მედიკოსებმა ენდომეტრიოზის განვითარების მიზეზი დაასახელეს
საიმონ ფრეიზერის უნივერსიტეტის მკვლევარების მიერ შემუშავებული ახალი თეორიის თანახმად, ამ დაავადების განვითარებაში გადამწყვეტ როლს ასრულებს ჰორმონი-ტესტოსტერონი.
დაავადებისას აღინიშნება საშვილოსნოს გარეთ ენდომეტრიუმის ზრდა, რაც იწვევს ტკივილს, ანთებასა და უნაყოფობას. ახალი კვლევა ეფუძნება იმ მოსაზრებას, რომ ენდომეტრიოზით დაავადებული ქალები ჯერ კიდევ მუცლადყოფნის პერიოდში იმყოფებიან ტესტოსტერონის შედარებით დაბალი დონის პირობებში.
მკვლევარების თეორიის თანახმად, ტესტოსტერონის დაბალი დონე აპროგრამებს ქალის განვითარებად რეპროდუქციულ სისტემას. შედეგად ვლინდება ენდომეტრიოზთან დაკავშირებული უნიკალური ნიშნების ნაკრები, რომელთა შორისაა ადრეული მენარხე (პირველი მენსტრუაცია), მოკლე მენსტრუალური ციკლები, ტკივილის მაღალი მგრძნობელობა, ძლიერი ანთება და ოვულაციისა და მენსტრუალური ციკლის მაკონტროლებელი ჰორმონების დონის ცვლილება.
აღნიშნული თეორიით, ენდომეტრიოზის თითქმის ყველა სიმპტომი შეიძლება აიხსნას ტესტოსტერონის დაბალი დონის გვერდითი ეფექტებით.