ნანა კალანდაძე

სიცივეს ყველა ერთნაირად როდი იტანს. ბევრი, თუ საშუალება აქვს, ზამთარში შვებულებას თბილ ქვეყნებში ატარებს, რათა ცოტა ხნით მაინც დაივიწყოს ქუჩებში მოთარეშე სუსხიანი ქარი, მოსაწყენი, ცივი საღამოები. მაგრამ შორეულ ქვეყნებში გამგზავრება სულაც არ არის აუცილებელი. სავსებით შესაძლებელია, სიცივეს, ყინვას, ქარს ისე გაუმკლავდეთ, რომ თავი საკუთარ სახლშიც კომფორტულად იგრძნოთ.

* უპირველეს ყოვლისა, შეიძინეთ კომფორტული, თბილი და ამავე დროს მსუბუქი ტანსაცმელი: ბუმბულით ამოვსებული ქურთუკი ან ჟილეტი, შალის თბილი, სასიამოვნო ფერის სვიტერი, ფაფუკი კაშნე. მათი შეხედვაც კი გაგათბობთ. გამოცდილი ადამიანები ამბობენ, რომ ის, ვისაც ფეხები თბილად აქვს, არასოდეს გაიყინება. ექიმებიც აღნიშნავენ, რომ როცა კაცს ფეხებზე სცივა, მთელი ტანი ადვილად უცივდება. გაითვალისწინეთ ეს და ჩაიცვით წინდები, რომლებიც სითბოს ინარჩუნებს. მცივანა ადამიანებმა სასურველია შეარჩიონ ისეთი საზამთრო ფეხსაცმელი, რომელიც შიგნიდან ბეწვით არის დათბილული ან სპეციალური საფენები აქვს ჩაფენილი. თუმცა თბილი ფეხსაცმელი ზამთარში მხოლოდ მცივანებს როდი სჭირდებათ - ის ყველასთვის აუცილებელია. ასევე უნდა შეირჩეს საშინაო თბილი ჩუსტებიც. თუ ფეხი თბილად გექნებათ, თავიდან აიცილებთ შარდის ბუშტის, სასქესო ორგანოების გაციებას, ანთებით პროცესებს.

* ქუჩაში ძალიან შეგცივდათ და თავს ცუდად გრძნობთ? შინ შესვლისთანავე მიიღეთ ცხელი აბაზანა ან შხაპი. შემდეგ ფუმფულა ხალათში გაეხვიეთ და ცხელი ჩაი დალიეთ.

* ღამით გასათბობად შეგიძლიათ გამოიყენოთ ყველაზე საიმედო და ნაცადი საშუალება - სათბურა. რეზინის სათბურას აუცილებლად ჩამოაცვით ქსოვილისაგან შეკერილი სპეციალური შალითა, რათა არ დაიწვათ. თუ ელექტრონულ სათბურას იყენებთ, ფრთხილად იყავით - მასთან ერთად არ დაგეძინოთ!

* გსურთ, გათბეთ და სასიამოვნო განწყობაც შეიქმნათ? დალიეთ ცხელი შოკოლადი. ერთი ფინჯანი ტკბილი სასმელი გაგათბობთ, ძალების მოკრებასა და მოდუნებაში დაგეხმარებათ. ცხელი შოკოლადი აუჩქარებლად, მცირე ყლუპებით უნდა სვათ, რათა იგრძნოთ, როგორ ედება სითბო და სასიამოვნო განცდა მთელ სხეულს.

* კვების რაციონში აუცილებლად ჩართეთ წიწაკა. ცხარე ჩილი ასტიმულირებს სისხლის მიმოქცევას, ათბობს და ენერგიით ავსებს მთელ ორგანიზმს. მისი გემო თავიდან გვაცილებს აპათიას და მელანქოლიას.

ზამთრის ერთფეროვანი დღეები ადამიანთა უმრავლესობას დეპრესიაში აგდებს. დიახ, ჩვენ არ ძალგვიძს, ბუნებას ნათელი ფერები დავუმატოთ. სამაგიეროდ, შეგვიძლია ინტერიერი გავახალისოთ, საყვარელი ფერებით გავამდიდროთ, გავათბოთ. მაგალითად, საწოლს ატმისფერი გადასაფარებელი გადავაფაროთ, მაგიდაზე ცისფერი ლარნაკი დავდგათ, ფანჯარაზე ფორთოხლისფერი ფარდა ჩამოვკიდოთ... ერიდეთ ადამიანებს, რომლებსაც მუდამ მელანქოლიური განწყობა აქვთ. ერიდეთ ნებისმიერ უარყოფით ინფორმაციას. უყურეთ მხოლოდ ისეთ გადაცემებს, რომლებიც თქვენში დადებით ემოციებს გამოიწვევს. იკითხეთ წიგნები და საყვარელი ჟურნალები, ნახეთ კომედიური ფილმები. ხშირი ურთიერთობა გქონდეთ მეგობრებთან. ხანდახან შოპინგიც არ გაწყენთ. თუ ამ რჩევებს გაითვალისწინებთ, ცივი და მოსაწყენი ზამთრის გადატანა არასოდეს გაგიჭირდებათ.