შეგიძლიათ, გოგრის თესლი ნებისმიერ დროს მიირთვათ, იქნება ეს საუზმე, სადილი თუ წახემსება. თუმცა იმის მიხედვით, თუ დღის რომელ მონაკვეთში მიირთმევთ გოგრის თესლს, ის ჯანმრთელობისთვის სასარგებლო სხვადასხვა თვისებებს ავლენს. ამიტომ, თავად უნდა გადაწყვიტოთ გოგრის თესლის მირთმევა რა მიზნით გსურთ — ენერგიისთვის, იმუნიტეტისთვის, საჭმლის მონელებისთვის, ვარჯიშისა თუ კარგი ძილისთვის.

ენერგიისთვის

გოგრის თესლი შეიცავს მრავალფეროვან ნუტრიენტებს, რომლებიც ორგანიზმში ენერგიის დონის ცვალებადობაზე გავლენას ახდენს. დილის კვებაში გოგრის თესლის დამატება ენერგიის მატებას უზრუნველყოფს, ასევე ფოკუსირებასა და პროდუქტიულობის ზრდაშიც დაგეხმარებათ. გოგრა შეიცავს:

ჯანსაღ ცხიმებს — გოგრის თესლი მდიდარია უჯერი ცხიმებით, რომლებიც ორგანიზმში ენერგიის წყარო ხდება.

ცილას — გოგრის თესლი მცენარეული ცილის კარგი წყაროა, რაც ხელს უწყობს ენერგიის სტაბილური დონის შენარჩუნებასა და დანაყრების შეგრძნების გაძლიერებას.

B ჯგუფის ვიტამინებს — გოგრის თესლი მდიდარია რამდენიმე B ვიტამინით — B1 (თიამინი), B2 (რიბოფლავინი), B3 (ნაიაცინი) და B12 (კობალამინი). ეს ვიტამინები მონაწილეობენ ენერგიის მეტაბოლიზმსა და ტვინის ფუნქციონირებაში, ასევე დაღლილობის შემცირებასაც უწყობენ ხელს. ჩამოთვლილი ვიტამინები წყალში ხსნადია, რაც იმას ნიშნავს, რომ ორგანიზმში არ გროვდება და ჭარბი რაოდენობა შარდით გამოიდევნება. ასე რომ, გოგრის თესლის მიღება დაგეხმარებათ, ორგანიზმში ვიტამინების საჭირო რაოდენობა უზრუნველყოთ.

დილით ენერგიის ასამაღლებლად შეგიძლიათ გოგრის თესლი დაამატოთ შვრიას, იოგურტს ან აურიოთ საუზმეში, რითაც თქვენს რაციონში ჯანსაღი ნუტრიენტების რაოდენობას გაზრდით. გოგრა მდიდარია მაგნიუმით, რომელიც საკვების ენერგიად გარდაქმნის პროცესში დიდ როლს ასრულებს. გოგრაში ასევე შედის რკინა, რომელიც აუცილებელია ჟანგბადის მთლიან სხეულში მოძრაობისთვის. რაციონში გოგრის თესლის ჩართვა ორგანიზმს რკინის საკმარისი დონის შენარჩუნებაში დაეხმარება.

იმუნიტეტისთვის

გოგრის თესლი ბუნებრივი გზაა თქვენი იმუნური სისტემის გასაძლიერებლად, რადგან ის თუთიით მდიდარია. თუთიის მიღება კი დღის ნებისმიერ დროს სასარგებლოა. გოგრის თესლი ასევე დიდი რაოდენობით შეიცავს ანტიოქსიდანტებს, როგორებიცაა A, C და E ვიტამინები, რომლებიც იმუნურ სისტემას აძლიერებს და ინფექციებსაც ებრძვის. ზოგიერთი კვლევის მიხედვით, გოგრა და მისი თესლი შესაძლოა კლასიფიცირდეს როგორც "ფარმა საკვები" — ბუნებრივი საკვები, რომელიც გარკვეული მედიკამენტების მსგავს სამკურნალო და ფუნქციურ სარგებელს იძლევა.

საჭმლის მონელებისთვის

გოგრის თესლი ითვლება ადვილად მოსანელებელ პროდუქტად, რაც იმას ნიშნავს, რომ ის ეფექტურად იშლება ორგანიზმში და ხელს უწყობს საკვები ნივთიერებების მაქსიმალურ შეწოვას. ბევრ სხვა პროდუქტთან შედარებით, გოგრის თესლს ნორმალურზე მაღალი მონელების სიჩქარე აქვს. ადვილი მონელებისა და სწრაფი შეწოვის მიზეზებია ბოჭკოვანი ნივთიერებების შემცველობა და ნუტრიენტების შემადგენლობა. გოგრის თესლი მდიდარია საკვები ბოჭკოებით, რომლებიც ხელს უწყობს ჯანმრთელ მონელებას და ნაწლავთა რეგულარულ მოქმედებას. ასევე, გოგრის თესლი შეიცავს სასარგებლო ცხიმებს, ცილებს, ვიტამინებსა და მინერალებს, რომლებიც გავლენას ახდენს ორგანიზმის მონელებისა და შეწოვის პროცესებზე. მონელების ფუნქციის გასაუმჯობესებლად, გოგრის თესლი შეგიძლიათ მიირთვათ დილით — როგორც საუზმეში დამატებული ინგრედიენტი ან როგორც დილის მსუბუქი ხემსი.

ვარჯიშისთვის

გოგრის თესლი წარმოადგენს ცილისა და მაგნიუმის კარგ წყაროს, რაც ხელს უწყობს კუნთების აღდგენას და ვარჯიშის შემდეგ ოფლიანობის შედეგად დაკარგული მინერალების შევსებას. იგი შეიცავს ცხრა აუცილებელ ამინომჟავას და ჯანსაღ ცხიმებს, რომლებიც კუნთების აღდგენის პროცესს ეხმარება. გოგრის თესლი შეიძლება იყოს შესანიშნავი ხემსი ვარჯიშის შემდეგ — შეგიძლიათ მოაყაროთ იოგურტს ან დაუმატოთ ხილს, რაც ფიზიკური დატვირთვის შემდეგ ორგანიზმის სწრაფ აღდგენაში დაგეხმარებათ.

კარგი ძილისთვის

გოგრის თესლი მნიშვნელოვანი წყაროა ტრიპტოფანისთვის — ამინომჟავასთვის, რომელიც გარდაიქმნება სეროტონინად და მელატონინად — ჰორმონებად, რომლებიც ხელს უწყობს მშვიდ და ხარისხიან ძილს. კვლევების მიხედვით, დღეში დაახლოებით 1 გრამი ტრიპტოფანის მიღებამ ძილის ხარისხი შეიძლება გაგიუმჯობესოთ. გარდა ამისა, გოგრის თესლში არსებული მაგნიუმი მნიშვნელოვანია კუნთების მოდუნებისა და ნერვული სისტემის დამშვიდებისთვის, ხოლო თუთია ხელს უწყობს მელატონინის გამომუშავებას. ძილის ხარისხის გასაუმჯობესებლად, მიირთვით გოგრის თესლი საღამოს ან ძილის წინ მცირე წახემსების სახით — ცალკე, ბერძნულ იოგურტთან ან ხილთან ერთად.

გოგრის თესლი მდიდარია აუცილებელი საკვები ნივთიერებებით, მათ შორის — ცილით, ბოჭკოებით, მაგნიუმით, თუთიით და ჯანსაღი ცხიმებით. ერთი მუჭა სტანდარტული ულუფა (დაახლოებით, 30 გრამი) შეიცავს:

• 166 კალორიას;
• 2 გრამ ცხიმს;
• 9 გრამ ცილას;
• 1.5 გრამ ბოჭკოს.

გოგრის თესლი ყოველდღიურ რაციონში ჯანსაღი დანამატია, თუმცა მისი მიღება საჭიროა გონივრული რაოდენობის ფარგლებში, რადგან საკმაოდ მაღალი კალორიულობით ხასიათდება. გოგრის თესლის მოხმარება უნდა შეზღუდოთ ან მთლიანად უნდა ამოიღოთ, თუ:

• გოგრაზე ან გოგრის თესლზე (ან სხვა თესლებზე) ალერგია გაქვთ;
• მიდრეკილი ხართ თირკმლის კენჭების წარმოქმნისკენ — გოგრის თესლი შეიცავს მაღალი ოდენობით ოქსალატებს;
• მონელების პრობლემები გაწუხებთ — განსაკუთრებით, ბოჭკოს მონელება.