ლიპოსაქცია ოპერაციის გარეშე
მათაც, ვინც ნორმალურად იტანს ნახშირწყლებს, არ აწყენდათ საკუთარი ფიგურის კორექცია. სწრაფი გახდომისათვის გამოიყენება ნახშირწყლების დაბალი შემცველობის დიეტა მაღალტექნოლოგიური ვარიანტებით. არსებობს სპეციალური კურსები, რომლებიც რამდენიმე კვირა გრძელდება. ამ დროს საჭიროა ცილოვანი კოქტეილების მიღება ბიოდანამატებთან ერთად. ამ რეჟიმით მუდმივად ცხოვრებას აზრი არ აქვს: ის მისაღებია მხოლოდ ცხოვრების გარკვეულ მომენტებში. მაგალითად, სპორტსმენებისთვის, რომელთათვისაც აუცილებელია განსაზღვრულ წონით კატეგორიაში მოხვედრა, ან ბოდიბილდერებისათვის, რომელთაც მუსკულატურის რელიეფურობის აღდგენა ესაჭიროებათ და საერთოდ, მათთვის, ვისაც სხეულის სწრაფი "შეფერთხვა" სჭირდება, უფრო სწორად კი "შეშრობა". ეს უფრო სწორი განსაზღვრებაა. მაღალცილოვანი დიეტა დროის მოკლე შუალედში, უპირველეს ყოვლისა, აშრობს წყალს. როგორც კი წყდება ნახშირწყლების მიწოდება, ორგანიზმიდან რამდენიმე დღეში გამოიდევნება წყალი. ცილოვანი დიეტით წონის დაკლება სისწრაფითა და ეფექტურობით ლიპოსაქციას უტოლდება. თანმხლები მოვლენები შეიძლება ასეთივე მასშტაბური აღმოჩნდეს. თუ "გამოშრობას" გადავაჭარბებთ, კანი გაწელილი დარჩება. სპორტსმენებსა და ფოტომოდელებს ეს არ ემუქრებათ, იმ უბრალო მიზეზის გამო, რომ ისინი ახალგაზრდები არიან და მათი კანი საკმაოდ მკვრივია, ხოლო უფრო ასაკოვანი ადამიანებისთვის გახდომის ასეთი რადიკალური ვარიანტი რეკომენდებული არ არის, თუნდაც კოსმეტიკური მიზეზის გამო.
როგორ მოქმედებს?
რატომ მაინცდამაინც ცილა? იმიტომ, რომ მისგან არ სუქდებიან. ეს იმას არ ნიშნავს, რომ ცილოვანი საკვების გამო წონა ყოველთვის და ყველა სიტუაციაში იკლებს. მაგალითად, სპორტსმენმა, რომელიც შეუდგა ვარჯიშს ხანგრძლივი შესვენების შემდეგ და დიდი რაოდენობით ცილოვან საკვებს იყენებს, შეიძლება წონა მოიმატოს კიდეც. დაგროვილი ცხიმი მას თავმოყრილი აქვს კუნთოვან ქსოვილში, კუნთები უფრო მეტ ცხიმს იწონის. ადამიანები, რომლებიც წონას იკლებენ, მიირთმევენ ცილას, რათა არ დაკარგონ კუნთოვანი ქსოვილი და ხდებიან ცხიმის წვის ხარჯზე, რაც უფრო სასარგებლოა ჯანმრთელობისათვის. ალბათ იტყვით, რომ თქვენთვის სულ ერთია, რის ხარჯზე ხდებით. მთავარია, მოიკლოთ ავადსახსენებელი კილოგრამები. მაგრამ ნუ იჩქარებთ: თუ შეეცდებით წონაში დაკლებას მხოლოდ ნახშირწყლოვანი რაციონით, მალე შეამჩნევთ, რომ სწრაფად კარგავთ ძალებს და კიდევ უფრო უარესი - ძალას კარგავს თქვენი გული, რომელიც, როგორც ცნობილია, კუნთია. გარდა ამისა, თქვენ რისკის ქვეშ აყენებთ ნახშირწყლის ცვლის ბიოქიმიურ მექანიზმსაც. წმინდა ცილოვანი რაციონი არ ასუსტებს გულს. მას სხვა თავისებურებები აქვს. თუ ნახშირწყლების მიწოდება არ ხდება საკვებით, ეს მთავარი საწვავი იმ მარაგიდან მიეწოდება ორგანიზმს, რომელიც თავადვე აქვს დაგროვილი. ამ დროს ორგანიზმიდან ბევრი წყალი გამოდის. ცილოვანი დიეტის სწრაფი ეფექტი სწორედ სითხის დაკარგვის შედეგად მიიღწევა. ნახშირწყლების დაგროვილი მარაგის გამოყენებისას ორგანიზმი იწყებს ცხიმების წვას. ამ დროს ცილოვანი საკვები არა მარტო ამარაგებს მას საშენი მასალით, უჯრედებისა და ფერმენტების აღსადგენად, არამედ კლავს შიმშილის გრძნობას. ცილას დიდი რაოდენობით ვერ შეჭამ. ერთი სიტყვით, ცილოვანი დიეტით დაკლება შეუძლია ყველას, თუმცა აქაც არსებობს დაბრკოლებები.
დაბრკოლებები
ცილოვანი დიეტა, როგორც ნებისმიერი სხვა არაბალანსირებული კვება, პრობლემებს ქმნის. პირველი და მთავარი - იმისთვის, რომ მაქსიმალური ეფექტი მიიღოთ, საკვები უნდა იყოს ნამდვილად ცილოვანი. ხორცი, თევზი, კვერცხი, ხაჭო - უპუროდ, მაკარონისა და კარტოფილის გარეშე, ჩაი უშაქროდ. ერთი შეხედვით ეს იოლი გვეჩვენება, მაგრამ ყველაფერი არც ისე ადვილია. მეორე პრობლემა - ასეთი დიეტის დროს არის თავისებურებები ნივთიერებათა ცვლაში, წყურვილი და ტუალეტში სირბილის მოთხოვნილება, ღამის საათებშიც კი უცნაური, თავისებური სუნთქვა და სხეულის სუნი, მუდმივი მსუბუქი გაბრუება და ეიფორიის განცდა. თუმცა, ამასთან შეჩვევა შესაძლებელია. შედეგი ამართლებს მოლოდინს. მესამე პრობლემა - ყველა ადამიანის ღვიძლი და თირკმელები ვერ უძლებს ამ დიეტას. მათ, ვისაც ამ ორგანოებთან დაკავშირებული პრობლემები აქვს, განსაკუთრებული სიფრთხილე მართებთ და ექიმს უნდა დაეკითხონ. დაბოლოს, ცილოვანი დიეტის დაცვა არ შეიძლება დიდხანს სპეციალისტის დაკვირვების გარეშე. მასში არის ზოგიერთი ნივთიერების ნაკლებობა, მაგალითად, ანტიოქსიდანტების. ბოსტნეულის დიდი ნაწილი და თითქმის ყველა ხილი შეიცავს დიდი რაოდენობით ნახშირწყლებს, ამიტომ უნდა გამოირიცხოს ცილოვანი დიეტის დროს, თუ მკაცრ ვარიანტს იცავთ. კარტოფილი, სტაფილო, ჭარხალი, გოგრა აკრძალულია. მხოლოდ ვაშლი შეიცავს ცილოვან დიეტაში დასაშვები ნახშირწყლების დღიურ ნორმას. ყურძენში, საზამთროში, ნესვში დიდი რაოდენობით შაქარია. ხილისა და კენკრის წვენები საერთოდ დაუშვებელია. ბევრი ადამიანი არ არის მზად ასეთი აკრძალვებისთვის. ისინი ელიან, რომ მოუწევთ უარის თქმა პურსა და კანფეტზე, ნაყინზე და ა.შ. მაგრამ არა ასეთი დოზებით!.. დასკვნა ერთმნიშვნელოვანია: გადაწყვიტეთ ცილოვანი დიეტის დაცვა? დაივიწყეთ ვიტამინები და მინერალური დანამატები. რაც უფრო დიდხანს აპირებთ აკრძალვებს, მით უფრო აუცილებელია, კონსულტაცია მიიღოთ ექიმთან ან დიეტოლოგთან.