თუ უჩივით წონის მატებას, კანის პრობლემებს, ყურადღების დეფიციტს, ეს სტატია წაიკითხეთ

დროულად დაძინებას რომ უდიდესი მნიშვნელობა აქვს, ამაზე ბევრი იწერება. ზოგს ჰგონია, რომ დილით, თუნდაც შუადღემდე გამოძინება, აბალანსებს (აკომპენსირებს) ღამით დაგვიანებულ (გადაცილებულ) საათებს. სინამდვილეში ასე არ არის! ადამიანს, რომელსაც 21:00 საათიდან დილის 5:00 საათამდე სძინავს, სრულიად განსხვავებული ძილის სტრუქტურა აქვს, ვიდრე იმას, ვინც ღამის 03:00 საათზე იძინებს და დილით 11:00 იღვიძებს. ძილს სხვა ფუნქციებთან ერთად აღმდგენი ფუნქციაც აქვს, რაც უფრო გვიან ვწვებით დასაძინებლად, მით უფრო ვიკლებთ ორგანიზმისთვის ამ მნიშვნელოვან აღმდგენ პროცესებს, გარდა ამისა, ზიანსაც ვაყენებთ ჯანმრთელობას.

რას იწვევს გვიან დაძინება?
წონის მატებას - კვლევებით დადასტურებულია, რომ ყოველი დაკარგული საათი ზრდის სხეულის მასის ინდექსს. არ იფიქროთ - დილით გამოძინებით ნორმაში მოიყვანთ სხეულის დარღვეულ პროცესებს.

ცუდ განწყობასა და გაღიზიანებადობას - რაც უფრო ადრე იძინებს ადამიანი, მით უფრო ნაკლებად აგრესიული და ფეთქებადია ის. ნეგატიური ფიქრებისაგან გათავისუფლებისა და სულიერი წონასწორობის აღდგენისათვის დიდი მნიშვნელობა აქვს დროულად დაძინებას.

ყურადღების დეფიციტს - ძილის დარღვევა, კერძოდ, გვიან დაწოლა, უარყოფითად მოქმედებს მეორე დღეს ყურადღების კონცენტრაციაზე, თუნდაც 8 საათს ან მეტხანს იძინოთ. მეორე დღეს აქტიურობისა და პროდუქტიულობისათვის წინა ღამეს დროულად უნდა დაწვეთ დასაძინებლად.

კანის პრობლემებს - სრულფასოვანი ძილი აღადგენს კანის დაზიანებულ უჯრედებს, შესაბამისად, ის კანის ახალგაზრდობის განმსაზღვრელი ერთ-ერთი მნიშვნელოვანი ფაქტორია. გვიანი ძილის მოყვარულებს მოყვითალო, არაჯანსაღი ფერისა და სტრუქტურის კანი აქვთ.

ჩასახვის პრობლემებს - გვიან დაძინება არღვევს ქალებთან საკვერცხეების ფუნქციას, რითაც მცირდება ჩასახვის შანსი. ზოგიერთი მეცნიერი იმასაც აღნიშნავს, რომ ძილის რეჟიმის დარღვევის გამო მამაკაცებს უქვეითდებათ სპერმატოზოიდების რიცხვი.

თინათინ გოცაძე