როგორ განვსაზღვროთ მკერდის არეში ტკივილის მიზეზი მისი ხასიათის მიხედვით
არსებობს მასტალგიის სამი ტიპი, რომლებიც განსხვავდება ტკივილის ხასიათითა და მიზეზებით. ამრიგად, გულმკერდის ცალმხრივი ტკივილი შეიძლება მიუთითებდეს ახალწარმონაქმნზე.
ყველაზე გავრცელებული ტკივილი ციკლურია. მას აქვს პირდაპირი კავშირი მენსტრუალურ ციკლთან. ამ ტიპის მასტოდინიას ახასიათებს ორმხრივი ტკივილი ციკლის მეორე ნახევარში - უშუალოდ მენსტრუაციის დაწყებამდე. მას თან ახლავს სარძევე ჯირკვლების შეშუპება და მომატებული მგრძნობელობა.
- აციკლური მასტოდინია არის ტკივილი სარძევე ჯირკვალში, რომელიც არ არის დაკავშირებული მენსტრუალურ ციკლთან და ჰორმონალურ ცვლილებებთან.
მისი წარმოქმნის მიზეზები შეიძლება იყოს სარძევე ჯირკვლების კეთილთვისებიანი წარმონაქმნები, მაგალითად, ცისტები, ორალური კონტრაცეპტივების მიღება, მასტიტი - სარძევე ჯირკვლის ინფექციურ-ანთებითი დაავადება, აგრეთვე სარძევე ჯირკვლების დიდი ზომა, ჯირკვლის ტრავმა ან მკერდზე ადრე გადატანილი ოპერაცია.
აციკლური მასტოდინია ხასიათდება ცალმხრივი ტკივილით, რომელიც ჩნდება სარძევე ჯირკვლის კონკრეტულ მიდამოში, მაგრამ ის ასევე შეიძლება იყოს ორმხრივი, თუ მიზეზი არის, მაგალითად, მკერდის დიდი ზომა.
აციკლური მასტოდინიის დროს ქალს უნიშნავენ ექოსკოპიას ან მამოგრაფიას და ტკივილის გამომწვევი მიზეზის მიხედვით არჩევენ მკურნალობას.
- ცალკე გამოყოფენ ექსტრამამალურ მასტალგიას - ეს არის ტკივილის შეგრძნება სარძევე ჯირკვალში, რომელიც გამოწვეულია არა სარძევე ჯირკვლების ფუნქციური ან პათოლოგიური ცვლილებებით, არამედ სხვა ორგანოებისა და სისტემების ფუნქციონირების დარღვევით. ხშირად ვითარდება ხერხემლის, სახსრების მეტაბოლურ-დისტროფიული დაავადებების, გულის დაავადებების, რადიკულარული და მიალგიური სინდრომების დროს. ამ ტიპის მასტოდინიას ახასიათებს ცალმხრივი ტკივილი, მაგრამ ზოგჯერ შეიძლება იყოს ორმხრივი და შეიძლება თან ახლდეს კუნთების ტკივილიც.
აღსანიშნავია ისიც, რომ ტკივილი არ არის ძუძუს კიბოს წამყვანი სიმპტომი. იმისათვის, რომ ადრეულ სტადიაზე არ გამოგვრჩეს კიბოს განვითარება, აუცილებელია პერიოდული სკრინინგული კვლევების ჩატარება.