”მკურნალის” რედაქცია

ქუსლებზე კანის გაუხეშებას ბევრი უჩივის, მეტადრე - ზაფხულობით, როცა სანდლები და მაშიები უმნიშვნელო ნაკლსაც კი აჩენს. კანის გაუხეშებას უამრავი მიზეზი აქვს, თუმცა პრობლემას ნებისმიერ შემთხვევაში მოგიგვარებთ ტუხტის ფესვების ნაყენი:

• აიღეთ 2 სადილის კოვზი დაქუცმაცებული ტუხტის ფესვი, მოათავსეთ მომინანქრებულ ჭურჭელში, დაასხით 0,5 ლიტრი ოთახის ტემპერატურის წყალი, კარგად დაახურეთ თავზე და 30 წუთით ჩადგით ორთქლის აბაზანაში. ხშირად ურიეთ. მერე გადმოდგით და გააცივეთ. ოთახის ტემპერატურამდე რომ გაცივდება, ამოავლეთ მასში დოლბანდის ხელსახოცები და ნახევარი საათით დაიდეთ ქუსლებზე.

პროცედურა უნდა ჩაიტაროთ დღეში ორჯერ - დილა-საღამოს. არანაკლებ ეფექტიანია ეს მეთოდიც:

• აურიეთ ერთმანეთში კვერცხის გული, 1 ჩაის კოვზი ლიმონის წვენი და ნახევარი ჩაის კოვზი კარტოფილის სახამებელი. მიღებული მასა დაიდეთ ცხელ წყალში დარბილებულ ქუსლებზე და დაიტოვეთ, ვიდრე კარგად არ გაშრება და მყარ ქერქად არ გადაიქცევა. ჩამოიბანეთ თბილი წყლით და კიდურებზე დამარბილებელი ემულსია ან კრემი წაისვით.