დაიწყეთ ჯანმრთელობაზე ზრუნვა ახლავე, დაუყოვნებლივ. თქვენი გონება სხეულს 10-15 წლით ახალგაზრდად აღიქვამს. ჯანმრთელობა შეიძლება იმაზე სწრაფად გაუარესდეს, ვიდრე წარმოგიდგენიათ. სხეული ერთ მშვენიერ დღეს კი არ გიღალატებთ, არამედ თანდათანობით, შეუმჩნევლად, ნაბიჯ-ნაბიჯ.
თავი არიდეთ მათთან ურთიერთობას, ვინც თქვენდამი ცუდად არის განწყობილი. ისწავლეთ “არას” თქმა იმაზე, რაც თქვენთვის ფასეულობას არ წარმოადგენს. 20 წლის ასაკში სამყარო ღია, შესაძლებლობებით აღსავსე გვგონია, გამოუცდელობამ კი შესაძლოა იმ ადამიანებთან დაგვაახლოოს, ვინც ამას არ იმსახურებს. 30 წლისთვის ვაცნობიერებთ, რომ კარგი ურთიერთობა ძალისხმევას მოითხოვს. სამყაროში საკმაოდაა ისეთი ადამიანი, ვისთანაც მეგობრობა შეიძლება, ამიტომ არ ღირს დროის დაკარგვა მათზე, ვინც არასოდეს დაგვდგომია გვერდით.
კარგად მოექეცით მათ, ვის მიმართაც გულგრილი არ ხართ. განსაცდელი ყველას შეიძლება შეემთხვეს. იყავით ის, ვისი იმედიც შეიძლება ასეთ დროს ჰქონდეთ.
ყველაფრის მიღწევა შეუძლებელია. ფოკუსირება მოახდინეთ იმაზე, რაც კარგად გამოგდით. ცხოვრებაში ყველაფერი კომპრომისებზეა აგებული. ადამიანების უმრავლესობა კარიერას 20 წლის ზღვარზე და ხშირად შეცდომით ირჩევს. წლებია საჭირო იმის საპოვნელად, რისი კეთებაც ნამდვილად გვეხერხება და გვსიამოვნებს კიდეც. უმჯობესია, ყურადღება გავამახვილოთ ჩვენს უმთავრეს ღირსებებზე და წლიდან წლამდე განვავითაროთ ისინი, ვიდრე სანახევროდ ვაკეთოთ სხვა საქმე.
ნუ შეგაშინებთ რისკი. თქვენ ჯერ კიდევ შეგიძლიათ შეიცვალოთ. 30 წლისთვის უმეტესობას მიაჩნია, რომ დასახული გზიდან აღარ უნდა გადაუხვიოს, მაგრამ ყველაფრის თავიდან დაწყება არასდროს არის გვიან.
განუწყვეტლივ უნდა მიისწრაფვოდეთ ზრდისა და განვითარებისკენ. თქვენ გაქვთ ორი აქტივი, რომელთა დანაკარგს ვერაფერი აანაზღაურებს - სხეული და გონება. ბევრი 20 წლის ასაკში წყვეტს საკუთარ თავზე მუშაობას, 30 წლისთვის კი მეტისმეტად დაკავებულია საიმისოდ, რომ თვითგანვითარებაზე იფიქროს. თქვენი უმთავრესი მიზანი უნდა იყოს უკეთესობისკენ სწრაფვა, რათა გახდეთ უფრო მომხიბლავი ადამიანი, პარტნიორი, მშობელი, მეგობარი, კოლეგა... ერთი სიტყვით, გაიზარდოთ როგორც პიროვნება.
ნუ გადაიღლით თავს მომავალი 5 წლის გეგმების დასახვით, რადგან ყველაფერი ცვალებადია. დაძლიეთ ყველაფრის მართვის სურვილი, უბრალოდ აკეთეთ თქვენი საქმე, დანარჩენი კი ცხოვრებას მიანდეთ.
გაიღეთ ოჯახისთვის მაქსიმუმი. უფრო მეტი დრო გაატარეთ ახლობლებთან. მშობლები ბავშვად აღგიქვამენ, ვიდრე თავს არ წარმოაჩენთ როგორც დამოუკიდებელი, ზრდასრული ადამიანი. იზრუნეთ იმაზე, რომ ააგოთ სწორი ურთიერთობები და დატკბეთ ოჯახური ცხოვრებით.
პატივისცემითა და ყურადღებით მოეკიდეთ საკუთარ თავს. ცხოვრება რთულია, ამიტომ ეცადეთ, უფრო მეტად აღარ გაირთულოთ.