ნანა კალანდაძე

რომელიც ქალის გარეგნობას განსაკუთრებულ ხიბლს ანიჭებს. აბსოლუტურად ჯანმრთელი თმა ალბათ არ არსებობს.სამაგიეროდ, არსებობს საშუალებები, რომლებიც მას ბზინვარებასა და სილამაზეს დაუბრუნებს.

აი, რამდენიმე კითხვა, რომლებიც ყველაზე ხშირად უჩნდებათ ქალებს:

• თმას მუდმივად ვიუფერულებ. გამაუფერულებელმა საშუალებებმა ღერები გამოაშრო, გაახუნა და ისე გააუხეშა, რომ ვეღარც კი ვივარცხნი. როგორ მოვიქცე?

– ამ შემთხვევაში კომპლექსური მოქმედებაა საჭირო: შამპუნი, ბალზამი, თმის ტიპის შესატყვისი ნიღაბი. ისინი თმის ღერებს ელასტიკურობას დაუბრუნებს და შეამცირებს მექანიკური დაზიანების (ბოლოების გახლეჩის და ა.შ.) რისკს. დაივარცხნეთ ჯაგრისით ან ფართოკბილება სავარცხლით ნელა, დაიწყეთ ბოლოებიდან და თანდათან ძირებისკენ გადაინაცვლეთ.

• ამბობენ, რომ ხშირი ბანა თმას აცხიმიანებს. რამდენად მართალია ეს?

– თმას აცხიმიანებს კანის ცხიმი, რომელიც ცხიმოვან ჯირკვლებში წარმოიქმნება. უნდა შეიძინოთ შამპუნი ცხიმიანი კანისა და თმისთვის, უარი თქვათ კრემისებრ ბალზამზე და მის ნაცვლად აეროზოლი გამოიყენოთ.

• რამდენიმე ხნის წინ შევამჩნიე, რომ თმის ბოლოები მეყოფა. ძალიან განვიცდი. როგორ მოვიქცე?

– საკმარისია, თვეში ერთხელ თმა 1-2 სანტიმეტრით დაიმოკლოთ. ამ პრობლემას თვითონაც გაუმკლავდებით: თმა მცირე კონებად დაყავით, დაახვიეთ, შეიკარით და აქეთ-იქით გაშვერილი ბოლოები მოაჭერით. ვარცხნილობის პროფესიონალი ოსტატები ამისთვის ცხელ მაკრატელს იყენებენ. დაგეხმარებათ ცხიმოვანი ნიღბებიც.

• გამიგონია, რომ არსებობს საშუალებები, რომელთა დახმარებითაც ვარცხნილობის გაკეთება 5 წუთში შეიძლება. შესაძლებელია თუ არა ასე მალე თმის დავარცხნა?

– ფენით შემშრალ თმაზე წაისვით საფიქსაციო საშუალება და ბოლომდე გაიშრეთ. დაახვიეთ თმა პლასტმასის ბიგუდებზე და ორი წუთით შეუშვირეთ ცხელი ჰაერის ნაკადს (შეიძლება თერმობიგუდების გამოყენებაც). როცა თმა გაშრება და გაგრილდება, ბიგუდები მოიხსენით, მაგრამ კი არ დაივარცხნოთ, თითებით დაილაგეთ. მიიღებთ ლამაზ და ორიგინალურ ვარცხნილობას.

• ამბობენ, რომ თმის სიჯანსაღე კვებაზეც არის დამოკიდებული. რომელი საკვებია სასარგებლო თმისთვის?

– თმის სიჯანსაღისთვის ექიმები ისეთ სურსათს გვირჩევენ, რომელიც მდიდარია ანტიოქსიდანტებით – E და C ვიტამინებით. ამ ვიტამინებს უხვად შეიცავს მწვანილი და მცენარეული (სიმინდის, მზესუმზირას, ზეითუნის) ზეთი, აგრეთვე ცხიმიანი თევზი, მათ შორის – ორაგული და ქორჭილა. რძის ნაწარმი, განსაკუთრებით – ყველი და ხაჭო, მდიდარია B9 ვიტამინით, რომელიც ხელს უწყობს თმის ზრდას. ასე რომ, თუ გსურთ, ზაფხულში ყველა გააოცოთ მშვენიერი გრძელი თმით, აუცილებლად ჩართეთ რაციონში ეს პროდუქტები.

• რომელი საკვები უწყობს ხელს თმის ძირების გამაგრებას?

– თმის ძირებს შესანიშნავად ამაგრებს ნატურალური ნიღბები, რომლებიც შინაც შეგიძლიათ დაამზადოთ. ასეთია, მაგალითად, ბანანისა და თაფლის ნიღაბი. ის განსაკუთრებით მარგებელია დაზიანებული და დამწვარი თმისათვის. თაფლი ღერებს ბზინვარებას მატებს, ბანანი ატენიანებს, ხოლო ხორბლის მარცვლები, რომლებიც A და E ვიტამინებით არის მდიდარი, თმას ვიტამინებით კვებავს. დაჭყლიტეთ 1 ბანანი, დაამატეთ 2 ჩაის კოვზი დაღერღილი ხორბალი და 50 გრამი თაფლი, კარგად აურიეთ, ვიდრე ერთგვაროვან მასას არ მიიღებთ. წაისვით სუფთა, ტენიან თმაზე და 20 წუთს გაიჩერეთ.