როცა ოჯახში ჩვილი ბავშვია
ინფექცია არ შეეყაროს... როგორ მოვიქცეთ ამისთვის? ბავშვთა ასაკის ინფექციებს ექიმები, ტრადიციულად, მიაკუთვნებენ ყბაყურას, წითელას, წითურას, ჩუტყვავილას, ქუნთრუშას. მათ ორი რამ აერთიანებთ - ჰაერწვეთოვანი გზით გავრცელება და მყარი იმუნიტეტის დატოვება.
ინფექციამ ჩვენს ოჯახში რომ შემოაღწიოს, საკმარისია, სტუმრად მოვიდეს ადამიანი, რომელმაც ჯერ არ იცის, რომ ავადაა და ბავშვის ახლოს დააცემინოს. ჩვილის იზოლირება შეუძლებელია, მაგრამ შეგვიძლია, ზრდისა და განვითარებისთვის ისეთი პირობები შევუქმნათ, სადაც ბაქტერიებისა და ვირუსების ადგილი არ იქნება.
როგორ მოვემზადოთ ახალშობილის დასახვედრად?
სამშობიარო სახლში ბავშვი თითქმის სტერილურ პირობებშია, ამიტომ მედიკოსები დაბეჯითებით გვირჩევენ, პატარას შინ მოყვანამდე ბინა ძალიან კარგად დავალაგოთ. კარგად დაბერტყეთ ხალიჩები, გარეცხეთ ფარდები და საწოლის გადასაფარებლები, მორეცხეთ იატაკი, შეძლებისდაგვარად სველი წესით გაწმინდეთ ავეჯი. ჩვილის ტანსაცმელი და მისთვის განკუთვნილი ნივთები ცალკე უნდა ინახებოდეს. საბავშვო ავეჯი ისე უნდა შეირჩეს, რომ სველი წესით წმენდას უძლებდეს. უნდა იზრუნოთ განათებაზეც. აუცილებელია მქრქალი განათების წყარო, რათა სინათლე ღამითაც გენთოთ. ოპტიმალური ტენიანობა ბავშვის ოთახში 50-60 პროცენტია, ხოლო ტემპერატურა - 21-22 გრადუსია. ვინაიდან ჩვენი შეგრძნებები სუბიექტურია, ამ მაჩვენებლების კონტროლისთვის შეიძინეთ თერმომეტრი და ჰიგრომეტრი.
უფროსი და-ძმა
მაშ ასე, სახლი სუფთაა, ნათელია, თბილია. ყველაფერი მზადაა ოჯახის ახალი წევრის დასახვედრად. ჩვილის გასაცნობად რიგში დგანან ბებიები, ბაბუები და უფროსი და-ძმები. სწორედ ამ დროს იპყრობს დედას შიში: ვაითუ უფროსებმა სკოლიდან ან ბაღიდან ჩუტყვავილა ან ყბაყურა მოიტანონ? ხომ არ შევზღუდოთ უფროსების კონტაქტი ახალშობილთან?
ფსიქოლოგები ერთხმად ამტკიცებენ, რომ უფროსი ბავშვები მაქსიმალურ მონაწილეობას უნდა იღებდნენ უმცროსების აღზრდაში, მის გვერდით უნდა იყონ ბანაობის, ჩაცმის, თამაშის დროს, რათა სიყვარულმა განდევნოს ეჭვი იმ პაწაწინა არსების მიმართ, რომელიც დედას სულ ხელში უჭირავს. როცა უფროსი ბავშვი სკოლიდან ან საბავშვო ბაღიდან ბრუნდება, სურს, სწრაფად მიირბინოს პატარასთან, ჩაეხუტოს და მიეფეროს მას. ამ დროს ბავშვს კეთილგანწყობილი, მაგრამ შეუვალი ტონით უნდა ავუხსნათ, რომ პატარასაც ძალიან ენატრება ის, მაგრამ აუცილებელია, ჯერ ფეხსაცმელები გაიხადოს, ტანსაცმელი გამოიცვალოს და ხელები კარგად დაიბანოს.
უფროსები აუცილებლად უნდა მონაწილეობდნენ პატარების დაბანაში, სეირნობაში, უნდა ეთამაშებოდნენ მათ, მაგრამ ამ დროს ხელები ყოველთვის სუფთა უნდა ჰქონდეთ. თუ უფროსი ბავშვი ავად გახდა, განსაკუთრებული ყურადღება უნდა მიექცეს მისი ოთახის სისუფთავეს, რათა მიკროორგანიზმებს გამრავლების საშუალება არ მივცეთ. საზოგადოდ, რეკომენდებულია, რომ ოჯახში, სადაც ბავშვია, სველი წესით დალაგება კვირაში 2-3-ჯერ ჩატარდეს, თანაც საამისოდ სადეზინფექციო საშუალებები გამოვიყენოთ, რათა მხოლოდ თვალით შესამჩნევი მტვერი კი არ მოვიცილოთ, არამედ მავნე ბაქტერიები, სოკოები და ვირუსებიც გავანადგუროთ. სველი წესით დალაგებისას პატარა სხვა ოთახში უნდა იყოს.
დალაგების შემდეგ ოთახი კარგად უნდა განიავდეს. გულდასმით უნდა გასუფთავდეს ის ადგილი, სადაც ბავშვს ტანსაცმელს ვუცვლით. უნდა გაირეცხოს ბავშვის სათამაშოებიც. ტანსაცმელი და საწოლის თეთრეული ხშირ-ხშირად უნდა დაირეცხოს - სარეცხით სავსე კალათები ბაქტერიების შესანიშნავი წყაროა.