პირველი დახმარება მზის დაკვრის დროს

პაპანაქება სიცხეში ძალიან ადვილად ვითარდება როგორც მზის, ასევე სითბური დაკვრა, სამწუხაროდ, ამას ადამიანები ნაკლებად ითვალისწინებენ და საათობით იმყოფებიან მზის ქვეშ. არა და ორგანიზმი მზის პირდაპირი სხივების მოქმედებით გადახურებას განიცდის.

თუ განვითარებულ სიმპტომებს დროულად არ მიაქცევთ ყურადღებას და არ მიიღებთ სათანადო ზომებს, მზის სხივების ზემოქმედებით გამოწვეული ცვლილებები ორგანიზმში შესაძლოა სახიფათო აღმოჩნდეს, დაწყებული კომით, დამთავრებული გულის გაჩერებით.

თუ თქვენს წინაშე ადამიანმა მზის დაკვრა მიიღო, აუცილებლად უნდა დაიწყოთ მის გადასარჩენად მოქმედება, გამოიძახოთ სასწრაფო დახმარების ბრიგადა, მის მოსვლამდე კი:

• დაზარალებული უნდა გადაიყვანოთ გრილ ადგილას და გახადოთ ზედა სამოსი;
• სასურველია მთელ სხეულზე შემოახვიოთ სველი ნაჭერი; ნაჭერში შეგიძლიათ შეახვიოთ ყინულები და დაადოთ კისრისა და შუბლის არეში;
• თუ ადამიანმა ცნობიერება (გონი) დაკარგა, გვერდზე უნდა გადააბრუნოთ;
• თუ მზის დაკვრამდე დაზარალებული საკვებს მიირთმევდა, აუცილებელია ფრთხილად გაუღოთ პირი და სველი საწმენდით ამოაცალოთ საკვების ნარჩენები, რათა თავისუფლად ისუნთქოს და არ გადასცდეს სასუნთქ გზებში.

თინათინ გოცაძე