გავიფერადოთ ცხოვრება!
ამ კანონზომიერებას ფსიქიატრიულ პრაქტიკაშიც იყენებენ. საგანგებოდ მოწყობილ კლინიკებში მელანქოლიურად განწყობილ, დეპრესიულ მდგომარეობაში მყოფ პაციენტებს ოთახს ნარინჯისფრად უნათებენ, ხოლო აგზნებულებს ცისფრად განათებულ ოთახში ათავსებენ. სინათლის ფერი ასევე გავლენას ახდენს:
- ადამიანის მოქმედების ბუნებრივ ტემპზე. მაგალითად, წითელი განათების პირობებში მოძრაობის ბუნებრივი ტემპი უფრო ჩქარია, ვიდრე ლურჯი განათებისას.
- ადამიანის კუნთურ ძალაზე. თბილი განათების პირობებში დინამომეტრის მაჩვენებლები უფრო მაღალია, ვიდრე ცივი ფერებით განათებისას.
ნაირფერი ინტერიერი
თუ ბინის გარემონტებას გადაწყვეტთ, შეღებეთ კედლები ფერთა თერაპიის სპეციალისტთა რეკომენდაციების მიხედვით:
- ცივი, ბაცი ტონები, მაგალითად, ცისფერი და იასამნისფერი, შეესატყვისება დასვენებას, მოდუნებას, ისინი მიზანშეწონილია საწოლი ოთახებისთვის.
- ბაცი ყვითელი ადამიანს ყურადღების კონცენტრირებასა და გონების მოკრებაში ეხმარება, ამიტომ კარგი იქნება, ყვითლად შევღებოთ კაბინეტი ან ოთახის ის კუთხე მაინც, სადაც გონებრივად ვშრომობთ ან ბავშვი გაკვეთილებს ამზადებს.
- გარგარისფერი, როგორც ბაცი, ისე მსუყე, ნაჯერი ტონისა, ხსნის დაძაბულობას და ქმნის კომფორტის, უსაფრთხოების განცდას. ის იდეალურია სასტუმრო ოთახისთვის.
- შეღებეთ ნარინჯისფრად სამზარეულო ან მისი თუნდაც ერთი კედელი - თქვენთვის ყოველი დილა მზიანი და ნათელი იქნება.
დღესასწაული იქნება!
წითელი, ყვითელი, ოქროსფერი, იასამნისფერი... რაც უფრო მეტია ფერი, მით უფრო მხიარული და სასიამოვნო იქნება დღესასწაული. საკუთარ ან ოჯახის რომელიმე წევრის დაბადების დღეზე მორთეთ ოთახი ფერადი ბუშტებით და სტუმრებს გაცილებისას ჩამოურიგეთ, რათა ზეიმი მათთვისაც გაგრძელდეს.
არტთერაპია
გიყვართ ხატვა? მაშინ არტთერაპია ნამდვილად მოგეწონებათ. დროდადრო უეცარი შიში გიპყრობთ? ამ არასასიამოვნო გრძნობისგან რომ გათავისუფლდეთ, არტთერაპიის სეანსი ჩაიტარეთ. აიღეთ ფურცელი, ფერადი ფანქრები ან აკვარელის საღებავები. რამდენიმე ხნით დახუჭეთ თვალები, ეცადეთ წარმოიდგინოთ, რა ფერისაა თქვენი განწყობილება. დაინახეთ? მაშინვე აიღეთ ამ ფერის ფანქარი ან ფუნჯი ამ ფერის საღებავში ჩააწეთ და დახატეთ ნებისმიერი რამ, რაც აზრად მოგივათ: ყვავილი, გეომეტრიული ფიგურა, კაცუნა... მთავარია, ნეგატიური ემოციისგან გათვისუფლდეთ.
ფერადი სუნთქვა
ტიბეტში მკურნალობის ერთ-ერთ სახეობას ფერადი "სუნთქვა" წარმოადგენს. შეგიძლიათ, თქვენც სცადოთ.
- რათა თავი ბედნიერად იგრძნოთ, წარმოიდგინეთ, რომ ჩაისუნთქეთ ნარინჯისფერი სურნელი, ხოლო ამოისუნთქეთ ლურჯი.
- საკუთარი თავისადმის პატივისცემის განსამტკიცებლად ჩაისუნთქეთ იისფერი სურნელი და ამოისუნთქეთ ყვითელი.
სუნთქვა შეიძლება შეუთავსოთ არომათერაპიას. ამისთვის საჭიროა მოწყვიტოთ ყვავილი, უყუროთ მას და ჩაისუნთქოთ არომატი. ბევრი სიამოვნების მისაღებად და სიმშვიდის მოსაპოვებლად ჭრელ ეგზოტიკურ ფრინველებს ან თევზებს იძენს და მათი მრავალფეროვნებით ტკბება. ესეც ერთგვარი ფერთა თერაპიაა.