რა სურთ კაცებს?
მას არ ასწავლიან სკოლასა თუ უნივერსიტეტში, არ ატარებენ სპეციალურად მის შემსწავლელ ტრენინგებს. მხოლოდ ცხოვრება და გამოცდილება გვაწვდის მის შესახებ ინფორმაციას, თუ როგორ უნდა მოვიქცეთ ან როგორ უნდა მოვქცეულიყავით. დაგროვილი გამოცდილების საფუძველზე შეგვიძლია ავხსნათ ურთიერთობის ფსიქოლოგიის არსი და ახალი ურთიერთობის დაწყებისას შევეცადოთ განვსაზღვროთ ის რისკფაქტორები, რომლებიც წინა შემთხვევაში არ გავითვალისწინეთ.
მამაკაცი – ეს არის ძლიერი სქესის წარმომადგენელი, რომელიც ურთიერთობაში ცდილობს იყოს მაქსიმალურად დომინანტი. ქართულ რეალობაში ამ საკითხს აუცილებელი დატვირთვაც კი აქვს. თავისუფლება ძალიან მნიშვნელოვანია ყველას ცხოვრებაში, როდესაც ძლიერი სქესი თანხმდება, თქვას მასზე უარი, გამოდის, მას აქვს ურთიერთობისგან გარკვეული მოლოდინებიც. ძალიან ბევრი ფსიქოლოგი გვთავაზობს რამდენიმე ძირითად კომპონენტს. მაშ ასე, რა სურთ კაცებს?
იგრძნონ თავი ძლიერებად – ისინი მამაკაცები არიან, შესაბამისად, აუცილებელია მათი ძალაუფლების აღიარება. მამაკაცმა უნდა იგრძნოს, რომ მას ეკუთვნის ბოლო სიტყვა. შეიძლება ფემინისტი იყოთ და სულ არ თანხმდებოდეთ ამას, მაგრამ ეს არ დაანახოთ! ამას ყოველთვის უკურეაქცია მოსდევს, თუმცა გააჩნია შემთხვევასაც, ყველა ინდივიდუალურია.
სითამამე – ურთიერთობაში მათთვის აუცილებელია იგრძნონ თავი თავისუფლად და თამამად. ნუ შეეცდებით მათ ჩარჩოებში მოქცევას, თქვენ ეს მაინც არ გამოგივათ და ამავდროულად ძალიან დაძაბავთ ურთიერთობას.
საკუთარ თავში დარწმუნებული – თქვენთან ურთიერთობისას მამაკაცი აუცილებლად უნდა იყოს საკუთარ თავში დარწმუნებული. ის ძლიერია, თამამია, შესაბამისად, მას აქვს თავდაჯერებულობის მაღალი კოეფიციენტიც. აგრძნობინეთ, რომ ის მართავს, თუმცა არ უთხრათ, რომ თქვენ ხართ კისერი და თქვენ აძლევთ ამის მიმართულებას.
მას სჭირდება ქალი, რომელიც იქნება კარგი მეგობარი, საყვარელი, მოსაუბრე. მოკლედ რომ ვთქვათ, მრავალფეროვანი არსება – ურთიერთობის ფსიქოლოგია დაფუძნებულია, პირველ რიგში, ერთმანეთის გაგებაზე, საერთო ინტერესების გაზიარებაზე. ვინაიდან მამაკაცი მონადირული ინსტინქტებით ხასიათდება, მისთვის ძალიან მნიშვნელოვანია, არ იყოთ ბოლომდე ამოხსნილი ამოცანა, აუცილებელია შეინარჩუნოთ მრავალფეროვნების გარკვეული ხარისხი!
ის გრძნობს პასუხისმგებლობას თქვენ მიმართ – ნამდვილი მამაკაცი აცნობიერებს ურთიერთობის მნიშვნელობას და პასუხისმგებლობას. მისთვის ხართ სუსტი არსება, რომელზეც უნდა იზრუნოს. შესაბამისად, მიეცით სივრცე ამისათვის, მათ თუ სურთ, ყველაფერს გააკეთებენ თქვენთვის.
რაც შეეხებათ ქალებს, ქალები ძალიან ნაზი და სუსტი არსებები არიან. თუ მამაკაცის შემთხვევაში ეს უფრო ინსტინქტებსა და სითამამეში გამოიხატება, ქალების შემთხვევაში აქ მთავარ როლს ემოცია განსაზღვრავს. რა სურთ ქალებს? ეს ის კითხვაა, რომელზე პასუხის გაცემასაც ძალიან ბევრი შეეცადა, თუმცა ამაოდ.
იგრძნონ თავი საჭიროდ – ქალისათვის აუცილებელია იგრძნოს თავი საჭიროდ მამაკაცის ცხოვრებაში. ის ძალიან ემოციურია, ეს ემოციები კი სიყვარულზე, საჭიროების განცდასა და მისი როლის მნიშვნელობაზე გადის. მამაკაცებო! აგრძნობინეთ, რომ ის თქვენთვის ერთადერთია, რომ მის გარეშე ძალიან გაგიჭირდებოდათ და ის ძალიან საჭიროა თქვენი ცხოვრებისათვის!
იგრძნონ თავი დაცულად – „როგორი ძლიერიც უნდა იყოს ქალი, ის თავისზე ძლიერ მამაკაცს ეძებს. და არა იმისთვის, რომ მან ქალს თავისუფლება შეუზღუდოს, არამედ იმისთვის, რომ მისცეს ქალს უფლება – იყოს სუსტი“ – ერიხ მარია რემარკი. ქალს სჭირდება იმის განცდა, რომ ის დაცულია, რომ მის გვერდით არიან და მასზე ზრუნავენ. ის პატარა ბავშვივითაა, რომელიც მფარველს ეძებს. მიეცით მას დაცულობის შეგრძნება.
ბედნიერება – მამაკაცებს ჰგონიათ, რომ ქალის ბედნიერება ამოუცნობი ფენომენია და იმდენად რთული, რომ მისი ახსნა შეუძებელია. სინამდვილეში კი ყველაფერი ძალიან დიდ სიმარტივეშია. ქალისათვის მთავარია უყვარდეთ და ზრუნავდნენ მის ღიმილზე, ბედნიერებაზე, სწორედ ეს არის მათი ბედნიერება! არ დაგავიწყდეთ! აუცილებელია ყურადღება და მზრუნველობა.