როგორი უნდა იყოს მამაკაცი
მამაკაცები და ქალები ერთმანეთისგან განსხვავდებიან და ეს განსხვავება უჯრედულ დონეზე არანაკლებ მკვეთრია, ვიდრე ყოფა-ცხოვრებაში. ქალებსა და მამაკაცებს სხვადასხვანაირი აქვთ ნივთიერებათა ცვლა, ჰორმონები და კანიც კი. მამაკაცის კანის ზედა შრე უფრო გამძლეა, ეპიდერმისის შემადგენელი მოგრძო უჯრედები მტკიცედ ეკვრიან ერთმანეთს, კანქვეშა ცხიმოვანი ქსოვილი ნაკლებად გამოხატულია, ხოლო შემაერთებელი ქსოვილი - უფრო მტკიცე. ეს თავისებურებანი კაცობრიობის ძლიერ ნახევარს, ერთი მხრივ, უპირატესობას ანიჭებს: მამაკაცებს არ აწუხებთ ცელულიტი, მათი კანი უფრო ნელა ბერდება, - მაგრამ, მეორე მხრივ, მათაც აქვთ თავიანთი პრობლემები: წვრილი სისხლძარღვების უკმარისობა, რომელიც სახეს არაჯანსაღ, მოწითალო-მოიისფრო ელფერს აძლევს, ცხიმოვანი ჯირკვლების ჰიპერტროფია, რომელიც სებორეულ დერმატიტს იწვევს, ჭარბი ოფლიანობა... ყოველივე ამის გათვალისწინებით მრავალმა კოსმეტიკურმა ფირმამ დიდი ხანია საკუთარ ასორტიმენტში შეიტანა მამაკაცის კოსმეტიკა, რომელიც ქალებისთვის განკუთვნილი პროდუქციისგან არა მხოლოდ არომატით, არამედ მოქმედებითა და ეფექტითაც განსხვავდება.
მამაკაცის კოსმეტიკა შეიძლება რამდენიმე ჯგუფად დავყოთ:
- დასაბანი და გასაწმენდი საშუალებები: საპონი, საშხაპე გელი, სველი ხელსახოცები, შამპუნი;
- პარსვისთვის განკუთვნილი კოსმეტიკა: გელი, საპარსი კრემი და ქაფი, პარსვის შემდგომ სახმარი კრემი, გელი, ლოსიონი;
- პარფიუმერია: დეზოდორანტი, ოდეკოლონი, სუნამო;
- სახის კანის მოსავლელი საშუალებები: მატონიზებელი ლოსიონი, დამატენიანებელი დღის კრემი, მკვებავი ღამის კრემი;
- ფეხების მოსავლელი საშუალებები: სქრაბი, დამატენიანებელი ანტიბაქტერიული კრემი, დეზოდორანტი;
- დამცავი საშუალებები: ხელის კრემი, მზისგან დამცავი კრემი, ტუჩის ბალზამი.
აქედან ზოგი რამ შეგიძლიათ მთელი ოჯახისთვის უნივერსალური კოსმეტიკით შეცვალოთ, მაგრამ გახსოვდეთ, რომ მამაკაცის კოსმეტიკა შემუშავებულია მხოლოდ თქვენთვის, თქვენი მოთხოვნილებებისა და განმასხვავებელი ნიშნების გათვალისწინებით.
თავის მოვლის მარტივი წესები:
- თუ ცხვირსა და შუბლზე ხშირად გიჩნდებათ ფერიმჭამელები, ესე იგი კანს ცუდად უვლით. დილა-საღამოს კანის პრობლემური ზონები გამწმენდი ლოსიონით დაიმუშავეთ. ეცადეთ, ამ პროცედურის დროს კანის სუფთა ზონებს არ შეეხოთ.
- ოფლის სუნს ვერავითარი არომატი ვერ შენიღბავს. უკიდურეს შემთხვევაში, გამოიყენეთ ანტიპერსპირანტის ეფექტის მქონე დეზოდორანტი, რომელიც ამცირებს ოფლის გამოყოფას და იმავდროულად ანადგურებს სუნის გამომწვევ ბაქტერიებს.
- ფეხსაცმელი ყოველდღიურად გაანიავეთ, ოფლიანობის შესამცირებლად კი ძველ, გამოცდილ მეთოდს მიმართეთ: ყოველ საღამოს გაიკეთეთ თბილი მარილიანი წყლის ათწუთიანი აბაზანა. პრობლემის მოგვარებაში ნატურალური ქსოვილის წინდა, ფეხსაცმლის საფენი და ანტიბაქტერიული კრემიც დაგეხმარებათ. ფეხებზე მეტისმეტად მკვეთრი სუნი შესაძლოა სოკოვანი დაავადების ნიშანი იყოს. ამ შემთხვევაში აუცილებლად მიმართეთ ექიმს.
- კოჟრები მამაკაცებს უფრო ნელა უჩნდებათ. მიუხედავად ამისა, ურიგო არ იქნება, კვირაში ერთხელ, აბაზანის შემდეგ, ტერფები პემზით მსუბუქად დაიმუშაოთ. მეტისმეტს ნუ მოინდომებთ - ზღვარგადასულმა ხეხვამ შესაძლოა ჭარბი ეპიდერმისის ზრდა გამოიწვიოს.