როგორ მოვუაროთ ბიჟუტერიას, რომ არ დაზიანდეს
ფაქტია, რომ ბიჟუტერიის სამკაულები გაცილებით ნაკლებად გამძლეა ძვირფასი ლითონებისგან დამზადებულ ნაწარმთან შედარებით. მაგრამ ნებისმიერმა პროდუქტმა შეიძლება სწრაფად დაკარგოს ორიგინალური იერი, თუ ის სწორად არ არის შენახული და გამოყენებული.
რატომ იჟანგება ბიჟუტერიის სამკაულები?
სამკაულები იჟანგება, როდესაც ჟანგბადის მოლეკულები ლითონის ზედაპირის სტრუქტურაში ინერგება. უფრო მეტიც, თითოეული ლითონი ამ პროცესზე თავისებურად რეაგირებს: მუქდება ან ჟანგით იფარება.
მხოლოდ ოქრო, ვერცხლი და პლატინის ჯგუფის ლითონები არ იჟანგება, მაგრამ სამკაულების დასამზადებლად ისინი სუფთა სახით არ გამოიყენება. ბიჟუტერიაში გამოყენებული შენადნობები ბევრად უფრო ინტენსიურად იჟანგება, ვიდრე საიუველირო შენადნობები. რკინის შემცველი ლითონებიც მიდრეკილია დაჟანგვისკენ. სპილენძის შემცველი შენადნობები მუქდება და იფარება მოლურჯო-მომწვანო საფარით. მუქდება თუთიის სამკაულებიც და წარმოქმნის არაესთეტიკურ საფარს.
მაღალი ხარისხის სამკაულები, როგორც წესი, გამძლე საფარის მქონე ლითონისგან მზადდება. ძირი სპილენძის ან სხვა ლითონის აქვს, პროდუქტი კი ოქროთი ან ვერცხლითაა დაფარული.
ბიჟუტერია შეიძლება უფრო სწრაფად დაიჟანგოს მრავალი მიზეზის გამო:
- მაღალი ტენიანობა ან წყლის ზემოქმედება;
- ტემპერატურის ან სიცხის უეცარი ცვლილება;
- საყოფაცხოვრებო ქიმიკატების, სუნამოების, კოსმეტიკური ან ჰიგიენური საშუალებების ზემოქმედება;
- სხეულის ბუნებრივი გამონაყოფები.
თითქმის შეუძლებელია სამკაულების სრულად დაცვა ყველა ამ ფაქტორისგან, მაგრამ შესაძლებელია დესტრუქციული ძალების გავლენის შემცირება.
როგორ მოვუაროთ სამკაულებს სწორად?
ბიჟუტერია რომ არ გამუქდეს და დაიჟანგოს, საჭიროა სათანადო მოვლა, შენახვა და ხმარება.
სამკაულების „საკიდები“, რაც ამ ბოლო დროს ძალიან პოპულარული გახდა, მხოლოდ დროებით შესანახად გამოდგება.
იდეალურ შემთხვევაში, სამკაულები უნდა ინახებოდეს დახურულ ყუთში. სასურველია თითოეული დეკორაციისთვის ცალკე საკანი, ყუთი ან ჩანთა ვიქონიოთ. შესაძლებელია კოლოფში სილიკონ-გელის ტომარის ჩადება, რომელიც ტენს შეიწოვს, ან ჟანგის საწინააღმდეგო სპეციალური საშუალების დამატება.
შეინახეთ სამკაულები სითბოსა და ტენის წყაროებისგან მოშორებით და დაიცავით მზის პირდაპირი სხივებისგან. აუცილებლად მოიხსენით სამკაულები ძილის, ვარჯიშისა და წყლის პროცედურების დროს. წყალი დესტრუქციულად ზემოქმედებს მასალების უმეტესობაზე (განსაკუთრებით ლითონებზე). ჯერ წაისვით კოსმეტიკა, კრემი, დაისხით სუნამო, ჩაიცვით და მხოლოდ ამის შემდეგ გაიკეთეთ სამკაულები, თორემ ისინი გამუქდება და მიმზიდველობას დაკარგავს.
ინტენსიური ჟანგვა რომ აირიდოთ, თუ შესაძლებელია, ბიჟუტერია სპეციალური ლაქით დაფარეთ. სამკაულებისთვის გამოყავით სპეციალური რბილი ქსოვილი და მისი საშუალებით ფრთხილად გაასუფთავეთ ისინი. განსაკუთრებული ყურადღება მიაქციეთ ფურნიტურას.
არ დააგდოთ სამკაული, ამან შეიძლება ლითონს ბზარები, ჩაღრმავებები ან ნაკაწრები გაუჩინოს, ზოგიერთ შემთხვევაში კი ნივთის სრულად განადგურებაც გამოიწვიოს.
რა ვიღონოთ, თუ სამკაული დაიჟანგა?
არსებობს ორი ვარიანტი: ან გადაყარეთ სამკაულები (თუ იაფია და ადვილად იპოვით მის შემცვლელს), ან სცადეთ მათი „გადარჩენა“.
საუკეთესო გზა საიუველირო სახელოსნოა. როგორც წესი, სპეციალისტები სამკაულებს კავიტაციის სპეციალურ აბაზანებში ულტრაბგერის გამოყენებით ასუფთავებენ. გასათვალისწინებელია, რომ ზოგჯერ საჭიროა ნაკეთობის დაშლა, რაც ძალიან ძვირი შეიძლება დაგიჯდეთ.
შესაძლებელია სახლშიც სცადოთ ნაკეთობის რეანიმირება იმპროვიზებული საშუალებებით – გარეცხეთ საპნიან წყალში, გაწმინდეთ საკვები მჟავით ან დაამუშავეთ კბილის ფხვნილით/პასტით, რა თქმა უნდა, იმ შემთხვევაში, თუ ბიჟუტერიას არ აქვს საფარი.