ლალი ჩხიკვაძე

- პლასტიკური ქირურგია თანამედროვე მედიცინაში ერთ-ერთი ყველაზე პოპულარული და პროგრესირებადი მიმართულებაა. ოპერაციის მსურველთა რიცხვი წლიდან წლამდე იზრდება მთელ მსოფლიოში, მათ შორის - ჩვენს ქვეყანაშიც. ყველაზე სასურველი, ტოპ-სამი ოპერაციაა: რინოპლასტიკა, მკერდის გადიდება და ლიპოსაქცია. ბოლო პერიოდში ძალიან პოპულარული გახდა მუცლის წინა კედლის პლასტიკაც. ყველაზე სასურველი სამეულის გარდა, ჩვენი კლინიკა და გუნდი პაციენტებს სთავაზობს ფართო სპექტრის ქირურგიული ოპერაციების ჩამონათვალს: ბლეფაროპლასტიკა, ანუ ქუთუთოების პლასტიკა, რომელიც გულისხმობს ჭარბი კანის, ნაკეცისა და ცხიმოვანი თიაქრების მოშორებას, მუცლის წინა კედლის პლასტიკას: მუცლის წინა კედლიდან ჭარბი კანის ნაკეცისა და ცხიმოვანი ქსოვილის მოშორებას, ყურებისა და ბიბილოს პლასტიკა, დუნდულას ფორმის შეცვლა (ეს იქნება გადიდება ცხიმით, საკუთარი ქსოვილებით ან იმპლანტით, თუ მხოლოდ დაშვებული ნაკეცის მოშორება და ფორმის გაუმჯობესება). ბარძაყებისა და წვივების პლასტიკა, ცხიმის გადანერგვა და სხეულის კონტურის ფორმირება.

ტარდება შემდეგი პროცედურებიც: ნაწიბურის კორექცია, კანის პლასტიკა, ქსანტელაზმებისა და პრობლემური (ჩაზრდილი) ფრჩხილების მკურნალობა ლაზერული თუ ქირურგიული მეთოდებით, ბოტოქსისა და ფილერების ინიექციები, რომლებიც ასევე ძალიან პოპულარულია. ამ ყველაფრის ხარისხიანად და სრულყოფილად შესასრულებლად აუცილებელია ხელშემწყობი ფაქტორები, როგორებიცაა: უახლესი თაობის სამედიცინო თუ საოპერაციო ინვენტარი, რომლითაც სრულადაა აღჭურვილი „თოდუას კლინიკა“ და მათ შორის - ჩვენი განყოფილებაც.

- ქუთუთოების პლასტიკური ოპერაცია ხომ არ იწვევს მხედველობის ორგანოს დაზიანებას?

- ბლეფაროპლასტიკაც საკმაოდ პოპულარული ჩარევაა პლასტიკურ ქირურგიაში და ხშირად ტარდება ისეთ დროს, როცა თვალის ირგვლივ იმატებს ნაოჭების რაოდენობა ან/და გამოხატულია ცხიმოვანი თიაქრები. რა თქმა უნდა, ეს ოპერაციები სრულიად უსაფრთხოა მხედველობისთვის. ასე რომ, პაციენტებს შეუძლიათ მშვიდად მიიღონ გადაწყვეტილება და თუ სურთ, ჩაიტარონ ოპერაცია.

- დღეს მოდურია ცხვირის ფორმის კორექცია. ცხვირის პლასტიკური ოპერაციები ხომ არ იწვევს სუნთქვის დარღვევას და რა ასაკშია რეკომენდებული რინოპლასტიკა?

- რინოპლასტიკის ჩატარება შესაძლებელია 18 წლიდან. ძალიან მნიშვნელოვანია ის ფაქტი, რომ ცხვირის ფორმის შეცვლის ოპერაცია არ უნდა იწვევდეს სუნთქვის გაუარესებას. პირიქით, ოპერაცია უნდა ჩატარდეს ისე, რომ პაციენტი კმაყოფილი იყოს ცხვირის ფორმითაც და თავისუფლად სუნთქვითაც. ჩვენ ყელ-ყურ-ცხვირის სპეციალისტთან კომბინირებულად ვმუშაობთ და ოპერაციამდე ყველა პაციენტთან ვადგენთ მონახაზს, რაც ითვალისწინებს ლამაზ ცხვირსა და იდეალურ სუნქვას ერთად.

- რა გართულებებია მოსალოდნელი და რა უნდა გაითვალისწინოს რინოპლასტიკის მსურველმა პაციენტმა?

- რინოპლასტიკის შემდგომ მნიშვნელოვანია ცხვირთან შეუხებლობა, რაც თავიდან აგვარიდებს პოსტოპერაციულად განვითარებულ დეფორმაციას. რამდენიმე თვის განმავლობაში არ არის რეკომენდებული სათვალის ტარება, ყვინთვა და ტრამვების გამომწვევი სპორტის სახეობებით დატვირთვა.

- რამდენ ხანს გრძელდება რეაბილიტაცია ოპერაციის შემდეგ, რა დრო სჭირდება პოსტოპერაციული სილურჯეების ალაგებას, სუნთქვის აღდგენას?

- დაახლოებით 10 დღეში პაციენტი სრულად თავისუფალია ნახვევის, ტამპონების, ძაფებისა და თაბაშირისგან, რის შემდეგაც გრძელდება რეაბილიტაცია და ნელ-ნელა მცირდება შეშუპებები. 1 თვის შემდეგ შედეგის 60-70% უკვე გამოკვეთილია. თუმცა ცხვირის სრულ ჩამოყალიბებას დაახლოებით 1 წელი სჭირდება.

- რამდენად ხშირად ტარდება მკერდის გადიდების ოპერაცია თქვენს კლინიკაში და ზიანდება თუ არა სარძევე ჯირკვალი ოპერაციის დროს?

- აუგმენტაციური მამოპლასტიკა, ანუ მკერდის გადიდების ოპერაცია, საკმაოდ ხშირად ტარდება ჩვენს კლინიკაშიც და მთელ მსოფლიოშიც. ეს ოპერაცია შედის ყველაზე პოპულარული და ხშირად ჩატარებული ოპერაციების ტოპ-3-ში. ამ ოპერაციის დროს სარძევე ჯირკვალი სრულად დაცულია დაზიანებისგან, რაც თამამად გვაძლევს იმის თქმის საშუალებას, რომ პაციენტები ოპერაციის შემდეგ აგრძელებენ ჩვეულებრივ ცხოვრებას და ბავშვის ძუძუთი კვებას.

- მკერდის დასაპატარავებლად თუ მოგმართავენ?

- დიახ, ჩვენ ვატარებთ ძუძუს დაპატარავების ოპერაციებსაც. მინდა გითხრათ, რომ ძუძუს დაპატარავება მიეკუთვნება ისეთ ოპერაციებს , რომლებიც მოიცავს სილამაზეს, ესთეტიკურ სრულყოფას, ჯანმრთელობის გაუმჯობესებას, რადგან დიდი ზომის სარძევე ჯირკვალი საკმაოდ ტრავმულია ხერხემლისთვის და ხშირად პაციენტები უჩივიან კიდეც ხერხემლის, კისრისა და ზურგის ტკივილს.

- რა შეიძლება იყოს მკერდის ასიმეტრიის მიზეზი და როგორ ეხმარებით პაციენტს ასეთ შემთხვევაში?

- ძუძუს ასიმეტრიის მიზეზი შეიძლება იყოს ძალიან ბევრი შეძენილი თუ თანდაყოლილი ფაქტორი, მაგალითად, გულმკერდის ტრავმა, სარძევე ჯირკვლის ოპერაციები, ლაქტაცია ან თანდაყოლილი ანომალიები. კონსულტაციისას ფასდება პრობლემის მიზეზი და იგეგმება შემდგომი ეტაპები. კორექცია შესაძლებელია როგორც საკუთარი ქსოვილების, ცხიმის გადანერგვით, ასევე იმპლანტის გამოყენებით.

- სხეულის ცალკეული ნაწილების, კერძოდ, მუცლის, საჯდომისა და ბარძაყების, კორექციაზე რას გვეტყვით? რა სიხშირით ტარდება ეს ოპერაციები საქართველოში და მამაკაცებიც თუ მოგმართავენ?

- როგორც უკვე აღვნიშნეთ, ბოლო პერიოდში მუცლის პლასტიკა საკმაოდ პოპულარული გახდა. ასევეა საჯდომის და ბარძაყის კორექციაც. საზოგადოებაშიც გაიზარდა ინფორმაცია ამა თუ იმ ჩარევასთან, მათ რეაბილიტაციასა და შედეგიანობასთან დაკავშირებით, რაც პაციენტებს უმარტივებს გადაწყვეტილების მიღებას და ოპერაციის დაგეგმვას. მამაკაცების მომართვაც საკმაოდ დიდია მუცელთან დაკავშირებული პრობლემების გამო, თუმცა პროცენტულად უფრო მეტი მაინც ქალია.

- რა პერსპექტივები ესახება მომავალში პლასტიკურ-რეკონსტრუქციულ ქირურგიას?

- პლასტიკური და რეკონსტრუქციული ქირურგია არის სფერო, რომელშიც ერთიანდება ჯანმრთელობაც, სილამაზეც და ყველა ის თვითშეფასებასა და ბედნიერებასთან დაკავშირებული ნიუანსიც, რომელიც შეიძლება ადამიანმა მიიღოს სამედიცინო ჩარევის საშუალებით. ამ მიმართულებაში ძალიან დიდი რესურსია, რომელიც არ გულისხმობს მხოლოდ ესთეტიკურ ქირურგიას, მედიცინის ბევრი სხვა მნიშვნელოვანი რგოლიც იგულისხმება: დამწვრობა, ონკოლოგიური დაავადებების დროს ჩატარებული ოპერაციების შემდგომი დეფექტების ქირურგიული კორექციები , ტრავმის შემდგომი ოპერაციები, მიკროქირურგიული ოპერაციები და ა.შ. ასე რომ მომავალი უფრო მეტად გამოავლენს პლასტიკური და რეკონსტურქციული ქირურგიის ეფექტს, რაშიც, ჩვენი მხრივ, აუცილებლად მივიღებთ მონაწილეობას.

- ქირურგიული ოპერაციის წინ პაციენტებს რა დამატებითი კვლევა სჭირდებათ?

- პაციენტები ოპერაციის დაგეგმვის შემდეგ იწყებენ მომზადებას, რაც გულისხმობს კონკრეტული ლაბორატორიული ანალიზების, ინსტრუმენტული გამოკვლევების ჩატარებას, თერაპევტთან, კარდიოლოგთან, ანესთეზიოლოგთან კონსულტაციას და ზოგადი მდგომარეობის შეჯამებას. ეს ყველაფერი იმის საშუალებას იძლევა, რომ პაციენტი მაქსიმალურად მომზადებული და ჯანმრთელი შევიდეს საოპერაციოში.

- რეკონსტრუქციული ქირურგია მედიცინის უმნიშვნელოვანესი დარგია. ამ მიმართულებით რას სთავაზობთ პაციენტებს?

- რეკონსტრუქციული ქირურგია ტარდება სხეულის იმ ნაწილების სამკურნალოდ, რომლებიც ესთეტიკურად ან ფუნქციურად დაზიანებულია თანდაყოლილი დეფექტების, განვითარების ანომალიების, დამწვრობის, ინფექციების, სიმსივნეების ან სხვა დაავადებების გამო. ჩვეულებრივ, ეს კეთდება სხეულის ასეთი ნაწილების ფუნქციის და შესაძლებლობების გასაუმჯობესებლად, თუმცა შესაძლოა გაკეთდეს დაზიანებული მიდამოს ჩვეული გარეგნული იერის მისაღწევადაც. ჩვენს კლინიკაში ტარდება მრავალი ამგვარი ტიპის ოპერაცია, რომელიც ეხმარება პაციენტს ფსიქოლოგიური მგომარეობისა და ცხოვრების ხარისხის გაუმჯობესებაში.

- „თოდუას კლინიკა“ მუდმივად სთავაზობს მოსახლეობას საინტერესო სიახლეებს და ნერგავს დიაგნოსტიკისა და მკურნალობის ინოვაციურ მეთოდებს. სულ მალე ვერაზე, იაკობ ნიკოლაძის ქუჩაზეც გაიხსნება ახალი ფილიალი. რა სახის სამედიცინო დახმარების მიღების შესაძლებლობა ექნებათ აქ პაციენტებს?

- „თოდუას კლინიკა ვერაზე“ იქნება ამბულატორიული, მულტიპროფილური, ულტრათანამედროვე, მსოფლიოს უმაღლესი სტანდარტების შესაბამისი სამედიცინო ცენტრი, სადაც თავს მოიყრიან სხვადასხვა მიმართულების ექიმები.აქ პაციენტს შეეძლება თანამედროვე სამედიცინო მომსახურების დონის შესაბამისი გამოკვლევების ჩატარება და კონსულტაციების მიღება.

R