სირბილი სამკურნალო პრეპარატებზე ეფექტურია
მთავარია, მოინდომოთ, და რაც მთავარია, გაითავისოთ, რომ სირბილს უდიდესი ეფექტი აქვს ჯანმრთელობისათვის. გამაჯანსაღებელი სირბილი კეთილისმყოფელ გავლენას ახდენს სისხლის მიმოქცევის სისტემასა და იმუნიტეტზე, აკაჟებს ორგანიზმს, ზრდის მისი წინააღმდეგობის უნარს დაავადებებისადმი.
სირბილის ზოგადი ეფექტი ასეთია: ცენტრალური ნერვული სისტემის ფუნქციური მდგომარეობის ცვლილება, ენერგოდანახარჯების კომპენსაცია, სისხლის მიმოქცევის სისტემაში განვითარებული ძვრები და ავადობის შემცირება. სირბილი ხსნის ნერვულ დაძაბულობას, აუმჯობესებს თვითშეგრძნებას და ძილს, ზრდის შრომისუნარიანობას. თუ ოპტიმალურად დოზირებულ სირბილს წყლის პროცედურებს შეუხამებთ, უძილობა და ნევრასთენია - XX საუკუნის დაავადებები სათოფეზეც ვერ მოგეკარებათ.
სირბილი ფსიქოლოგიური სტრესის ფიზიკური დამარცხებააო - ამბობენ სპეციალისტები. ის უარყოფითი ემოციებისაგან განმუხტვის მართლაც რომ შესანიშნავი გზაა. ამ თვალსაზრისით განსაკუთრებით ეფექტურია საღამო ხანს სირბილი. ის ანეიტრალებს დღის განმავლობაში დაგროვილ ადრენალინს-სტრესის შედეგად გამოყოფილ ნივთიერებას. ასე რომ სირბილი შესანიშნავი ბუნებრივი ტრანკვილიზატორია, ბევრად უფრო ეფექტური, ვიდრე სამკურნალო პრეპარატები. სირბილის დამამშვიდებელ გავლენას აძლიერებს ენდორფინების (სიამოვნების ჰორმონების) გამოყოფა. ინტენსიური დატვირთვის დროს ამ ჰორმონთა შემცველობა სისხლში 5-ჯერ იზრდება და რაც მთავარია, საათობით რჩება, ენდორფინები თავისებურ ეიფორიას – ფსიქიკური და ფიზიკური კმაყოფილების, ნეტარების გრძნობის, სიმსუბუქისა და სიხარულის განცდას იწვევს, შიმშილისა და ტკივილის შეგრძნებას კი თრგუნავს.
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
სირბილის სპეციალურ ეფექტებს რაც შეეხება: სირბილი აფართოებს გულ-სისხლძართვთა სისტემის ფუნქციურ შესაძლებლობებს - ზრდის გულის შეკუმშვათა სიხშირეს, წუთმოცულობას, და ზოგადად შრომისუნარიანობას. გამაჯანსაღებელი სირბილის წყალობით ორგანიზმში მწყობრში დგება ცხიმოვანი (ლიპიდური) ცვლა. სისხლში მცირდება ქოლესტერინისა და ტრიგლიცერიდების შემცველობა, ნორმალიზდება სხეულის მასა, უმჯობესდება შინაგან ორგანოთა ფუნქცია, ამ უკანსკნელთა ერთგვარი ვიბრაცია-მასაჟის გამო. გარდა ამისა, იწრთობა საყრდენ-მამოძრავებელი სისტემა, სახსრებში უმჯობესდება სისხლისა და ლიმფის დენა, რის გამოც ფერხდება დეგენერაციული პროცესები, რაც ართროზისა და სხვა პათოლოგიური პროცესების პროფილაქტიკისათვის მეტად მნიშვნელოვანია.
და თუ მაინც, სირბილის დაწყება გიჭირთ, ან თქვენი ორგანიზმის ჯანმრთელობის მდგომარეობა ამის საშუალებას არ გაძლევთ, სუფთა ჰაერზე ისეირნეთ მაინც. ნუ დაგაბრკოლებთ წვიმა ან თოვლი, სიცივე და სუსხი. ჩაიცვით მოხერხებულად და 30-40 წუთით მაინც გაისეირნეთ. თანდათანობით ნაბიჯს აუჩქარეთ, მშვიდად ისუნთქეთ, ღამით საძინებელ ოთახში ფანჯარა ან აივნის კარი შეხსნილი დატოვეთ და ისე დაიძინეთ. ამით აუცილებლად გაიკაჟებთ სასუნთქ სისტემასა და მთლიანად ორგანიზმს, შედეგში თავად დარწმუნდებით, გაცივება და უასიამოვნო ინფექციები ვერ მოგერევათ! ყოველ დღეს ჯანმრთელად და ხალისიანად შეეგებებით!
თინათინ გოცაძე
