რომელი ჩვევები იწვევს გულის შეტევას
გულთან დაკავშირებული პრობლემების გამომწვევ ერთ-ერთ ფაქტორად დასახელდა საკვების ყოველდღიურად სახლის გარეთ მიღება. რესტორანსა და კაფეში ადამიანი ხშირად ირჩევს არაჯანსაღ საკვებს. ექსპერტები გვირჩევენ უარი ვთქვათ თეთრ პურზე, კოკქტეილებზე და უპირატესობა მივანიჭოთ ჯანსაღ საკვებს, ასევე შევუკვეთოთ საკვების მცირე ზომის ულუფები.
გულის სიჯანსაღის შესანარჩუნებლად მედიკოსები ვარჯიშს გვირჩევენ კვირაში არა ნაკლებ 2-3 საათისა. ეს ხელს შეუწყობს წნევის მოწესრიგებას და დააქვეითებს ქოლესტერინის დონეს სისხლში. მედიკოსები მოგვიწოდებენ ალკოჰოლის მოხმარების შეზღუდვასა და სტრესის თავიდან აცილებას.
აუცილებლად უნდა ვთქვათ უარი თამბაქოზე. სიგარეტის კვამლის ყოველი შესუნთქვისას, ორგანიზმში ხვდება ხუთი ათასზე მეტი ქიმიური ნივთიერება, რომელთა უმრავლესობაც მავნეა.
ექიმები გვახსენებენ, რომ გულის შეტევის გავრცელებული სიმპტომებია: გულმკერდის არეში ტკივილი ან დისკომფორტი, სისუსტე, თავბრუსხვევა ან გულისწასვლა, ტკივილი, დისკომფორტი ყბის, კისრის, ზურგის, ხელების, მხრების მიდამოში, ასევე ქოშინი, ჰაერის უკმარისობა, ოფლი, ღებინება.