”მკურნალის” რედაქცია

შესანახი პროდუქტი უნდა იყოს საღი და ახალი. ყურადღება უნდა მივაქციოთ შესაფუთ მასალას. ის პარკები, რომლითაც პროდუქტები სუპერმარკეტიდან მოგაქვთ, გაყინვისთვის არ გამოგადგებათ. უმჯობესია პროდუქტები გაყინოთ სპეციალურ კონტეინერებში. შეიძლება გამოვიყენოთ ფოლგაც, თუმცა ის უნდა იყოს სქელი, რომ არ გაიხეს. საყინულეში მოთავსებულ ყველა პროდუქტს გაუკეთეთ მარკირება, რა პროდუქტია და როდისაა გაყინული. უნდა გავითვალისწინოთ რომელი პროდუქტის გაყინვა შეიძლება და რომლის არასასურველია.

ბოსტნეული

ახალ ბოსტნეულს ასუფთავებენ, რეცხავენ, ჭრიან, მოწალავენ (მდუღარე წყალში ჩაშვება რამოდენიმე წუთით) და ყინავენ ულუფებად. მოწალვის პროცესი მოქმედებს ბოსტნეულში არსებულ ნატურალურ ფერმენტებზე, რომლებმაც გაყინვისას შეიძლება შეცვალოს ბოსტნეულის გემო, ფერი და ხარისხი. ჭარხალი უნდა გავყინოთ მოხარშული და გახეხილი. სტაფილო შეიძლება გავყინოთ როგორც უმ, ისე მოხარშულ, გახეხილ ან დაჭრილ მდგომარეობაში იმ კერძებიდან გამომდინარე, რაშიც გინდათ გამოიყენოთ. წიწაკას ჭრიან ნაჭრებად და ყინავენ უმ ან მოწალულ მდგომარეობაში. პომიდორის გაყინვაც შესაძლებელია, თუმცა უნდა გავითვალისწინოთ, რომ ის უნდა გამოვიყენოთ კერძების მოსამზადებლად, რადგანაც კარგავს სიმკვრივეს. შეიძლება პომიდორი გავყინოთ რგოლებად დაჭრილი (პიცისთვის), მეოთხედებად (ბოსტნეულის კერძებისთვის) და მთლიანი (თუ ასეთ პომიდორს ცხელი წყლის ქვეშ მოვათავსებთ შესანიშნავად ეცლება კანი). ბადრიჯანი, მწვანე ლობიო გაყინივის წინ უნდა მოიწალოს.

როგორ გავყინოთ ბულგარული წიწაკა: ბულგარული წიწაკა გარეცხეთ, გაასუფთავეთ თესლისაგან, მოაჭერით ყუნწი, დაჭერით ისე, როგორც მოგწონთ და განათვსეთ კონტეინერებში.

როგორ გავყინოთ ბადრიჯანი: გარეცხეთ ბადრიჯანი, გაამშრალეთ, მოაჭერით ყუნწი, დაჭერით 5 მმ სისქის ნაჭრებად, მოაყარეთ მარილი და გააჩერეთ ნახევარი საათი. გადაავლეთ წყლი და ჩაუშვით მდუღარე წყალიში 2-3 წუთით. გადაიტანეთ ცივ წყალში, ცოტა ხანი გააჩერეთ და გააშრეთ ქაღალდის ხელსახოცზე. დააწყვეთ შემდეგ დაფაზე ერთ ფენად და მოათავსეთ საყინულეში 3-4 საათი, რის შემდეგაც განათავსეთ კონტეინერებში. შეიძლება გაიყინოს შემწვარი ბადრიჯანიც, რომელსაც მოათავსებთ ფოლგაში ან კონტეინერებში.

ხილი

ვაშლს, მსხალს, ატამს გაყინვისას სჯობს შევაპკუროთ ლიმონის წვენი. გარგარი და ქლიავი გაყინეთ ნახევარ-ნახევარ მდგომარეობაში, კურკის გარეშე. არ ღირს ბანანის, ნესვის, ციტრუსების გაყინვა.

როგორ გავყინოთ მარწყვი

გადაარჩიეთ მწიფე კენკრა, თეთრი და მწვანე ბოლოებიანი და გადამწიფებული ნაყოფი გასაყინად არ გამოდგება. კარგად გარეცხეთ, გააშრეთ, მოათავსეთ ერთ ფენად დაფაზე, შედგით 3-4 საათი საყინულეში და შემდეგ გადაიტანეთ კონტეინერებში. შეიძლება შაქართან ერთად გაყინოთ (150 გრამი შაქარი, კილოგრამ ხილზე), აურიეთ შაქრის გადნობამდე, გადაიტანეთ კონტეინერებში და მოათავსეთ საყინულეში.

როგორ გავყინოთ ჟოლო

ჟოლო კარგად გავრეცხოთ, დავაწყოთ ქაღალდის პირსახოცზე ერთ ფენად და გავაშროთ. საყინულეში მოათავსეთ ბრტყელ ზედაპირზე ერთ ფენად 24 საათი, რის შემდეგაც გადაიტანეთ კონტეინერში და მოათავსეთ საყინულეში.

ჟოლოს შაქართან გაყინვის მეთოდი

კარგად გარეცხილი კენკრა გააშრეთ, მოათავსეთ საყინულეში 24 საათი, გადაიტანეთ კონტეინერში, დააყარეთ შაქარი (300 გრამი 1 კილოგრამ ჟოლოზე), შეანჯღრიეთ და მოათავსეთ საყინულეში. შეინახეთ არაუმეტეს 1 წლისა.

როგორ გავყინოთ მოცხარი

მწიფე შავი და წითელი მოცხარი, დავარჩიოთ, გავრეცხოთ და გავაშროთ. თხელ ფენად დავაწყოთ დაფაზე, მოვათვასოთ საყინულეში 5-6 საათი. თუ გნებავთ დაუმატეთ შაქარი (200 გრამი 1 კილო კენკრაზე). შემდეგ გადაიტანეთ კენკრა კონტეინერში და შეინახეთ საყინულეში 1 წლამდე. ასეთივე მეთოდით შეგიძლიათ შეინახოთ მოცვი, მაყვალი, ხურტკმელი.

როგორ გავყინოთ ბალი და ალუბალი

ბალი და ალუბალი გადავარჩიოთ, მოვაშოროთ მკვახე და გადამწიფებული ნაყოფი, გავრეცხოთ, გავაშროთ ქაღალდის პირსახოცზე. შეიძლება მათი გაყინვა კურკითაც და უკურკოდაც. მოათავსეთ კონტეინერებში და შეინახეთ 9 თვემდე.

მნიშვნელოვანია ვიცოდეთ პროდუქტის სწორად გალღობაც. ეს პროცესი უნდა იყოს ნელი და უმჯობესია მაცივარში განხორციელდეს. შეგიძლიათ სამზარეულოს მაგიდაზეც მოათავსოთ გაყინული პროდუქტი, მაგრამ ნუ ამოიღებთ კონტეინერიდან. გამლღვარი პროდუქტი მაშინვე გამოიყენეთ. ხელახლა მისი გაყინვა აღარ შეიძლება.

ლალი ჩხიკვაძე