კომპიუტერის კლავიატურაზე ბევრად მეტი ბაქტერიაა, ვიდრე უნიტაზზე
საფუძვლიანი ანალიზი ჩაატარეს. აღმოჩნდა, რომ კლავიატურაზე უნიტაზთან შედარებით 20 ათასით მეტი მიკრობი ბინადრობს, კომპიუტერის თაგუნა (ე.წ მაუსი) კი 45 ათასით მეტ მავნე არსებას მოიცავს, ვიდრე უნიტაზი. რაც მთავარია, ზოგიერთი მათგანის განადგურება პრაქტიკულად შეუძლებელია, ისინი არ ემორჩილებიან ანტიბიოტიკების მოქმედებას.
განგაშის ატეხას აზრი არ აქვს - გვირჩევენ სპეციალისტები. კარის სახელურები, მოაჯირები, საზოგადოებრივი ტრანსპორტი ასეთივე ინფექციის ბუდე და სხვადასხვა მიკროორგანიზმთა წყაროა.
სრული სტერილობა მხოლოდ ბაქტერიციდული ნათურების ულტრაიისფერი გამოსხივებისა და ძლიერი ანტისეპტიკური საშუალებების წყალობით მიიღწევა, თუმცა ამ დროს ორგანიზმისთვის სასარგებლო ბაქტერიებიც იღუპება. შესაბამისად, ამ მეთოდებით ბაქტერიებისგან თავდაცვა ვერც ხერხდება და არც ღირს.
მთავარი ჰიგიენის წესების მკაცრად დაცვაა. აუცილებელია სისტემატურად და ხარისხიანად დავიბანოთ ხელები, გარედან სახლში დაბრუნებისთანავე, კომპიუტერთან მუშაობის შემდეგ, საჭმლის წინ და სხვა, ასევე აუცილებლად კარგად უნდა გავრეცხოთ ხილი და ბოსტნეული საკვებად გამოყენების წინ.
თინათინ გოცაძე