შეიცავს ანტიოქსიდანტებს და სხვა ნივთიერებებს, რომლებიც დადებით გავლენას ახდენს იმუნურ სტატუსზე - შოკოლადის სასარგებლო თვისებები
ჭარბი შოკოლადი ხშირად მათაც კი ვნებს, ვინც ადრე შესანიშნავად იტანდა ამ ნუგბარს.
შოკოლადი მასტიმულირებელ ნივთიერებებს - კოფეინსა და თეობრომინს შეიცავს. კოფეინი იწვევს პულსის აჩქარებას, უძილობას (განსაკუთრებით - შავი შოკოლადი), წნევის აწევას, სადღეEსასწაულო განწყობის გავლენით ისედაც აღგზნებულ ბავშვს უფრო მეტად აღაგზნებს, ააქტიურებს. შოკოლადი და, საზოგადოდ, ტკბილეული ხომ, პირველ რიგში, ნახშირწყლებია, ნახშირწყლები კი ენერგიის წყაროა. 100 გრამი შოკოლადის ფილა 500-600 კალორიას შეიცავს.
მისი თითქმის 30%-მდე მცენარეული ცხიმია, ხოლო 50% - ნახშირწყლები. ენერგიის ძირითადი წყარო შოკოლადში შემავალი რძე და გლუკოზაა, რომლებიც ორგანიზმში სწრაფად იშლება. თუ ბავშვს შოკოლადის ინგრედიენტების აუტანლობა აქვს, კანფეტი გამონაყარს გაუჩენს. შოკოლადი, მით უმეტეს - დიდი რაოდენობით, პროვოცირებას უწევს თავის ტკივილის შეტევას. მიზეზი ტანინია - ის სისხლძარღვებს ავიწროებს და თავის ტვინის ჟანგბადით მომარაგებას აფერხებს, ეს თავის ტკივილს იწვევს. ტანინი ნაწლავებზეც მოქმედებს, ამიტომ შოკოლადის ჭარბმა მიღებამ შესაძლოა ფაღარათი გამოიწვიოს.
გარდა ამისა, შოკოლადის კანფეტის ზოგიერთი ინგრედიენტი, როგორც, საზოგადოდ, ტკბილეული, აძლიერებს კუჭის წვენის სეკრეციას (გამოყოფას), განსაკუთრებით იმ ბავშვებში, რომლებსაც ვეგეტატური ნერვული სისტემის მხრივ დარღვევები აქვთ. მათ შოკოლადის ჭარბი მიღების შემდეგ შესაძლოა გულძმარვა, გულისრევა ან კუჭის ტკივილი დაეწყოთ. ისე ნუ გაიგებთ, თითქოს შოკოლადი მავნებელია და საერთოდ უნდა ავუკრძალოთ ბავშვებს. პირიქით, ის აუცილებელიც კია - თანამედროვე მონაცემებით, მაღალხარისხიანი შოკოლადი (განსაკუთრებით - შავი) მეტად სასარგებლო პროდუქტია.
შეიცავს ანტიოქსიდანტებს და სხვა სასარგებლო ნივთიერებებს, რომლებიც დადებით გავლენას ახდენს იმუნურ სტატუსზე, ნივთიერებათა ცვლაზე, ხელს უშლის ინფექციურ დაავადებათა, სიმსივნურ პათოლოგიათა აღმოცენება-განვითარებას. ასე რომ, ნუ მოაკლებთ პატარებს ამ სიამოვნებას, მეტადრე - ახალ წელს. უბრალოდ, გაითვალისწინეთ ბავშვის ორგანიზმის თავისებურებები და ყურადღება მიაქციეთ ულუფას.