ერთი მამის ძალიან კარგი მაგალითი: ვიდეო, რომელიც 3 წლის გოგოს შეთხზული ზღაპრის მიხედვით შეიქმნა
გამოკვლევებმა აჩვენა, რომ ბავშვები, რომელთა მამებიც აქტიურად მონაწილეობდნენ მათ აღზრდაში, უფრო კომუნიკაბელურები, ინიციატივიანები და მშვიდები არიან. ამიტომ ყველა მამას ვურჩევთ, მონახონ საერთო ძაფები შვილის გულისკენ და ეს გააკეთონ, ვიდრე შვილი პატარაა, თორემ მოზარდობისას უკვე გვიანია ასეთი მცდელობა და მამები ხშირად იმედგაცრუებულნი რჩებიან, რადგან შვილთან საერთო ენას ვეღარ პოულობენ.
ერთი მამის ძალიან კარგი მაგალითი გვინდა წარმოგიდგინოთ:
სოციალურ ქსელში გავრცელდა ანიმაციური ვიდეო, რომელიც 3 წლის გოგოს შეთხზული ზღაპრის მიხედვით შეიქმნა.
ანიმაციური ვიდეოს ავტორი ცოტნე რუსიშვილია, რომელიც წერს, რომ შვილს ღამით ზღაპრებს უყვება. ერთ საღამოს კატომ თავად შეთხზა ზღაპარი მეგობარ ნიტაზე, ანიმაციურ ვიდეოში 3 წლის გოგო ზღაპარს თავად ახმოვანებს.
"მოკლედ, კატოს ძილის წინ ვუყვები ხოლმე ზღაპრებს (სახელდახელოდ შეთხზულს). ხოდა... ერთხელაც ვუთხარი, სულ მე რო გიყვები, ეხლა შენ მომიყევი-თქო...
ბევრი არ უფიქრია და უცბად შეთხზა ეს ზღაპარი თავის მეგობარ ნიტაზე. მამიკომ ეს მონაყოლი (მალულად) ჩაიწერა, მერე იდეამ დაჰკრა და ასე შეიქმნა ეს მინი მულწიკი.",- წერს კატოს მამა, ცოტნე რუსიშვილი სოციალურ ქსელში.