ყურის ტკივილი ბავშვებთან
შესაძლო მიზეზებიდან აღსანიშნავია:
- ბანაობა, თუ ყურში მოხვდა წყალი, განსაკუთრებით - ცივი ან დაბინძურებული;
- უცხო სხეული;
- ყურის ტრავმა (დაჟეჟილობა, დამწვრობა, მწერის ნაკბენი, დაფის აპკის გახეთქვა და ა.შ.);
- სმენის გასავალში გოგირდის მსხვილი საცობის წარმოქმნა;
- გაციება.
შინაგანი ფაქტორებია:
- ბავშვების ყურის ტკივილის ყველაზე ხშირი მიზეზი ოტიტია: შეიძლება იყოს შუა-, როდესაც ანთება შუა ყურშია და ხშირად რინოფარინგიტის შედეგია, ან გარე-, როდესაც გარეთა სმენის არხის ანთებაა, რომელიც სმენის გასავალში ფურუნკულის ან ჭრილობის შემდეგ ვითარდება;
- ოტომიკოზი (სოკო);
- ევსტაქიიტი - ევსტაქის მილის ანთება;
- ვირუსული ინფექცია;
- გაციება;
- ქუნთრუშა, სინუსიტი, ანგინა ან კბილის პრობლემები;
- სმენის ნერვის დაზიანება;
- სიმსივნური პროცესები;
- მეზობელი ორგანოების (თავის ტვინი, თვალი, ცხვირი, ყელი, კისერი, ახლოს მდებარე სისხლძარღვები სხვადასხვა პათოლოგია);
- არტერიული და ქალაშიდა წნევის მატება, თავის ტვინის სისხლის მიმოქცევის დარღვევა, ჰიპოტონია.
ძალიან ხშირად ბავშვების გაციება ყურის ტკივილით, ანუ მისი ანთებით რთულდება. 4 წლამდე ასაკში ბავშვები განსაკუთრებით ხშირად ავადობენ ამ დაავადებით. როგორც წესი, გაციების გავლის შემდეგ ყურის ტკივილიც აღარ აღინიშნება. ამასთან, ძალიან ხშირად იწევს ტემპერატურა, ვლინდება მცირე შემაგრება და ყურის მიდამოს სიწითლე. დაავადების ამ სტადიაში დაფის აპკის ზედა ნაწილის ანთება იკვეთება. თუ დაავადება დროულად გამოვლინდება და გატარდება შესაბამისი ღონისძიებები, გამოჯანმრთელებაც არ დააყოვნებს.
ოტიტის - ყურის ანთების - პირველივე სიმპტომების გამოვლენისთანავე აუცილებელია ექიმის კონსულტაცია. თუ ეს დაუყოვნებლივ შეუძლებელია, მაშინ, უპირველესად, ბავშვს ტკივილი უნდა შეუმსუბუქდეს. შესაძლებელია ყურთან თბილი სათბურის მოთავსება ან ტკივილგამაყუჩებლის მიცემა. ტემპერატურის დასაქვეითებლად კი საჭიროა სიცხის დამწევი საშუალება.
ზოგჯერ ანთებითი დაფის აპკი სკდება და ყურიდან გამოიყოფა თხევადი ჩირქი, რომელიც დილით ბავშვის ბალიშზე შეიძლება აღმოაჩინოთ. ეს იმას ნიშნავს, რომ რამდენიმე ხნით ადრე დაწყებული აბსცესი გასკდა.
ხშირად ბავშვები არ უჩივიან ყურის ტკივილს, ამიტომ ძნელია იმის განსაზღვრა, რომელ სტადიაზეა ანთება. ჩირქის გამოყოფისას საჭიროა ექიმის კონსულტაცია. დამოუკიდებლად შეიძლება მხოლოდ ყურის ფაქიზად გაწმენდა, რომ ჩირქი კანზე არ დარჩეს.
ყურის ანთების დროს დაავადების დაწყებიდან რამდენიმე დღეში შესაძლებელია, ბავშვს სმენა დაუქვეითდეს. თუმცა დროული და სწორი მკურნალობით ანთება სწრაფად გაივლის და სმენაც აღდგება.