მარიამ ფოლადაშვილი

ბავშვის ტვინი ზრდასრულთან შედარებით გაცილებით მგრძნობიარეა და ცხელების ფონზე, როდესაც ტემპერატურა 38 გრადუსზე მეტია, შესაძლოა თავის ტვინში წარმოიქმნას პათოლოგიური ელექტრული აქტივობა. სწორედ ეს იწვევს გულყრას.

მარტივი ფებრილური გულყრა 15 წუთზე ნაკლებ ხანს გრძელდება და 24 საათის განმავლობაში არ მეორდება, რთული ფებრილური გულყრა კი 30 წუთამდე გასტანს და შესაძლოა, მომდევნო 24 საათის განმავლობაშიც გამეორდეს.

მიუხედავად იმისა, რომ გულყრას საკმაოდ მძიმე სიმპტომები ახლავს, თავის ტვინის დაზიანებას და გონებრივ ჩამორჩენილობას არ იწვევს.

მაღალი ტემპერატურის დროს გულყრა ყველა ბავშვს არ ემართება. ეს ნერვული სისტემის თავისებურებაზეა დამოკიდებული. თუმცა, არსებობს ფაქტორები, რომელთა არსებობისას გულყრის განვითარების რისკი იზრდება, მათ შორისაა:ინფექციები (განაკუთრებით ვირუსული), გენეტიკური ფაქტორი, რკინის დეფიციტი.

რა უნდა გავაკეთოთ კრუნჩხვის დროს:

• გამოიძახეთ სასწრაფო დახმარება;
• შეინარჩუნეთ სიმშვიდე;
• ნუ შეანჯღრევთ ბავშვს, მოერიდეთ სახეში წყლის შესხმას;
• დააწვინეთ ბავშვი მარჯვენა ან მარცხენა გვერდზე, რათა არ გადასცდეს ნერწყვი ან ამონაღები მასა;
• გაათავისუფლეთ სხეული მოჭერილი ტანსაცმლისაგან;
• თავქვეშ ამოუდეთ ბალიში;
• ნუ ეცდებით გაუხსნათ პირი ან გამოაწევინოთ ენა ძალის გამოყენებით(,,ენის გადაყლაპვა“ მითია);
• ნუ ეცდებით კიდურების კრუნჩხვითი მოძრაობის შეკავებას;
• არ დაალევინოთ სითხე ან მედიკამენტი, სანამ არ დაწმუნდებით რომ ბავშვი ბოლომდე გამოფხიზლებულია;
• გამოაღეთ ფანჯარა