როგორ მოვუაროთ ნაზამთრალ თმას
მცვივა კიდეც, ვერაფრით ვუბრუნებ სილამაზეს.
როგორ მოვუარო ისე, რომ გაზაფხულზე კარგად გამოიყურებოდეს?
ზამთრობით თმა ხშირად ხუნდება და იმტვრევა, ზოგჯერ ცვივა კიდეც. ამის მიზეზი შესაძლოა იყოს ქრონიკული უძილობა, ზამთრის დეპრესია, სტრესი, ზოგიერთი მიკროელემენტის (მაგალითად თუთიის) ნაკლებობა, თმის ძირების ცუდი კვება, სისხლის ცუდი ცირკულაცია. თუ შეამჩნევთ, რომ ბალიშზე ან სავარცხელზე ბოლო ხანს უფრო და უფრო მეტი თმა რჩება, რაც შეიძლება მალე მიმართეთ ექიმ ტრიქოლოგს - თმის მკურნალ სპეციალისტს.
მიზეზის დასადგენად ზოგჯერ საჭიროა ქალის სასქესო ჰორმონების - ესტროგენების - დონის შემოწმება - თმის მდგომარეობაზე პასუხს ისინიც აგებენ. ჰორმონული ბალანსის დარღვევაზე ორგანიზმი თმის ცვენით რეაგირებს, თუ თმის ცვენა გახანგრძლივდა, უნდა შემოწმდეს ენდოკრინული სისტემის მუშაობა, ნაღვლის ბუშტისა და თირკმლის ფუნქციები.
თმა ორგანიზმის ჯანმრთელობის ინდიკატორია. ეს იმას ნიშნავს, რომ მისი მდგომარეობა ორგანიზმის საერთო მდგომარეობაზეა დამოკიდებული. საჭიროა ჰაერზე დიდხანს ყოფნა, კვების რეჟიმის დაცვა, სპორტი, ვარჯიში... თმა ზამთრის დეპრესიას რომ გადაარჩინოთ, ამისთვის რამდენიმე რჩევა გაითვალისწინეთ:
ვიტამინები
ჯანმრთელი და ლამაზი თმისთვის მთავარი პირობაა სწორი კვება და ვიტამინების რეგულარული მიღება. ზამთრის რაციონი ვიტამინებით ღარიბია, მათი ნაკლებობა კი არა მხოლოდ თმის, არამედ მთელი ორგანიზმის მდგომარეობაზე აისახება.
განურჩევლად იმისა, გიყვართ თუ არა, ყოველდღე მიირთვით 1-2 ვაშლი. ჩაის დაუმატეთ ლიმონი. ხშირად მიირთვით ზამთრის ხილი - მანდარინი და ფორთოხალი. მძიმე საკვები, რომელიც უფრო მეტად ნახშირწყლებისგან შედგება, ეცადეთ, დღეში ერთხელ მაინც შეცვალოთ ბოსტნეულით, უცხიმო იოგურტით და ხაჭოთი, თაფლიანი მაწვნით (გემრიელიც არის და სასარგებლოც). და, რაღა თქმა უნდა, მიიღეთ ვიტამინები. A ვიტამინი თმის ზრდისთვის არის აუცილებელი,C ვიტამინი ძირებს ამაგრებს, ხოლო E ვიტამინი თმას ჯანმრთელ ბზინვარებას უბრუნებს.
ყურადღება გაამახვილეთ თმისთვის სპეციალურად შემუშავებულ კომპლექსებზე - მათში ყველა კომპონენტი საუკეთესოდ არის დაბალანსებული.
დაბანა
ზამთარში თავს ცხელი წყლით ნუ დაიბანთ - თმა მტვრევადი და უსიცოცხლო გახდება. გამოიყენეთ შამპუნი, რომელიც საგანგებოდ ზამთრისთვის არის განკუთვნილი და ზამთრისავე კონდიციონერი. თუ ვერ იპოვეთ, შეიძინეთ ის, რომელიც განკუთვნილია მშრალი და მტვრევადი თმისთვის. თუ ცხიმიანი თმა გაქვთ, გამოიყენეთ შამპუნი შერეული თმისთვის (ასეთი თმა ძირებთან ცხიმიანია, ხოლო ბოლოებთან - მშრალი). მშრალი თმის დასაბანად შამპუნის ნაცვლად შეიძლება გამოიყენოთ მაწონი ან კვერცხის გული.
ნიღბები
კვირაში ერთხელ თმაზე აუცილებლად გაიკეთეთ ნიღაბი. მშრალ თმას ძალიან უხდება ზეთზე (მაგალითად, აბუსალათინის ზეთზე) დამზადებული ცხელი და ცივი ნიღბები. დაუმატეთ რამდენიმე წვეთი როზმარინის (ზღვის ვარდი) ან ლავანდის ზეთიც. ეს ნიღაბი თმაზე ორმოცი წუთი უნდა გაიჩეროთ. როზმარინისა და ლავანდის ზეთი კი თმას სასიამოვნო სურნელს მისცემს.
თმისთვის მზა ნიღბებიც იყიდება, მაგრამ შინაც შეგიძლიათ მოამზადოთ, ეს არც ისე რთულია. აი, მაგალითად, თაფლისა და აბუსალათინის ზეთის ნიღაბი მშრალი თმისთვის: 1 ჩაის კოვზი თაფლი და 3 ჩაის კოვზი აბუსალათინის ზეთი ერთმანეთში აურიეთ, ოდნავ შეათბეთ და თმაზე დაიდეთ.
თმის ცვენის საწინააღმდეგო ნიღაბი კი ასე მზადდება: გააზავეთ წყალში აფთიაქში შეძენილი ცისფერი თიხა და დაიდეთ თმის ძირებთან! ეს ნიღაბი ნებისმიერი ტიპის თმისთვის გამოდგება.
გაშრობა
თმის გასაშრობად ზამთარში რაც შეიძლება იშვიათად გამოიყენეთ ფენი და თერმოსთაილერი. თუ წვეულებისთვის ან მნიშვნელოვანი შეხვედრისთვის არ ემზადებით, დაელოდეთ, სანამ თმა თვითონ გაშრება, ხოლო დასახვევად მაშების ნაცვლად ბიგუდები გამოიყენეთ. გრძელი თმა ბოლოდან უნდა დაივარცხნოთ, მოკლე კი ძირიდან. უმჯობესია ჯაგრისის გამოყენება და იმავდროულად თავის კანის მსუბუქი მასაჟი.
