ნანა კალანდაძე

ბევრს მაღალანაზღაურებადი სამსახური აქვს და შეუძლია თავს ამის უფლება მისცეს, ამით სამუშაოსაც ინარჩუნებს და ბავშვის აღზრდაში დამხმარეც ჰყავს. შესაფერისი ადამიანის მოძებნა არც ისე იოლი საქმეა, ბევრ რისკთან არის დაკავშირებული, დარწმუნებული უნდა იყო, რომ ყველაზე ძვირფასს, შვილს, სანდო ადამიანის ხელში დატოვებ.

ყოველთვის სარისკოა, როდესაც შვილს უცნობ ადამიანს ანდობთ, თუმცა ეს ადამიანი შეიძლება თქვენი ოჯახის ნამდვილ მეგობრადაც იქცეს. ვიდრე განცხადებების სანახავად გაზეთების ფურცვლას, ინტერნეტში საჭირო ინფორმაციის ან სპეციალური სააგენტოების ძიებას შეუდგებოდეთ, უმჯობესია, ჯერ ნაცნობებში მოიკითხოთ – იქნებ ვინმეს შეუძლია, კარგი ძიძა ან უკვე გამოცდილი სააგენტო შემოგთავაზოთ. რეკომენდაცია მაინც ბევრს ნიშნავს. თუ ვერავინ დაგეხმარათ, მაშინ დამოუკიდებლად დაიწყეთ ძებნა. მიიჩნევა, რომ ძიძა, რომელსაც სპეციალური სააგენტო შემოგთავაზებთ, საიმედოა. ეს ვარიანტი გარკვეულ გარანტიას მართლაც იძლევა და დროის ეკონომიასაც გააკეთებთ. მაგრამ ვიდრე ძიძის შერჩევას სპეციალისტებს ანდობთ, აუცილებლად უნდა დაინტერესდეთ თვით სააგენტოს რეპუტაციით:

• რამდენი წელია არსებობს;
• რა პრინციპით ხდება პერსონალის შერჩევა;
• ითხოვენ თუ არა განათლების დამადასტურებელ დოკუმენტებს, ჯანმრთელობის ცნობას ან სარეკომენდაციო წერილებს.

კარგი ძიძა უნდა ერკვეოდეს ბავშვის ფსიქოლოგიაში, მის ასაკობრივ თავისებურებებში, აღზრდის მეთოდებში, უნდა ჰქონდეს გარკვეული ცოდნა სამედიცინო სფეროში. ამავე დროს თქვენი მოთხოვნებიც მკაფიოდ უნდა იყოს ჩამოყალიბებული. მნიშვნელოვანია:

• სამუშაო გამოცდილება (ოჯახებში, საბავშვო ბაღში, სკოლაში);
• განათლება (უმაღლესი პედაგოგიური ან საშუალო სპეციალური);
• უცხო ენების ცოდნა.

თავიდანვე განსაზღვრეთ სამუშაო გრაფიკი – ნაწილობრივი დატვირთვა ექნება ძიძას თუ სრული, ასევე – მის მოვალეობათა ნუსხა, ანაზღაურების პირობები (საათობრივი, ყოველკვირეული, ყოველთვიური). მომდევნო ეტაპია გასაუბრება. დაუსვით კითხვები, რომლებზეც ამომწურავ პასუხებს მიიღებთ: ჰყავს თუ არა საკუთარი შვილები; რატომ აირჩია ეს სამუშაო; რომელი განმავითარებელი თამაშები იცის და ა.შ. რადგან ჯერ კიდევ უცნობია, იმუშავებს თუ არა ეს ადამიანი თქვენთან, შეხვედრა დაუნიშნეთ სახლის გარეთ, მაგალითად, კაფეში. გამოჰკითხეთ წინა სამუშაოს შესახებ: რა ასაკის ბავშვებთან ჰქონდა ურთიერთობა, ემოციური ადამიანია თუ არა, ექსტრემალურ სიტუაციებში იპყრობს თუ არა შიში, ხომ არ იბნევა, როგორ მოიქცევა, თუ პატარა რამეს დაიშავებს ან სიცხე აუწევს. სთხოვეთ იმ ოჯახის ტელეფონი, სადაც აქამდე მუშაობდა. აუცილებლად დარეკეთ. თუ პრეტენდენტი უარს ამბობს ტელეფონის ნომრის მოცემაზე, ეს საკმაო საბაბია იმისთვის, რომ დაფიქრდეთ და გარკვეული დასკვნა გამოიტანოთ. თუ გასაუბრებამ წარმატებით ჩაიარა, ამის შემდეგ უნდა გაარკვიოთ, შეძლებს თუ არა ძიძა თქვენს შვილთან საერთო ენის პოვნას, მასთან დაახლოებას. მოაწყვეთ საცდელი დღე, დააკვირდით ბავშვის რეაქციებს. თუ ძიძა სვამს კითხვებს ბავშვის ტემპერამენტის, მისი ხასიათისა და განვითარების თავისებურებების შესახებ, ეს კარგი ნიშანია – ის მართლაც პროფესიონალია.

ვინ გვჭირდება?

• ერთ წლამდე ასაკის პატარასთვის – პიროვნება სამედიცინო განათლებით და ჩვილებთან მუშაობის გამოცდილებით. მისი მოვალეობაა დღის რეჟიმის დაცვა, საბავშვო სამზარეულოს თავისებურებათა ცოდნა, ბავშვის ტანსაცმლის რეცხვა, ჰიგიენის წესების დაცვა, ჰიგიენური პროცედურების ზედმიწევნით ცოდნა, ბავშვის გასეირნება.

ნ სკოლამდელი ასაკის ბავშვისთვის – პიროვნება, რომელიც ასწავლის, გამოუმუშავებს მას მარტივ ჩვევებს და მოამზადებს სკოლაში წასასვლელად.

ძიძის შერჩევა ძალზე ფაქიზი საკითხია. თქვენ მას ანდობთ ყველაზე ძვირფასს, რაც გაგაჩნიათ – თქვენს შვილს, თანაც იმ ასაკში, როდესაც ბავშვის პიროვნებას საძირკველი ეყრება, ამიტომ უდიდესი მნიშვნელობა აქვს, ვის ხელში აღმოჩნდება პატარა. მის ბუნებაზე, ადამიანურ თვისებებზე, განათლებაზე, ინტელექტზე, მისწრაფებებსა და ჩვევებზე იქნება დამოკიდებული თქვენი შვილის აღზრდა და განვითარება. ამიტომ დიდი დაკვირვება და ყურადღება გმართებთ. რეკომენდაციები აუცილებლად გადაამოწმეთ, დასვით კითხვები – ძიძის არჩევისას დაშვებული შეცდომა შესაძლოა საბედისწერო აღმოჩნდეს.