მოემზადეთ ზაფხულისთვის
ზაფხულში ამის მიღწევა განსაკუთრებით ადვილია, მთავარია, ისეთი ტანსაცმელი შეარჩიოთ, რომელიც ზაფხულის ცხელ დღეებში მოხერხებულად და კომფორტულად მოგადგებათ ტანზე, არ შეგიქმნით პრობლემებს და არ გამოჩნდებით „თეთრი ყვავივით“. გახსოვდეთ, ზაფხულს მეტი თავისუფლება უხდება, ასევე უხდება სპორტული სტილიც.
ძირს შეზღუდვები! ყველაფერი მოდაშია, რაც მოგწონთ და გიხდებათ. არ გჭირდებათ ზედმეტი კოსმეტიკა. პასტელის ფერებიც კი ზაფხულში ძალიან „ყვირის“. შეგიძლიათ, დაიკლოთ წონაც – ზაფხულში ეს ორჯერ უფრო ადვილიცაა და აუცილებელიც.
კიდევ რა არის საჭირო იმისთვის, რომ ეს ზაფხული სამუდამოდ დაგვამახსოვრდეს? – უნდა შევიქმნათ საზაფხულო განწყობა, მოვემზადოთ იმისთვის, რომ წინ სასიამოვნო განტვირთვა, დასვენება და პრობლემებისაგან გათავისუფლება მოგვიწევს. უნდა გავიღიმოთ. მზე ანათებს და შვებულება ძალზე ახლოსაა, რატომ უნდა ვიყოთ მოწყენილი?.. გაიღიმეთ, არაფერი ისე არ მოქმედებს მამაკაცზე, როგორც მომხიბვლელი, ძალდაუტანებელი, გულღია ღიმილი.
ზაფხულში ახალი ნაცნობობის შანსი დიდია. ამ დროს ყველა ცდილობს, დაისვენოს, გაერთოს და დრო სასიამოვნოდ გაატაროს. თუ ზაფხულივით თბილი, ფერადი, ხმაურიანი და ხალისიანი იქნებით, თქვენი პიროვნება შეუმჩნეველი არავის დარჩება.
ზაფხულის სიცხისგან თავის დაცვა საკმაოდ რთულია. ამ დროს ყველა ცდილობს, მაქსიმალურად ცოტა ჩაიცვას. თუმცა რეალურად ამ საკითხს სულ სხვაგვარად უნდა შეხედოთ. მნიშვნელობა არ აქვს, რას ჩაიცვამთ, მთავარია, როგორ ტანსაცმელს ჩაიცვამთ.
სამოსის შეძენისას მთავარი ყურადღება მიაქციეთ შემადგენლობას და ქსოვილის ხარისხს. ბუნებრივი ქსოვილები, როგორებიცაა ბამბა, ტილო, აბრეშუმი, ჰაერს კარგად ატარებს და კანი არ ხურდება. მნიშვნელოვანია ღია ფერის ტანსაცმლის შერჩევა, რადგან ღია ფერები მზის სხივს აირეკლავს, მუქი კი – ატარებს და სხეულამდე უშვებს.
გაითვალისწინეთ, რომ ზაფხულში სასურველია თავისუფალი სტილის ტანსაცმელი, რომელიც მჭიდროდ არ გექნებათ და კანს სუნთქვის საშუალებას მისცემს.
გარდერობის განახლებისას თითოეული ამ რეკომენდაციის დაცვა, სილამაზისა და ჯანმრთელობის შესანარჩუნებლად, აუცილებელია. სეზონურად გარდერობის სრულად განახლებას ბევრი ვერ ახერხებს, თუმცა შეგვიძლია გამოვყოთ ის 5 აუცილებელი ნივთი, რომლებიც ყველა ქალის გარდერობშია და ამავდროულად, ზაფხულის მოსვლისთანავე მათ განახლებაზე იწყებენ ზრუნვას.
წარმოგიდგენთ ზაფხულის სეზონის 5 აუცილებელ სამოსს:
მკვეთრი ფერის სარაფანი, რომელიც თქვენს გარეგნობას განსაკუთრებულსა და ეფექტურს გახდის. სამსახურში, კაფეში, პიკნიკზე – ის ყველგან შეიძლება მოირგოთ და ნებისმიერ სიტუაციაში მაქსიმალურად კომფორტულად იგრძნოთ თავი.
ზაფხული შორტის გარეშე წარმოუდგენელია. თუმცა უარი თქვით ჯინსსა და სხვა მყარ მატერიაზე. გრილი, კომფორტული და ბუნებრივი მასალით შეკერილი შორტი მთელი ზაფხულის განმავლობაში განსაკუთრებულად გასიამოვნებთ.
ზაფხულში ფეხსაცმლის შერჩევას დიდი მნიშვნელობა აქვს. აარჩიეთ მოწნულძირიანი ტილოს ფეხსაცმელი. სანდლები უკეთესია, თუმცა, თუ დახურული ფეხსაცმელი გირჩევნიათ, უფრო მეტი ყურადღება მიაქციეთ იმას, რომ ნატუალური მასალისგან იყოს დამზადებული. დისკომფორტთან ერთად, არასწორად შერჩეული ფეხსაცმელი შეიძლება გარკვეული დაავადების მიზეზიც კი გახდეს.
ზაფხულში ბევრი სამოსი მოუხერხებელია. სწორედ ამიტომ სხვადასხვა ფერის, უბრალო, ბრეტელიანი მაისური ზაფხულის განუყრელი ნაწილი იქნება. მრავალფეროვნება შეგიძლიათ ფერებით შექმნათ, სტილი კი უბრალო და სადა შეინარჩუნოთ.
ზაფხულში, როგორც წესი, ქალები კაბებსა და შორტებს ირჩევენ, თუმცა ერთი თავისუფალი სტილის, მოსახერხებელი შარვალი ყველასთვის აუცილებელია. ყოველთვის არ ვართ კაბის ან შორტის ხასიათზე, ამიტომ კარადაში გრძელი შარვალიც აუცილებლად უნდა გვეგულებოდეს.