ქალებს ლიბიდოს ასამაღლებლად და შარდსასქესო სისტემის დაავადებების პროფილაქტიკისთვის ველოსპორტს ურჩევენ

ველოსპორტი ინტიმური ცხოვრების გაუმჯობესების იდეალური საშუალებაა. კალიფორნიის უნივერსიტეტის მეცნიერები ქალებს, ლიბიდოს ასამაღლებლად და შარდსასქესო სისტემის დაავადებების პროფილაქტიკის მიზნით, ველოსპორტს ურჩევენ.

როგორც კვლევამ აჩვენა, ქალებს, რომლებიც რეგულარულად ვარჯიშობენ ველოსიპედზე, მომატებული სექსუალური ლტოლვა აღენიშნებათ.

ეს აჩვენა 3118 ქალზე დაკვირვებამ. მათი ნახევარი რეგულარულად ვარჯიშობდა ველოსიპედით. ექიმებმა მათი ჯანმრთელობის მდგომარეობა შეაფასეს. ყურადღება ექცეოდა ასაკს, გულსისხლძარღვთა სისტემის ზოგად მდგომარეობასა და სხეულის მასის ინდექსს. აღმოჩნდა, რომ ველოსპორტით დაკავებულ ქალებს უფრო იშვიათად აღენიშნებოდათ შარდსასქესო სისტემის ინფექციები და უფრო აქტიური სქესობრივი ცხოვრება ჰქონდათ.

სპეციალისტებმა აღნიშნული ეფექტი შემდეგნაირად ახსნეს: ცხოვრების უმოძრაო წესისას, მენჯის ორგანოებსა და გენიტალიებში აღინიშნება შეგუბება, რის შედეგადაც პათოგენური ბაქტერიები ადვილად სახლდებიან და მრავლდებიან შარდსასქესო სისტემაში. იგივე მიზეზით ქვეითდება გენიტალიების მგრძნობელობა.

ლალი ჩხიკვაძე