როგორ დავიცვათ თავი ზაფხულში ნაკბენებისას
კარგი იქნება, თუ ინფორმირებული ვიქნებით თითოეული შემთხვევის შესახებ და გვეცოდინება სწორად მოქცევის წესები:
გველის ნაკბენი
ამ დროს ორგანიზმში ხვდება შხამი, რის შედეგადაც შეიძლება განვითარდეს მძიმე ალერგიული რეაქცია, ძლიერი ანთება და ლეტალური გამოსავალიც კი.
საშიში და საყურადღებოა არაშხამიანი გველის ნაკბენიც, რადგანაც გველები ზოგადად იკვებებიან ბაყაყებით, თაგვებით, ხვლიკებით. პირში რჩება და ლპება მათი ნარჩენები. და თუ გველი არ არის შხამიანი, ის მაინც აფრქვევს კანქვეშ, ღრმად დაუცველ ქსოვილებში თავის ნერწყვს ლპობის პროდუქტებით და ინფექციური აგენტებით. ამიტომ შესაძლებელია ძლიერი ანთების განვითარება.
რა გავაკეთოთ:
-ჭრილობა დაიბანეთ სუფთა წყლით და დაიდეთ ცივი.
- უნდა დალიოთ დიდი რაოდენობით წყალი ინტოქსიკაციის შესამცირებლად;
-აუცილებელია სამედიცინო დაწესებულებაში მიმართვა, სადაც დაზარალებულს აღმოუჩენენ შესაბამის დახმარებას.
რისი გაკეთება არ შეიძლება
-ნაკბენ ადგილზე მჭიდრო ნახვევის დადება
-პირით შხამის ამოწოვა. თუ პირში არის ჭრილობები, კარიესული ღრუები, მათში შხამის მოხვედრა დაამძიმებს მდგომარეობას.
ცხოველების (კატა, ძაღლი, ციყვი, ზღარბი, მელია) ნაკბენი
საშიშია ცოფით დასნებოვნების თვალსაზრისით. ადამიანისთვის ინფექცია ლეტალურია შემთხვევათა 100%-ში, თუ დროულად არ გაკეთდა შესაბამისი აცრა.
უნდა გვახსოვდეს, რომ ცოფის ვირუსი გროვდება ნერწყვში. ამიტომ ადამიანი შეიძლება დასნებოვნდეს კანის ზედაპირის დადორბვლისას, სადაც არის ჭრილობა, მიკრონახეთქები.
რა გავაკეთოთ
-ჭრილობა დავიბანოთ სუფთა გამდინარე წყლით და მივმართოთ სამედიცინო დაწესებულებას ანტირაბიული შრატის გასაკეთებლად.
ტკიპების ნაკბენი
სახიფათოა, რადგანაც შეიძლება ტკიპისმიერი ენცეფალიტით, ბორელიოზით, ყირიმ-კონგოს ჰემორაგიული ცხელებით დასნებოვნება.
რა გავაკეთოთ
-მაქსიმალურად ფრთხილად ამოვიღოთ ტკიპი კანიდან
-ჭრილობა დავამუშავოთ ანტისეპტიკური ხსნარით, დავკვირდეთ ჯანმრთელობის მდგომარეობას, ნაკბენ ადგილს და პირველივე საჭვო სიმპტომებისას, მივმართოთ ექიმ-ინფექციონისტს.