როგორ შევარჩიოთ ლოგოპედი
მეტყველების დეფექტისა და პრობლემის მქონე პაციენტების რიცხვი ყოველწლიურად იზრდება. ლოგოპედის პაციენტების უმეტესობა სკოლამდელი ასაკის ბავშვები და დაბალი კლასის მოსწავლეები არიან. თუმცა, ლოგოპედი არა მარტო ბავშვებთან მუშაობს. ის აგვარებს ზრდასრული ადამიანების მეტყველებით კომუნიკაციასთან დაკავშირებულ პრობლემებსაც.
ლოგოპედის მუშაობა ინდივიდუალურია და სპეციალისტისგან მოითხოვს არა მარტო თეორიულ ცოდნასა და პრაქტიკულ უნარებს, არამედ მოთმინებასა და ასაკობრივი ფსიქოლოგიის თავისებურებების ცოდნას. ის ემყარება ცოდნას პედაგოგიკის, ფიზიოლოგიის, ნევროლოგიის, დეფექტოლოგიისა და ენათმეცნიერების სფეროში. სწორედ ამ ცოდნის მიხედვით უნდა შევარჩიოთ ლოგოპედი. ლოგოპედებთან ერთად მჭიდრო კავშირში უნდა მუშაობდნენ ფსიქოლოგი და სოციალური პედაგოგი. სწორედ ეს სამი სპეციალისტი განაპირობებს ბავშვის სოციალიზაციის პროცესს, ანუ საზოგადოების სრულფასოვან და თანასწორ წევრად ჩამოყალიბებას. ლოგოპედის პროფესიის სოციალური მნიშვნელობა ძალიან დიდია.
ლალი ჩხიკვაძე