჩნევთ სკალპის სიწითლეს, ღამით კანზე პანთენოლი წაისვით. უფრო მოსახერხებელია პანთენოლის სპრეის გამოყენება. ეს ხელს შეუწყობს დაზიანებული კანის უფრო სწრაფად განკურნებას და შეამცირებს მზისგან დამწვრობის უარყოფით შედეგებს.
რომელი ვარცხნილობა ავირჩიოთ საზაფხულოდ?
თუ ზაფხულში თმის გასასწორებელ უთოს ან ფენს ვერ ელევით, მაშინ შეეცადეთ ძალზე შეამციროთ მათი გამოყენება. სხვა შემთხვევაში უნდა გახსოვდეთ მაღალი ხარისხის თერმული დაცვა. გამოიყენეთ თერმოაქტიური, კერატინის შემცველი ან სხვა პროდუქტები მზრუნველი ინგრედიენტებით.
თმის ფენით გასაშრობად აირჩიეთ ცივი ჰაერის რეჟიმი, ის ყველაზე ნაკლებად აზიანებს თმას. კატეგორიულად არ გამოიყენოთ ფისებისა და ალკოჰოლის შემცველი საფიქსაციო საშუალებები. პროფესიონალური ბრენდები გვთავაზობენ ფიქსაციის პროდუქტების ფართო არჩევანს, რომლებიც, ძირითადი ფუნქციის გარდა, დამატებით იცავს თმას დაზიანებისა და ულტრაიისფერი გამოსხივებისგან. თუ გაქვთ ხვეული ან მოკლედ შეჭრილი თმა, ყურადღება მიაქციეთ მოდელირებად ცვილებსა და პასტებს.
თმის უთოების მოყვარულთათვის იდეალურია თერმოაქტიური პროდუქტები დამარბილებელი ეფექტით. გასასწორებლად აირჩიეთ პროფესიონალური გასასწორებელი უთოები სპეციალური საფარით და რეგულირებადი ტემპერატურით.
საზაფხულოდ ყველაზე პოპულარული ვარცხნილობები კოსებისა და კუდების სხვადასხვა ვარიაცია. გამოიყენეთ რბილი მასალისგან დამზადებული თმის სამაგრები და მოერიდეთ ლითონის სამაგრებს, რამაც შეიძლება თმა დააზიანოს. კულულების შესაქმნელად კი უმჯობესია მაღალი ხარისხის მასალისგან დამზადებული პროფესიონალური სახვევები.
