მარიამ ფოლადაშვილი

რატომ უნდა მივიღოთ კივი?

1. C და E ვიტამინების გარდა, რომელთაც აქვთ ანტიოქსიდანტური ფუნქცია, კივი ისეთი ნაერთების კარგი წყაროა, როგორებიცაა კაროტინოიდები. კაროტინოიდებს კი ანტიოქსიდანტური და ანთების საწინააღმდეგო ფუნქცია გააჩნიათ.

კივი შეიცავს შემდეგი ტიპის კაროტინოიდებს:

• ლუტეინი;
• ზეაქსანტინი;
• ბეტა კაროტინი

კვლევებმა აჩვენა, რომ კაროტინების, E და C ვიტამინების შემცველი პროდუქტების მიღება ხელს უწყობს ისეთი დაავადებების განვითარების პრევენციას, როგორებიცაა გულის დაავადებები, სიმსივნე და ამცირებს მათგან გამოწვეული სიკვდილის რისკს.

2. არეგულირებს სისხლის წნევას და ამცირებს ათეროსკლეროზის განვითარების რისკს:

კვლევებმა აჩვენა, რომ კივის მიღება ამცირებს სისხლში ქოლესტეროლის, ტრიგლიცერიდების დონეს და ხელს უწყობს კარგი ქოლესტეროლის დონის მომატებას.

კივის მიღება რეკომენდებულია მწეველებისთვის, ვინაიდან ისინი ათეროსკლეროზის განვითარების მაღალი რისკის ქვეშ იმყოფებიან. კივი ხელს უშლის თრომბოციტების აგრეგაციას, შეწებებასა და სისხლძარღვის კედელზე დალექვას, შესაბამისად ამცირებს ათეროსკლეროზის განვითარების რისკს.

3.უნარჩუნებს საჭმლის მომნელებელ სისტემას ჯანმრთელობას:

კივი შეიცავს წყალში ხსნად და უხსნად ბოჭკოს წყალში ხსნადი ბოჭკო მონაწილეობს ნაწლავის სასარგებლო ბაქტერიების ჯანმრთელობის შენარჩუნებაში, ამასთან, არეგულირებს სისხლში შაქრის დონეს. წყალში უხსნადი ბოჭკო კი არეგულირებს ნაწლავის მოქმედებას.

4.აძლიერებს იმუნურ სისტემას და იცავს ორგანიზმს ინფექციებისგან:

კივი C ვიტამინის დიდ დოზას შეიცავს. მისი ყოველდღიური მიღება ხელს უწყობს ორგანიზმში C ვიტამინის დონის გაზრდას. ამ ვიტამინს კი ორგანიზმში მრავალი ფუნქცია გააჩნია, მათ შორისაა:

• ანტიოქსიდანტური თვისებები - იცავს უჯრედებს დაზიანებისგან;
• იმუნური სისტემის გაძლიერება - C ვიტამინი აუმჯობესებს იმუნური უჯრედების ნეიტროფილების ფუნქციას. ნეიტროფილები კი ორგანიზმს პათოგენებისა და ინფექციებისგან იცავს

როგორც წესი, კივის რეგულარული მოხმარება არ შეიცავს რაიმე საფრთხეს. თუმცა, მისი მოხმარებისას სიფრთხილე უნდა გამოიჩინონ იმ პირებმა, რომელთაც აქვთ ალერგიისკენ მიდრეკილება.